Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Be Nuplọnmẹ ‘Whlẹngán Whladopo, Whlẹngán Kakadoi’ Tọn Sọgbe hẹ Biblu Ya?

Be Nuplọnmẹ ‘Whlẹngán Whladopo, Whlẹngán Kakadoi’ Tọn Sọgbe hẹ Biblu Ya?

Gblọndo Biblu Tọn

Lala, nuplọnmẹ ‘whlẹngán whladopo, whlẹngán kakadoi’ tọn ma sọgbe hẹ Biblu. Mẹde he ko mọ whlẹngán yí gbọn yise tintindo to Jesu Klisti mẹ dali sọgan gbẹ́ hẹn yise enẹ bu, bo ba whlẹngán he e nọ hẹnwa pò. Biblu dọ dọ eyin mẹde jlo na hẹn yise etọn go gligli, e dona “hoavùn sinsinyẹn” kavi dovivẹnu taun. (Juda 3, 5) Klistiani dowhenu tọn he ko kẹalọyi Klisti lẹ mọ ayinamẹ ehe yí dọmọ: “Mì nọ yí obu po sisọsisọ po do to azọ́nwa na whlẹngán mìtọn titi.”Filipinu lẹ 2:12.

Wefọ Biblu tọn delẹ he jẹagọdo nuplọnmẹ ‘whlẹngán whladopo, whlẹngán kakadoi’ tọn

  • Biblu na mí avase sọta ylando sinsinyẹn he sọgan glọnalina mẹde nado biọ Ahọluduta Jiwheyẹwhe tọn mẹ lẹ. (1 Kọlintinu lẹ 6:9-11; Galatianu lẹ 5:19-21) Eyin whlẹngán he mẹde mọyi ma sọgan sọ bu do e gbede ba dai wẹ, avase ehe nkọ lẹ ma na ko yin nina. Amọ́, Biblu dohia dọ e yọnbasi dọ mẹhe ko mọ whlẹngán yí de ni danbú bo jai jẹ ylando sinsinyẹn de mẹ. Di apajlẹ, Heblu lẹ 10:26 dọmọ: “Eyin mí nọ hẹn ylando zun aṣa sọn ojlo mẹ wá to whenue mí ko mọ oyọnẹn he pegan nugbo lọ tọn yí godo, avọ́sinsan devo depope ma pò na ylando mítọn lẹ ba.”Heblu lẹ 10:26; 6:4-6; 2 Pita 2:20-22.

  • Nado zinnudeji dọ yise mẹtọn go hinhẹn gligli yin nujọnu, Jesu na apajlẹ de he mẹ e yí ede jlẹdo vẹntin de go te bosọ yí hodotọ etọn lẹ jlẹdo alà vẹntin lọ tọn lẹ go. Delẹ to hodotọ etọn lẹ mẹ na do yise hia to ewọ mẹ to ojlẹ de mẹ gbọn sinsẹ́n kavi walọyizan yetọn lẹ dali, ṣogan bo na wá gboawupo nado wàmọ to nukọn mẹ bo na yin “didesẹ taidi alà [he ma de sinsẹ́n tọ́n] de,” bo gbọnmọ dali hẹn whlẹngán he yé ko mọyi lọ bu. (Johanu 15:1-6) Apọsteli Paulu lọsu yí apajlẹ mọnkọtọn de zan bo dọ dọ Klistiani he ma hẹn yise yetọn go gligli lẹ “na yin finfẹ́n sẹ̀.”Lomunu lẹ 11:17-22.

  • Klistiani lẹ yin gbedena nado nọ “gbọṣi nukle.” (Matiu 24:42; 25:13) Mẹhe damlọn to gbigbọ-liho lẹ, vlavo na yé nọ wà “azọ́n he yin zinvlu tọn lẹ” kavi ma nọ wà azọ́n he Jesu degbe etọn na yé lẹ to gigọ́ mẹ wutu, na ba whlẹngán yetọn pò.Lomunu lẹ 13:11-13; Osọhia 3:1-3.

  • Wefọ susu wẹ dohia dọ mẹhe ko mọ whlẹngán yí lẹ dona gbẹ́ doakọnnanu po nugbonọ-yinyin po kakajẹ opodo. (Matiu 24:13; Heblu lẹ 10:36; 12:2, 3; Osọhia 2:10) Klistiani dowhenu tọn lẹ nọ jaya taun eyin yé sè dọ yisenọ hatọ yetọn lẹ to akọndonanu to yise mẹ. (1 Tẹsalonikanu lẹ 1:2, 3; 3 Johanu 3, 4) Eyin mẹhe ma tlẹ doakọnnanu lẹ na mọ whlẹngán yí domọ poun, be e na sọgbe hẹ lẹnpọn dagbe dọ Biblu ni zinnudo akọndonanu po nugbonọ-yinyin po ji sọmọ ya?

  • Okú apọsteli Paulu tọn ko sẹpọ pete whẹpo e do dọ dọ emi kudeji dọ e mi na mọ whlẹngán yí. (2 Timoti 4:6-8) To gbẹwhenu etọn, e mọnukunnujẹemẹ dọ e sọgan hẹn whlẹngán he e mọyi lọ bu eyin e jo ede na ojlo agbasalan tọn lẹ. E wlan dọmọ: “Yẹn nọ to nutun agbasa ṣie bo nọ hẹn ẹn di afanumẹ de, na to whenue yẹn ko dọyẹwheho na mẹdevo lẹ godo, yẹnlọsu ni ma yin gbigbẹdai to aliho de mẹ blo.”2 Timoti 4:6-8; 1 Kọlintinu lẹ 9:27; Filipinu lẹ 3:12-14.

Plọnnu Dogọ

Be Jiwheyẹwhe Na Jona Mi Ya?

Gbadopọnna nuhe Biblu dọ gando lehe mí sọgan mọ jonamẹ Jiwheyẹwhe tọn yí do go.

Be Kunnudetọ Jehovah Tọn lẹ Nọ Lẹndọ Yewlẹ Kẹdẹ Wẹ Na Mọ Whlẹngán Ya?

Biblu dọ mẹhe na tindo dotẹnmẹ hundote nado mọ whlẹngán lẹ.