Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Nawẹ N’Sọgan Mọ Sinsẹ̀n Nugbo lọ Gbọn?

Nawẹ N’Sọgan Mọ Sinsẹ̀n Nugbo lọ Gbọn?

Gblọndo Biblu Tọn

Biblu do lehe mí na yọ́n vogbingbọn to mẹhe to sinsẹ̀n nugbo basi po mẹhe ma to mọwà lẹ po ṣẹnṣẹn hia gbọn hogbe ehelẹ dali dọmọ: “Gbọn sinsẹ́n yetọn lẹ dali wẹ mì na yọ́n yé. Gbẹtọ lẹ ma nọ gbẹ̀n ovẹn sinsẹ́n to tẹwùn lẹ ji, kavi ovò sinsẹ́n to vẹwùn lẹ ji gbede gba, kavi e ma yin mọ wẹ?” (Matiu 7:16) Dile hiẹ sọgan yọ́n ovẹn sinsẹ́n dovo na tẹwùn gbọn sinsẹ́n yetọn dali do, mọ wẹ hiẹ sọgan yọ́n vogbingbọn to sinsẹ̀n nugbo po sinsẹ̀n lalo po ṣẹnṣẹn gbọn sinsẹ́n yetọn lẹ dali, kavi gbọn ohia he bọdego ehelẹ dali do niyẹn.

  1. Sinsẹ̀n nugbo nọ plọnmẹ nugbo he sinai do Biblu ji, e ma yin do tamẹnuplọnmẹ gbẹtọ tọn lẹ ji. (Johanu 4:24; 17:17) Ehe bẹ nugbo sinsẹ̀n tọn lẹ gando alindọn po todido ogbẹ̀ madopodo to paladisi aigba ji tọn po go hẹn. (Psalm 37:29; Isaia 35:5, 6; Ezekiẹli 18:4) E masọ nọ whleawu nado de nuplọnmẹ lalo sinsẹ̀n lẹ tọn gbà.Matiu 15:9; 23:27, 28.

  2. Sinsẹ̀n nugbo nọ gọalọna gbẹtọ lẹ nado yọ́n Jiwheyẹwhe, bosọ nọ plọn yé yinkọ etọn he yin Jehovah. (Psalm 83:18; Isaia 42:8; Johanu 17:3, 6) E ma nọ plọnmẹ dọ Jiwheyẹwhe dabla kavi dọ e ma yọ́n dọnsẹpọ gba. Kakatimọ, e nọ plọnmẹ dọ Jiwheyẹwhe jlo dọ mí ni jihọntọn hẹ emi.Jakọbu 4:8.

  3. Sinsẹ̀n nugbo nọ dohia dọ Jesu Klisti kẹdẹ gblamẹ wẹ gbẹtọ sọgan mọ whlẹngán sọn Jiwheyẹwhe dè. (Owalọ lẹ 4:10, 12) Hagbẹ sinsẹ̀n nugbo lọ tọn lẹ nọ setonuna gbedide Jesu tọn lẹ bo nọ dovivẹnu nado hodo apajlẹ etọn.Johanu 13:15; 15:14.

  4. Sinsẹ̀n nugbo nọ ganjẹ Ahọluduta Jiwheyẹwhe tọn go taidi todido dopo gee lọ na gbẹtọvi lẹ. Hagbẹ etọn lẹ nọ yí zohunhun do dọhona gbẹtọ lẹ gando Ahọluduta enẹ go.Matiu 10:7; 24:14.

  5. Sinsẹ̀n nugbo nọ namẹ tuli nado nọ do owanyi hia bo ma donukun ale depope. (Johanu 13:35) E nọ plọnmẹ nado nọ kẹalọyi gbẹtọ wunmẹ lẹpo bo ma hò akọ̀, ogbè kavi ninọmẹ yetọn pọ́n. (Owalọ lẹ 10:34, 35) Na hagbẹ etọn lẹ nọ do owanyi hia mẹlẹpo wutu, yé ma nọ doalọ to awhàn mẹ.Mika 4:3; 1 Johanu 3:11, 12.

  6. Sinsẹ̀n nugbo ma tindo nukọntọ he yè nọ suahọ de, podọ depope to hagbẹ etọn lẹ mẹ ma nọ tindo ogán-yinkọ de.Matiu 23:8-12; 1 Pita 5:2, 3.

  7. Sinsẹ̀n nugbo ma nọ doalọ depope to nuwiwa tonudidọ tọn lẹ mẹ. (Johanu 17:16; 18:36) Etomọṣo, hagbẹ etọn lẹ nọ na sisi osẹ́n otò he sin aṣẹpipa glọ yé tin te tọn bosọ nọ setonuna yé sọgbe hẹ gbedide Biblu tọn he dọmọ: “Mì yí onú he yin Sesali tọn lẹ na Sesali, ṣigba onú he yin Jiwheyẹwhe tọn lẹ na Jiwheyẹwhe.”Malku 12:17; Lomunu lẹ 13:1, 2.

  8. Sinsẹ̀n nugbo nọ họnwun to gbẹzan hagbẹ etọn lẹ tọn mẹ. Sinsẹ̀n nugbo ma yin nuwiwa aṣa tọn kavi onú mọmọ tọn de poun gba. Hagbẹ etọn lẹ nọ hodo nujinọtedo walọ dagbe tọn yiaga Biblu tọn lẹ to adà gbẹzan tọn lẹpo mẹ. (Efesunu lẹ 5:3-5; 1 Johanu 3:18) Kakati nado nọ to awubla, yé nọ mọ ayajẹ to “Jiwheyẹwhe ayajẹnọ lọ” sinsẹ̀n mẹ.1 Timoti 1:11.

  9. Mẹhe nọ basi sinsẹ̀n nugbo lẹ na yin omẹ vude. (Matiu 7:13, 14) Biblu dohia dọ gbẹtọ lẹ na yí nukunpẹvi do pọ́n hagbẹ sinsẹ̀n nugbo lọ tọn lẹ, ṣàn yé ko bo dohomẹkẹn yé na yé nọ wà ojlo Jiwheyẹwhe tọn wutu, podọ nuhe nọ jọ to paa mẹ niyẹn.Matiu 5:10-12.

Nado yọ́n sinsẹ̀n nugbo lọ ma zẹẹmẹdo nado mọ poun dọ ‘sinsẹ̀n ehe ko yọ́n na mi.’

Eyin mí dọ dọ sinsẹ̀n de yin nugbo na e yọ́n na mí poun wutu, owù tin to e mẹ. Biblu ko dọ dọdai dọ ojlẹ de ja bọ gbẹtọ lẹ na “bẹ mẹplọntọ [sinsẹ̀n tọn] lẹ pli lẹdo yede he na nọ dọ nuhe otó yetọn jlo na sè lẹ na yé.” (2 Timoti 4:3) To alọ devo mẹ, Biblu na tuli mí nado hodo “sinsẹ̀n he wé bo ma yin hinhẹnflu sọn pọndohlan Jiwheyẹwhe podọ Otọ́ mítọn tọn mẹ,” eyin sinsẹ̀n enẹ ma tlẹ yin sinsẹ̀n he mẹsusu yiwanna de.Jakọbu 1:27, nudọnamẹ odò tọn; Johanu 15:18, 19.