Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Nawẹ N’Sọgan Doakọnnanu Gbọn to Whenue Adán Sinsinyẹn de Gbò Mi?

Nawẹ N’Sọgan Doakọnnanu Gbọn to Whenue Adán Sinsinyẹn de Gbò Mi?

Mímẹpo wẹ adán sọgan gbò. Biblu dọmọ: “Alewezun ma yin awuyatọ tọn, awhàn ma yin huhlọntọ tọn,” na “ojlẹ po kosọ po mẹ wẹ onú te na omẹ popo.” (Yẹwhehodọtọ 9:11) Hogbe ehelẹ gando jọja he adán ko gbò delẹ go ga. Nawẹ yé doakọnna ninọmẹ lọ gbọn? Lẹnnupọndo apajlẹ jọja awe ehelẹ tọn ji.

 REBEKAH

Owhe 14 wẹ n’tindo to whenue otọ́ ṣie gbẹ́ onọ̀ ṣie.

N’nọ lẹn to dee mẹ dọ yé ma gbẹ́ yede, dọ papa na yì lẹnnupọn na whenu pẹẹde bo nasọ lẹkọwa. E yiwanna mama, e ma gán jo e do, podọ e ma gán jo yẹnlọsu do.

E vẹawuna mi nado dọ adán he to gbigbò mi lọ na mẹde. N’nọ jlo na de ayiha sọn e ji. To ojlẹ lọ mẹ, n’ma doayi e go dọ ninọmẹ lọ nọ hẹn mi gblehomẹ. E hẹn magbọjẹ wá na mi bọ n’masọ nọ mọ amlọndọ ba.

Whenue n’tindo owhe 19, kansẹẹ-zọ̀n hù onọ̀ ṣie. Ewọ wẹ yin họntọn he vẹ́ na mi hugan.

Gbẹdai otọ́ ṣie tọn ko hẹn awugble na mi whẹ́ bọ okú onọ̀ ṣie tọn sọ vọ́ hẹn ninọmẹ lọ vantan. Ninọmẹ lọ gbẹ́ to dindan mi. Amlọndidọ wá glo mi. Magbọjẹ lọ gbẹ́ pò to ji e.

Etomọṣo, nudelẹ nọ gọalọna mi. Di apajlẹ, Howhinwhẹn lẹ 18:1 dọ dọ mí ni ma klan míde dovo blo. N’nọ tẹnpọn nado hodo ayinamẹ enẹ.

Podọ na n’yin Kunnudetọ Jehovah tọn wutu, n’nọ dovivẹnu nado hia owe sinai do Biblu ji mítọn he nọ namẹ tuli lẹ. Owe he gọalọna mi to ojlẹ he mẹ mẹjitọ ṣie lẹ basi gbẹdai te wẹ Les jeunes s’interrogent—Réponses pratiques. N’flindọ n’hia weta titengbe de to Bladopọ 2tọ mẹ, hosọ etọn wẹ “Puis-je être heureux dans une famille monoparentale?” (Be N’Sọgan Tindo Ayajẹ to whẹndo Godoponọ de mẹ Ya?)

Dopo to wefọ Owe-wiwe tọn lẹ mẹ he nọ gọalọna mi taun nado doakọnna magbọjẹ ṣie wẹ Matiu 6:25-34. To wefọ 27tọ mẹ, Jesu kanse dọ: “Mẹnu to mì mẹ wẹ sọgan gbọn magbọjẹnọ-yinyin dali yí awagbà dopo dogọ tedidi gbẹzan etọn tọn?”

Mímẹpo go wẹ nuylankan nọ jọ do, ṣigba nuhe jọ do onọ̀ ṣie go plọn mi dọ aliho he mẹ mí nọ yinuwa te to whenue adán gbò mí yin nujọnu. Nususu mẹ wẹ e jugbọn: gbẹdai podọ azọ̀n jẹmagbọ de. Ṣigba to ninọmẹ ehe lẹpo mẹ, e hẹn pọndohlan dagbe de go bo hẹn yise etọn to Jiwheyẹwhe mẹ go kakajẹ vivọnu. N’ma na wọn nuhe e plọn mi gando Jehovah go lẹ gbede.

Lẹnnupọndeji: Nawẹ Biblu po owe sinai do Biblu ji lẹ po hihia sọgan gọalọna we gbọn to whenue adán gbò we?Psalm 94:19

 CORDELL

Whenue n’tindo owhe 17 wẹ otọ́ ṣie kú to nukun ṣie mẹ. Okú etọn wẹ yin nuhe vẹawuna mi hugan to gbẹzan ṣie mẹ. N’jẹflumẹ pete.

N’to didọna dee dọ e ma ko kú. Podọ to whenue yé ṣinyọ́n avọ̀ do oṣiọ lọ, n’lẹndọ e ma yin baba ṣie wẹ. N’gbẹ́ nọ dọna dee dọ, ‘E na fọ́n to osọ.’ N’mọdọ nude masọ pò na mi ba.

Yẹn po whẹndo ṣie po yin Kunnudetọ Jehovah tọn, podọ agun mítọn gọalọ taun to whenue otọ́ ṣie kú. Yé nọ na núdùdù mí, nọ nọpọ́ hẹ mí bo vẹ́ po mí po taun. Yé penukundo mí go na ojlẹ dindẹn. Lehe yé nọgodona mí do dohia mi dọ Klistiani nugbo wẹ Kunnudetọ Jehovah tọn lẹ yin.Johanu 13:35

Wefọ he gọalọna mi taun wẹ 2 Kọlintinu lẹ 4:17, 18. Wefọ lọ dọmọ: “Dile etlẹ yindọ ojlẹ gli wẹ homẹkẹn tin na bosọ fua, gigo he pinpẹn etọn ma yọnjlẹ mẹ wẹ e nọ dekọtọn do na mí bosọ yin madopodo; dile mí ze nukun mítọn lẹ, e ma yin do nuhe nọ yin mimọ lẹ ji, ṣigba do nuhe ma nọ yin mimọ lẹ ji. Na nuhe nọ yin mimọ lẹ yin ojlẹ gli tọn, ṣigba nuhe ma nọ yin mimọ lẹ yin madopodo tọn.”

Wefọ godo tọn ehe yinuwado ji e taun. Yajiji otọ́ ṣie tọn yin ojlẹ gli tọn, ṣigba opagbe Jiwheyẹwhe tọn na sọgodo yin madopodo. Okú baba ṣie tọn zọ́n bọ n’lẹnnupọndo lehe n’to ogbẹ̀ ṣie zan do ji bo ze yanwle dagbe lẹ donukọnna dee.

Lẹnnupọndeji: Nawẹ adángbòmẹ de sọgan zọ́n bọ a na vọ́ nulẹnpọn do gbẹzan towe ji bo ze yanwle dagbe lẹ donukọnna dewe gbọn?1 Johanu 2:17.

Awagbà yin nujlẹnu tedidi tọn de he dite sọ nudi centimètres 45.

Plọnnu Dogọ