Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

KANBIỌ HE JỌJA LẸ NỌ KANSE

Be Awusọhia Ṣie Nọ Duahunmẹna Mi Zẹjlẹgo Wẹ Ya?

Be Awusọhia Ṣie Nọ Duahunmẹna Mi Zẹjlẹgo Wẹ Ya?

  Tẹnpọn kleun de: Be awusọhia ṣie nọ duahunmẹna mi zẹjlẹgo wẹ ya?

  1. Detẹ to hodidọ ehelẹ mẹ wẹ sọgbe hugan hẹ nuhe a nọ lẹn?

    • Homẹ ma nọ hùn mi do awusọhia ṣie go gbede.

    • Homẹ nọ hùn mi do awusọhia ṣie go to whedelẹnu.

    • Homẹ nọ hùn mi do awusọhia ṣie go to whelẹponu.

  2. Etẹwẹ a na jlo hugan nado diọ to agbasa towe go?

    • Tedidi

    • Zínpinpẹn

    • Awusọhia

    • Oda

    • Sinmẹ agbasa towe tọn

    • Titli towe

    • Nudevo

  3. Kàn nuhe pò to hodidọ ehe mẹ.

    N’ma nọ saba voawu gando awusọhia ṣie go to . . .

    • whenue n’hẹ nujlẹgàn de ji nado jlẹ zínpinpẹn ṣie pọ́n.

    • whenue n’pọ́n dee to mẹpọ́nnu mẹ.

    • whenue n’yí dee jlẹdo mẹdevo lẹ go (họntọn lẹ, mẹhe nọ basi ajọjijla nusisọ́ tọn lẹ, omẹ nukundeji sinima tọn lẹ).

  4. Kàn nuhe pò to hodidọ ehe mẹ.

    N’nọ jlẹ zínpinpẹn ṣie pọ́n . . .

    • egbesọegbesọ.

    • to sẹmẹsẹmẹ.

    • Dopo vlavo to osẹ dopo mẹ.

  5. Hodidọ tẹwẹ basi zẹẹmẹ numọtolanmẹ towe lẹ tọn hugan?

    • Awusọhia ṣie ma nọ yọ́n to nukun ṣie mẹ. (Apajlẹ: “Whedepopenu he n’pọ́n mẹpọ́nnu mẹ, n’nọ mọdọ n’klo zẹjlẹgo bo ylankan taun. N’tlẹ jẹ huvẹ do na dee ji nado gbẹ́ depò pẹẹde.”—Serena.)

    • Awusọhia ṣie yọ́n na mi domọ. (Apajlẹ: “Nudepope na tin to awusọhia mítọn go janwẹ he mí ma na yiwanna bo ka to dandannu glọ nado yí domọ. Nulunu wẹ e yin nado do magbọjẹ na míde gando nude he mí ma gán diọ go.”—Natanya.)

Biblu dọna mí dọ mí ni ma nọ lẹn míde tọn glanglan “hú lehe e jẹ nado nọ lẹn do” blo. (Lomunu lẹ 12:3) Enẹwutu, e sọgbe—bo tlẹ jẹ—nado nọ lẹn dewe tọn pọ́n jẹ obá de mẹ. Di apajlẹ, enẹ wẹ zọ́n bọ mí nọ klọ nùmẹ bosọ nọ tẹnpọn nado nọ wiweji.

Ṣigba, eyin a nọ jẹflumẹ whẹwhẹ na lehe awusọhia towe te wutu, sọmọ bọ e wá lẹzun ahunmẹdunamẹnu towe tintan, etẹwẹ a na wà? Eyin e jẹ mọ, a sọgan kanse dewe dọ . . .

  ‘Naegbọn awusọhia ṣie ma nọ yọ́n to nukun ṣie mẹ?’

Whẹwhinwhẹ́n lọ lẹ sọgan sù. Delẹ to yé mẹ wẹ:

  • Nuhe linlinnamẹnu lẹ nọ zedonukọnnamẹ lẹ. “Yẹdide susugege he nọ yin zizedonukọnna míwu jọja lẹ nọ hẹn mí nado mọdọ mí dona whèsin taun bo nọ yọ́npọ́n to whelẹponu. Enẹ zọ́n bọ eyin mí ma yọnwhanpẹ dole mí na ko jlo do, mí nọ gbẹwanna awusọhia míde tọn!”—Kellie.

  • Apajlẹ he mẹjitọ lẹ zedai. “N’doayi e go dọ eyin onọ̀ de nọ na ayidonugo awusọhia etọn zẹjlẹgo, nudopolọ wẹ viyọnnu etọn nọ saba wà. Mọdopolọ wẹ e nọ yindo to otọ́ lẹ po visunnu yetọn lẹ po ṣẹnṣẹn.”—Rita.

  • Numọtolanmẹ nuvọ́nọ-yinyin tọn. “Mẹhe awusọhia yetọn titi nọ duahunmẹna zẹjlẹgo lẹ nọ to nukundo to whelẹponu dọ mẹdevo lẹ ni pà whanpẹ yetọn. Apọ̀ janwẹ na do we eyin a nọ nọpọ́ hẹ omẹ mọnkọtọn de!”—Jeanne.

Depope he whẹwhinwhẹ́n lọ yin, a sọgan nọ kanse dewe dọ . . .

  ‘Be n’dona diọ nude to awusọhia ṣie go wẹ ya?’

Lẹnnupọndo nuhe ogbẹ́ towe delẹ dọ ji.

“A ma gán diọ nuhe a ma yiwanna to dewe go lẹpo, enẹwutu nuhe yọ́n hugan wẹ nado yigbena nuhe jẹdò to gowe lẹ. Eyin a wàmọ, e yọnbasi dọ mẹdevo lẹ tlẹ sọgan nọma doayi yé go.”—Rori.

“Wà nuhe go a pé nado tindo agbasalilo dagbe. Eyin a to ganji to agbasa mẹ, awusọhia towe na nọ to lehe e jẹ dọ ni nọ. Eyin mẹde ma gán yí we dole a te do (bọ awusọhia towe wẹ nọ duahunmẹna ẹn), be omẹ enẹ ma yin họntọn towe.”—Olivia.

Nuagokun lọ die: Wà nuhe go a pé nado yọ́npọ́n jẹ obá he mẹ e yọnbasi jẹ. Amọ́, ma nọ hanú gando nuhe pò lẹ go blo. Nuhiha zẹjlẹgo gando awusọhia towe go sọgan hẹn nuhahun sinsinyẹn lẹ wá. (Pọ́n “ Otàn Julia Tọn.”)

To alọ devo mẹ, pọndohlan jlẹkaji tọn tintindo na gọalọna we nado nọ pọ́n dewe hlan to aliho he sọgbe mẹ, dile viyọnnu aflanmẹ de he nọ yin Erin wá mọnukunnujẹemẹ do. E dọmọ: “Nugbo wẹ dọ nudelẹ to awusọhia ṣie go he ma nọ hẹn mi voawu, amọ́ n’doayi e go dọ whenue n’ze ayiha do nuhe jẹdò lọ lẹ ji janwẹ n’nọ do numọtolanmẹ enẹ. Todin, n’gbọ bo nọ daihun lanmẹyiya tọn whẹwhẹ bo nọ dùnú ganji. Bọ nuhe pò lẹ nọ yì dole e jẹ do.”

  Vọjlado he yọ́n hugan lọ!

Eyin a tindo pọndohlan jlẹkaji tọn gando awusọhia towe go, a na vò to ayiha mẹ bọ awusọhia towe lọsu na tlẹ sọ yọ́npọ́n. Biblu sọgan gọalọ. E na mí tuli nado wleawuna jẹhẹnu he bọdego ehelẹ:

  • Pekọ. “E pọnte nado duvivi nuhe mí tindo tọn hú nado to nujlo, na enẹ ma yin nudevo de hú wezundido to jẹhọn godo.”—Yẹwhehodọtọ 6:9, Contemporary English Version.

  • Pọndohlan he sọgbe gando aihundida lanmẹyiya tọn go. “Agbasa yiyizan yin alenu na onú vude.”—1 Timoti 4:8.

  • Whanpẹ homẹ tọn. “Nuhe sọawuhia to nukunta wẹ gbẹtọ nọ pọ́n, amọ́ ahun mẹ wẹ Jehovah nọ pọ́n.”—1 Samuẹli 16:7.

“Nukunmẹ mítọn nọ do nuhe mí nọ lẹn gando míde go hia. Eyin mẹde tindo ayajẹ, mẹdevo lẹ nọ doayi e go bo nọ jlo to jọwamọ-liho nado dọnsẹpọ ẹ.”—Sarah.

“Whanpẹ sọgan yawu dọ̀n ayidonugo. Amọ́, nuhe mẹlẹ na nọ flin gando gowe hugan wẹ nuhe a yin to homẹ po jẹhẹnu dagbe he a tindo lẹ po.”—Phylicia.

Sọ pọ́n Howhinwhẹn lẹ 11:22; Kolosinu lẹ 3:10, 12; 1 Pita 3:3, 4.