Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Nawẹ N’Sọgan Duto Homẹgble Ji Gbọn?

Nawẹ N’Sọgan Duto Homẹgble Ji Gbọn?

 Tẹnpọn kleun de

  • Nawẹ a nọ gblehomẹ sù sọ?

    • e ma yá paali

    • to whedelẹnu

    • to azán lẹpo ji

  • Obá tẹ mẹ wẹ homẹgble towe nọ sinyẹn jẹ?

    • nọ to jlẹkaji

    • nọ sinyẹn

    • nọ sinyẹn taun

  • Mẹnu go wẹ a nọ yawu gblehomẹ do?

    • mẹjitọ towe de

    • nọvi towe de

    • họntọn towe de

Eyin a mọdọ a dona nọ duto homẹgble ji, hosọ ehe na gọalọna we! Tintan, lẹnnupọndo whẹwhinwhẹ́n delẹ ji he wutu e do yin nujọnu dọ a ni duto dewe ji to whenue mẹde hẹn we gblehomẹ.

 Nuhewutu a dona lẹnnupọndo whẹho ehe ji

Dagbemẹninọ towe. Howhinwhẹn lẹ 14:30 dọmọ: “Ayiha zinzin glegle wẹ ogbẹ̀ agbasa tọn.” To alọ devo mẹ, linlinwe de dọmọ: “Homẹgble sọgan zọ́n bọ mẹde na bẹ ahunzọ̀n.” (Journal of Medicine and Life)

Họntọn towe lẹ. Biblu dọmọ: “A jihọntọn hẹ gbẹtọ homẹgblenọ blo; a sọ zọnhẹ gbẹtọ homẹkadakadanọ blo.” (Howhinwhẹn lẹ 22:24) Enẹwutu, eyin a nọ yawu gblehomẹ, ni ma paṣa we blo dọ gbẹtọ lẹ na nọ họ̀nna we. Viyọnnu jọja de he nọ yin Jasmine dọmọ: “Eyin a ma nọ duto homẹgble ji, họntọnjiji dagbe lẹ na gbọ̀ gowe.”

Yinkọ dagbe towe. Ethan he tindo owhe 17 dọmọ: “Eyin a nọ yawu gblehomẹ, mẹsusu lẹ wẹ na yọnẹn, podọ enẹ na yinuwado nukun he yé na nọ yí do pọ́n we ji.” Kanse dewe dọ, ‘Be n’jlo dọ gbẹtọ lẹ ni yọ́n mi taidi gbẹtọ fifá he nọ dín jijọho ya kavi taidi gbẹtọ fifiẹtọ de?’ Biblu dọmọ: ‘Ewọ he whleawu nado gblehomẹ, wẹ nuyọnẹn daho tọn, ṣigba ewọ he nọ yawu gblehomẹ ze nulú daga.’Howhinwhẹn lẹ 14:29.

Mẹde ma nọ jlo na nọpọ́ hẹ mẹhe nọ gblehomẹ bo nọ jẹ adán

 Nuhe a sọgan wà

Lẹnnupọndo wefọ po zẹẹmẹ he bọdego ehelẹ po ji, bo kàn kanbiọ he zọnpọ hẹ yé lẹ sè dewe.

  • Howhinwhẹn lẹ 29:22: “Gbẹtọ homẹgbletọ ze avùn daga, gbẹtọ adinọ sù to ylanwa mẹ.”

    “To whenue n’tin to aflanmẹ, e nọ vẹawuna mi taun nado duto homẹgble ji. Hẹnnumẹ otọ́ ṣie tọn lẹpo wẹ tindo nuhahun dopolọ. Mí nọ dọ dọ ohùn mẹ wẹ e te na mí. E nọ vẹawuna mí taun nado duto homẹgble ji!—Kerri.

    Be n’nọ yawu gblehomẹ wẹ ya? Eyin n’nọ dọ dọ vivẹnu wẹ n’do bo do tindo jẹhẹnu dagbe he n’nọ dohia lẹ, be e sọgbe hẹ lẹnpọn dagbe nado nọ dọ dọ ohùn mẹ wẹ homẹgble te na mi ya?

  • Howhinwhẹn lẹ 15:1: “Hogbe dẹẹdẹ nọ lẹ́ homẹgble sẹ̀: Ṣigba ohó sinsinyẹn wẹ nọ fọ́n homẹgble daga.”

    “Pinplọn nado nọ duto numọtolanmẹ towe lẹ ji wẹ na gọalọna we. Eyin a plọn nado lẹzun gbẹtọ walọmimiọnnọ bo nọ ze ayiha towe do nudagbe lẹ ji, a ma na nọ yawu gblehomẹ.”—Daryl.

    To whenue mẹde hẹn mi homẹgble, naegbọn onú tintan he n’na gblọn do yin nujọnu taun?

  • Howhinwhẹn lẹ 26:20: “Fie nake de ma tin te wẹ miyọ́n nọ ṣí te.”

    “To whenue n’gblọnho to aliho he jọmẹ mẹ, ehe nọ fahomẹ na omẹ awetọ lọ bọ mí omẹ awe lẹ nọ penugo nado dọhodopọ matin homẹgble.”—Jasmine

    Nawẹ hodidọ ṣie kavi nuyiwa ṣie sọgan hẹn homẹgble sinyẹn deji gbọn?

  • Howhinwhẹn lẹ 22:3: “Omẹ zinzin ko mọ oylan dohlan nukọn, bo yí ede whlá; ṣigba wunvinọ lẹ juwayi, yè sọ sayahẹ yé.”

    “To whedelẹnu, e nọ biọ poun dọ n’ma yì disa bo yí whenu do lẹnnupọndo nuhe jọ lọ ji. Enẹgodo, n’sọgan wá dọhodo whẹho lọ ji to whenue homẹgble lọ ko tlọ́n jie godo.”—Gary.

    To whenue ninọmẹ homẹgble tọn de fọ́n, whetẹnu wẹ e na yọ́n hugan dọ dopo to omẹ awe lọ lẹ mẹ ni tọ́n sọn finẹ whẹ́ bọ omẹ awetọ ma na lẹndọ e dovọ́na emi?

  • Jakọbu 3:2: “Mímẹpo wẹ nọ dahli whlasusu.”

    “Nuṣiwa mítọn lẹ dona nọ vẹna mí, amọ́ mí sọ dona nọ plọnnu sọn yé mẹ. To whenue mí jai, mí dona yawu fọnṣite bo magbe ma nado vọ́ ai dopolọ jẹ to whedevonu.”—Kerri.

Ayinamẹ: Ze yanwle de dai. Magbe nado fahomẹ na ojlẹ de—vlavo na osun dopo. Basi kandai nukọnyiyi towe tọn.