Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Be N’Dona Jo Wehọmẹ Do Wẹ Ya?

Be N’Dona Jo Wehọmẹ Do Wẹ Ya?

Pọ́n onú delẹ he ji a dona lẹnnupọndo whẹ́

Sọgbe hẹ osẹ́n lẹdo towe mẹ tọn, obá tẹ mẹ wẹ a dona yì wehọmẹ jẹ? Be a ko yì wehọmẹ jẹ obá enẹ mẹ ya? Eyin a gbẹkọ ayinamẹ Biblu tọn nado yin “mẹmẹglọ na aṣẹpipa daho lẹ” go bo ma yì wehọmẹ jẹ obá he yin bibiọ lọ mẹ whẹpo do dote, be a jogbe niyẹn.Lomunu lẹ 13:1.

Be a ko jẹ yanwle he wutu a do to weplọn lẹ kọ̀n ya? Yanwle tẹlẹ kọ̀n wẹ a jlo dọ wepinplọn towe ni gọalọna we nado jẹ? Kavi a ma do yanwle de taun? A dona tindo yanwle de! Eyin e ma yinmọ, a na taidi mẹhe do pinpán bo ma ka yọ́n fie e jlo na yì taun. Enẹwutu, sinai po mẹjitọ towe lẹ po bo gbadopọnna adà he to odò bọ hosọ etọn yin “ Yanwle He Wutu N’to Wehọmẹ Yì Lẹ” hẹ yé. Eyin a ma jẹ yanwle he ji hiẹ po mẹjitọ towe lẹ po ko kọngbedopọ do lẹ kọ̀n whẹpo do nọ tata bo jo wehọmẹ do, be a jogbe niyẹn.

Eyin a hò wehọmẹ yìyì plá, be a yinuwa di mẹhe lọ́n jẹte sọn pinpán mẹ bo ma ka ko jẹ fie e jei

Naegbọn a do jlo na doalọtena wehọmẹ yìyì? Vlavo e sọgan yin nado yì dín akuẹ do gọalọna mẹjitọ towe po nọvi towe lẹ po kavi nado yì tindo mahẹ to azọ́n mẹdezejo tọn de mẹ. E sọgan sọ yin na whẹjijọ goyiyi tọn lẹ wutu, taidi nado dapana tẹnpọn wepinplọn tọn lẹ kavi nado gán sọn azọ́ndenamẹ wehọmẹ tọn lẹ si. Nuhahun lọ todin wẹ nado yọ́n whẹwhinwhẹ́n tangan he wutu a jlo na jo wehọmẹ do, bo dindona eyin e sọgbe kavi do goyiyi hia. Eyin a jo wehọmẹ do na a lẹndọ tukla wehọmẹ tọn ko hugan wutu, e yọnbasi dọ e na wá vẹna we to osọ.

Eyin a hò wehọmẹ yìyì plá, be a yinuwa di mẹhe lọ́n jẹte sọn pinpán mẹ bo ma ka ko jẹ fie e jei. A sọgan nọma voawu to pinpán lọ mẹ, podọ mẹhe gọna we to e mẹ lẹ sọgan nọma jọmẹ, amọ́ eyin a lọ́n jẹte sọn pinpán lọ mẹ, e họnwun dọ a ma na yì fie a jei podọ e yọnbasi dọ a na hẹn awugblena dewe sinsinyẹn. Mọdopolọ, eyin a hò wehọmẹ yìyì plá, e yọnbasi dọ e na wá vẹawuna we taun nado mọ azọ́n he a na wà. Podọ eyin a tlẹ wá mọ azọ́n de, akuẹ he a na nọ dù sọgan nọma sù sọ dehe a na ko mọ eyin a plọnwe fó dai wẹ.

Kakati nado hònúpla, yí homẹfa do duto nuhahun he a to pipehẹ to wehọmẹ lẹ ji. Gbọnmọ dali, a na plọn akọndonanu bo nasọ wleawufo nado duto nuhahun mọnkọtọn lẹ ji to whenue a na wá jẹ dewe si bo na mọ agbasazọ́n de.

 Yanwle He Wutu N’Do to Weplọn Lẹ

Dopo to onú titengbe he wutu a do to weplọn lẹ mẹ wẹ nado wá mọ agbasazọ́n de he na hẹn ẹn yọnbasi na we nado penukundo dewe go podọ nado wleawudaina whédo towe eyin a wá do whẹndo de ai to gbèdopo. (2 Tẹsalonikanu lẹ 3:10, 12) Be a ko de agbasazọ́n he a jlo na wà po obá he mẹ a dona yì wehọmẹ jẹ nado sọgan pegan na agbasazọ́n enẹ po ya? Gblọndo nina na kanbiọ he bọdego ehelẹ na gọalọna we nado yọnẹn eyin wepinplọn he a to afọdona na plan we jẹ fihe a jei:

  • Etẹwẹ yin nugopipe ṣie? (Di apajlẹ, be e nọ bọawuna mẹdevo lẹ nado wazọ́n dopọ hẹ we ya? Be a yiwanna alọnuzọ́nwiwa kavi nọ saba tẹnpọn nado vọ́ nulẹ jlado wẹ ya? Be a yọ́n lehe yè nọ kàn ayiha bo nọ mọ pọngbọ na nuhahun lẹ do ya?)

  • Azọ́n tẹlẹ wẹ sọgbe hẹ nugopipe ṣie?

  • Agbasazọ́n tẹlẹ wẹ e yọnbasi nado mọ to fie n’nọ nọ̀?

  • Etẹ plọn wẹ n’te todin to wehọmẹ he na gọalọna mi nado mọ azọ́n to nukọn mẹ?

  • Wepinplọn wunmẹ devo tẹlẹ wẹ tin he na gọalọna mi nado yawu jẹ yanwle ṣie lẹ kọ̀n?

Flindọ yanwle he wutu a do to weplọn wẹ nado tindo gbedewema de he a sọgan yí do mọ azọ́n. Enẹwutu, dapana wazẹjlẹgo bo ma lẹzun mẹhe nọ to wehọmẹ yì plùlù madoalọte blo—taidi mẹhe masọ jlo na “jẹte sọn pinpán he e do mẹ” ba, na e ma jlo na didá azọngban sinsinyẹn mẹhowhe tọn lẹ wutu.