Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Nawẹ N’Sọgan Nọ Jijọho mẹ hẹ Mẹjitọ Ṣie lẹ Gbọn?

Nawẹ N’Sọgan Nọ Jijọho mẹ hẹ Mẹjitọ Ṣie lẹ Gbọn?

 Tẹnpọn kleun de

  • To otọ́ towe po onọ̀ towe po mẹ, mẹnu wẹ a nọ saba tindo gbemanọpọ hẹ?

    • Otọ́ towe

    • Onọ̀ towe

  • Nawẹ a nọ tindo gbemanọpọ hẹ mẹjitọ enẹ whẹwhẹ sọ?

    • E ma yá

    • To whedelẹnu

    • Whẹwhẹ

  • Obá tẹ mẹ wẹ gbemanọpọ lọ nọ sinyẹn jẹ?

    • Yè nọ yawu didẹ ẹ bo nọ dín jijọho.

    • Yè nọ didẹ ẹ amọ́ to whenue yè ko dọnnu taun godo.

    • Yè nọ dọnnu taun, ganṣo yè ma nọ didẹ gbemanọpọ lọ.

Eyin e nọ vẹawuna we nado nọ jijọho mẹ hẹ mẹjitọ towe lẹ, a sọgan nọ lẹndọ yewlẹ wẹ dona yí nude wà nado jla ninọmẹ lọ do. Ṣigba dile mí na mọ do, afọdide delẹ tin he hiẹ sọgan ze na gbemanọpọ lẹ ni ma do nọ wá aimẹ whẹwhẹ blo, podọ eyin gbemanọpọ lẹ tlẹ fọ́n, afọdide devo lẹ sọ tin he a sọgan ze ma nado hẹn nulẹ vantan. Tintan whẹ́, lẹnnupọndo onú ehelẹ ji . . .

 Nuhewutu gbemanọpọ do nọ fọ́n

  • Nugopipe nulẹnpọn tọn. Dile a to whinwhẹ́n, aliho he mẹ a nọ lẹnnupọn gando nulẹ go te nọ siso hugan lehe a nọ lẹnnupọn do to whenue a gbẹ́ yin yọpọvu. Humọ, a na nọ tindo nujikudo gando onú delẹ go, ehe mẹjitọ towe lẹ sọgan jẹagọdo delẹ to onú enẹlẹ mẹ. Ṣigba, Biblu dọmọ: “Gbògbéna otọ́ towe po onọ̀ towe po.”Eksọdusi 20:12.

    Nugbo gbẹ̀mẹ tọn: E nọ biọ zinzin nado jẹagọdo linlẹn mẹde tọn, ganṣo bo ma hẹn nuhahun wá.

  • Mẹdekannujẹ. Dile a to whinwhẹ́n, ayihaawe ma tin dọ mẹjitọ towe lẹ na na we mẹdekannujẹ susu dogọ. Ṣigba nuhahun lọ die: a sọgan mọdọ yé dona na emi mẹdekannujẹ hugan mọ kavi yé ma nọ yawu na we mẹdekannujẹ; ninọmẹ enẹ sọgan hẹn gbemanọpọ wá. Ṣigba, Biblu dọmọ: “Mì nọ setonuna mẹjitọ mìtọn lẹ.”Efesunu lẹ 6:1.

    Nugbo gbẹ̀mẹ tọn: To paa mẹ, mẹjitọ lẹ nọ whleawu nado na mẹdekannujẹ ovi de dogọ eyin yé doayi e go dọ ovi lọ to dehe yé ko na ẹn lọ ṣì zan.

 Nuhe a sọgan wà

  • Yí adà towe wà. Kakati nado nọ ze owhẹ̀ lọ blebu do mẹjitọ towe lẹ ji, nọ lẹnnupọndo nuhe hiẹ sọgan wà nado nọ jijọho mẹ hẹ mẹjitọ towe lẹ ji. Dẹpẹ de he nọ yin Jeffrey dọ dọ, “To whedelẹnu, nuhe nọ zọ́n bọ nulẹ nọ vantan to whenue gbemanọpọ de fọ́n ma nọ yin nuhe mẹjitọ towe lẹ dọ, amọ́ lehe hiẹ yinuwa do. Ogbè fifá yíyí do dọho nọ gọalọ taun ma nado hẹn ninọmẹ lọ vantan.”

    Biblu dọmọ: “Dile penugo do, mì nọ nọ̀ jijọho mẹ.”Lomunu lẹ 12: 18.

  • Nọ dotoai. Samantha, mẹhe tindo owhe 17 dọ dọ, “N’mọdọ todidoai wẹ yin nuhe vẹawu hugan lọ. Amọ́, n’ko sọ doayi e go dọ eyin mẹjitọ towe lẹ mọdọ a to dotoaina yé, e yọnbasi dọ yelọsu ni dotoaina we.”

    Biblu dọmọ: “Nọ yawu nado sè, whleawu nado dọho.”Jakọbu 1:19.

    Gbemanọpọ lẹ taidi miyọ́n—eyin yè ma yawu yinuwa, e sọgan gbọn filẹpo bọ e na vẹawu nado ṣí i

  • Nọ dapana nudindọn hẹ mẹjitọ towe lẹ. Eyin gbemanọpọ de fọ́n, kakati nado jẹ nudọn hẹ mẹjitọ towe lẹ ji, pọngbọ mimọ na gbemanọpọ lọ wẹ dona yin yanwle towe. Dẹpẹ de he nọ yin Adam dọmọ: “To whenue gbemanọpọ de fọ́n to mẹjitọ lẹ po ovi aflanmẹ yetọn de po ṣẹnṣẹn, nuhe mẹjitọ lẹ pọnhlan taidi nuhe yọ́n hugan wẹ yé nọ jlo na ovi lọ, podọ nuhe ovi lọ pọnhlan taidi nuhe yọ́n hugan na emi wẹ ewọ nọ jlo. To linlẹn de mẹ, ehe dohia dọ yé to vivẹnudo na yanwle dopolọ.”

    Biblu dọmọ: “Doafọna nuhe nọ hẹn jijọho wá lẹ.”Lomunu lẹ 14:19.

  • Nọ ze dewe do otẹn yetọn mẹ. Sarah he yin jọja aflanmẹ de dọmọ: “Nuhe nọ gọalọna mi wẹ nado nọ flindọ mẹjitọ lẹ lọsu tindo nuhahun sinsinyẹn lẹ he yé to pipehẹ, dile mílọsu to pipehẹ do.” Jọja aflanmẹ de he nọ yin Carla yidogọ dọmọ: “N’nọ tẹnpọn nado ze dee do mẹjitọ ṣie lẹ sin tẹnmẹ bo nọ kanse dee dọ, Eyin yẹn wẹ do ovi bo pehẹ ninọmẹ dopolọ, nawẹ n’na basi do? Etẹwẹ na yọ́n hugan na ovi ṣie to ninọmẹ enẹ nkọ mẹ?”

    Biblu dọmọ: ‘Ma nọ ze nukun do ale dewetiti tọn he yin onú towe titi lẹ tọn kẹdẹ ji blo, ṣigba do ale nuhe yin mẹdevo lẹ tọn ji ga.’Filippinu lẹ 2:4.

  • Nọ setonu. To popolẹpo mẹ, nuhe Biblu biọ to asi we dọ a ni wà niyẹn. (Kọlọsinu lẹ 3:20) Podọ nulẹ na pọnte na we taun eyin a nọ setonu. Yọnnu jọja de he nọ yin Karen dọmọ: “Nuhahun ṣie lẹ nọ depò taun eyin n’gbẹ́ setonuna nuhe mẹjitọ ṣie lẹ biọ to asi e. Yé ko sanvọ́ nususu tọn do ota ṣie mẹ, enẹwutu nuhe whè hugan bọ n’sọgan wà wẹ nado setonuna yé.” Tonusise yin dopo to nuhe nọ glọnalina gbemanọpọ susu lẹ mẹ!

    Biblu dọmọ: “Fie nake de ma tin te wẹ miyọ́n nọ ṣí te.”Howhinwhẹn lẹ 26:20.

Ayinamẹ. Eyin e nọ vẹawuna we nado dọho hẹ mẹjitọ towe lẹ, tẹnpọn nado kàn linlẹn towe lẹ do owe de mẹ kavi do alokan kavi nuyizan mọnkọtọn devo de ji. Jọja aflanmẹ de he nọ yin Alyssa dọmọ: “N’nọ wàmọ to whenue n’ mọdọ ninọmẹ he mẹ n’te sọgan zọ́n bọ na ṣì hodọ. Ehe nọ gọalọna mi ma nado dawhá do dọho kavi ma nado dọ nude he na wá vẹna mi to godo mẹ.”

Plọnnu Dogọ

Naegbọn Mẹjitọ Ṣie lẹ Ma Nọ Dike Ma Deayidai Gbede?

Ma fìn yì ayidedai lọ tẹnmẹ ya, kavi ma dọ nugbo na mẹjitọ ṣie lẹ?