Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Ylando Tẹwẹ Ma Tindo Jona?

Ylando Tẹwẹ Ma Tindo Jona?

Gblọndo Biblu Tọn

Ylando he ma tindo jona bẹ walọyizan delẹ hẹn he nọ zọnpọ hẹ ayilinlẹn de he nọ glọnalina ylanwatọ lọ ma nado mọ jonamẹ Jiwheyẹwhe tọn yí gbede. Nawẹ nuyiwa mẹde tọn sọgan yinukọn jẹ obá enẹ mẹ gbọn?

Jiwheyẹwhe nọ jona mẹhe lẹnvọjọ sọn ylando yetọn mẹ bo nọ yìn osẹ́n etọn lẹ to gbẹzan yetọn mẹ bosọ nọ do yise hia to Jesu Klisti mẹ lẹ. (Owalọ lẹ 3:19, 20) Ṣigba, mẹde sọgan wá peve to walọyizan ylankan de mẹ sọmọ bọ walọ etọn kavi gbigbọ he e nọ dohia ma na diọ pọ́n gbede ba. Biblu basi zẹẹmẹ dọ omẹ mọnkọtọn tindo “ahun ylankan” bọ ‘huhlọn mẹkiklọ tọn ylando tọn ko hẹn ahun etọn sinyẹn.’ (Heblu lẹ 3:12, 13) Kẹdẹdi okò he yè mẹ̀ to miyọ́n mẹ bọ e ko hú bo ma sọgan yin wunmẹdiọna ba, ahun mẹlọ tọn ko lilẹ́ sọta Jiwheyẹwhe petepete. (Isaia 45:9) Na dodonu depope ma gán sọ tin he ji omẹ enẹ na yin jijona te wutu, e ko hùwhẹ ylando he ma tindo jona tọn.Heblu lẹ 10:26, 27.

To azán Jesu tọn gbè, delẹ to sinsẹ̀ngán Ju lẹ mẹ waylando he ma tindo jona. Yé yọnẹn ganji dọ gbigbọ wiwe Jiwheyẹwhe tọn wẹ hẹn Jesu penugo nado wà azọ́njiawu lẹ, ṣogan yé gbọn kanyinylan dali dọ dọ Satani Lẹgba dè wẹ e mọ huhlọn yí sọn.Malku 3:22, 28-30.

Apajlẹ ylando he sọgan yin jijona lẹ tọn

  • Nùzinzan gbọn wunvi dali. Apọsteli Paulu lọsu ko yin nùzantọ pọ́n, ṣigba e wá dọ to nukọn mẹ dọmọ: “Lẹblanu yin didohia mi, na wunvi po yise matindo po mẹ wẹ yẹn yinuwa te wutu.”1 Timoti 1:13.

  • Ayọdide. Biblu dọho gando mẹdelẹ go he jai jẹ ylando ayọdide tọn mẹ wayi, ṣigba yé wá diọ jijọ yetọn bọ Jiwheyẹwhe jona yé.1 Kọlintinu lẹ 6:9-11.

“Be n’ko waylando he ma tindo jona de wẹ ya?”

Eyin ylando he a ko wà wayi lọ vẹna we todin sinsinyẹn bọ a jlo nugbonugbo nado diọ jijọ, e dohia dọ a ma ko waylando he ma tindo jona. Eyin a tlẹ jai jẹ nuṣiwa dopolọ mẹ pludopludo, Jiwheyẹwhe sọgan jona we eyin a ma ko gbẹ́ hẹn ahun towe sinyẹn petepete sọta ẹ.Howhinwhẹn lẹ 24:16.

Mẹdelẹ nọ lẹndọ emi na ko waylando de he ma tindo jona, na numọtolanmẹ whẹhuhu tọn nọ to tuklado yé mapote wutu. Ṣigba, Biblu plọn mí dọ mí ma sọgan dejido numọtolanmẹ mítọn lẹ go to whepoponu. (Jelemia 17:9) Jiwheyẹwhe ma na mí aṣẹ lọ nado dawhẹna mẹdepope, etlẹ yin na mídetiti. (Lomunu lẹ 14:4, 12) Ewọ sọgan jona mí etlẹ yin to whenue ahun mítọn titi gbẹ́ to whẹgbledo mí.1 Johanu 3:19, 20.

Be ylando he ma tindo jona de wẹ Juda Iskaliọti wà ya?

Mọwẹ. Nukunkẹn sisẹ́ ẹ nado fìn akuẹ he ko yin nina do sinsẹ̀nzọn wiwe lọ tamẹ. E tlẹ dọho to ojlẹ de mẹ taidi mẹhe to awuvẹ wamọnọ lẹ, amọ́ na nugbo tọn, edetiti tọn mẹ ví do wẹ e te na e nido mọ akuẹ susu dogọ nado fìn. (Johanu 12:4-8) Whenue ahun Juda tọn wá peve to nuylankan wiwà mẹ petepete, e de Jesu hia nado mọ fataka-kuẹ 30 yí. Jesu yọnẹn dọ Juda ma gán lẹnvọjọ gbede sọn nuṣiwa etọn mẹ, abajọ e do ylọ ẹ dọ “visunnu vasudo tọn lọ.” (Johanu 17:12) Ehe zẹẹmẹdo dọ whenue Juda kú, e yin vivasudo kakadoi, bọ todido fọnsọnku tọn de ma tin na ẹn.Malku 14:21.

Juda ma lẹnvọjọ nugbonugbo sọn ylando he e wà mẹ. Kakati nado lẹhlan Jiwheyẹwhe bo yigbe nuṣiwa etọn tọn, nukọntọ sinsẹ̀n tọn he po e po blasé lẹ dè wẹ e lẹhlan.Matiu 27:3-5; 2 Kọlintinu lẹ 7:10.