Gblọndo Biblu tọn

Biblu dopà dọ: “Mẹhe nọ wà ojlo Jiwheyẹwhe tọn . . . [na] nọgbẹ̀ kakadoi.” (1 Johanu 2:17, Mawuhowema Fọngbe tọn) Etẹwẹ Jiwheyẹwhe ka jlo dọ a ni wà?

  • Plọnnu gando Jiwheyẹwhe po Visunnu etọn, Jesu po go. To gbèdopo, Jesu hodẹ̀ hlan Jiwheyẹwhe dọmọ: “Ehe wẹ ogbẹ̀ madopodo, dọ yé ni wá yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.” (Johanu 17:3) Etẹwẹ e zẹẹmẹdo nado “wá yọ́n” Jiwheyẹwhe po Jesu po? Mí sọgan wá yọ́n yé gbọn Biblu pinplọn dali podọ gbọn owẹ̀n he to e mẹ lẹ yíyí do yizan mẹ to gbẹzan mítọn mẹ dali. * Biblu do linlẹn Mẹdatọ mítọn, Jehovah Jiwheyẹwhe, yèdọ Gbẹ̀namẹtọ lọ tọn lẹ hia mí. (Owalọ lẹ 17:24, 25) Biblu sọ dọhona mí gando Visunnu etọn Jesu, mẹhe nọ plọnmẹ “ohó ogbẹ̀ madopodo tọn lẹ” go—Johanu 6:67-69.

  • Do yise hia to avọ́sinsan ofligọ Jesu tọn mẹ. Jesu wá aigba ji “nado yilizọn namẹ bo ze ogbẹ̀ etọn jo taidi ofligọ de.” (Matiu 20:28) Avọ́sinsan ofligọ Jesu tọn hùn dotẹnmẹ dote na gbẹtọvi lẹ nado nọgbẹ̀ kakadoi to Paladisi mẹ to aigba ji. * (Salmu lẹ 37:29) Jesu dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (Johanu 3:16) Doayi e go dọ e ma ko pé nado tindo yise to Jesu mẹ poun. Mí dona “do yise hia to ewọ mẹ,” bosọ de nado nọgbẹ̀ sọgbe hẹ nuplọnmẹ etọn lẹ podọ sọgbe hẹ ojlo Otọ́ etọn tọn.—Matiu 7:21; Jakọbu 2:17.

  • Wleawuna haṣinṣan họntọnjiji tọn he lodo de hẹ Jiwheyẹwhe. Jiwheyẹwhe jlo dọ mí ni dọnsẹpọ emi bo lẹzun họntọn emitọn. (Jakọbu 2:23; 4:8) Jiwheyẹwhe yin madopodo. E ma na kú gbede, podọ ojlo etọn wẹ yindọ họntọn etọn lẹ lọsu ni nọgbẹ̀ kakadoi. Gbọn Ohó etọn gblamẹ, Jiwheyẹwhe dọ nuhe e jlo gando mẹhe nọ dín in lẹpo go dọmọ: “Na hiẹ ni duvivi ogbẹ̀ tọn kakadoi.”—Salmu lẹ 22:26.

Pọndohlan Agọ̀ lẹ Gando Gbẹninọ Kakadoi Go

Pọndohlan agọ̀: Vivẹnudido gbẹtọvi tọn wẹ na hẹn ogbẹ̀ madopodo wá.

Nugbo lọ: Dile etlẹ yindọ nukọnyiyi to amasinzọnwiwa-liho ko zọ́n bọ mẹdelẹ dọ dọ tedidi gbẹninọ gbẹtọvi tọn na jẹeji dogọ, vivẹnudido enẹlẹ ma na hẹn ogbẹ̀ madopodo wá. Jiwheyẹwhe kẹdẹ wẹ gán na mí ogbẹ̀ madopodo, na ewọ kẹdẹ “wẹ asisa ogbẹ̀ tọn” wutu. (Salmu lẹ 36:9) E dopà nado “ze okú mì kakadoi” bo na ogbẹ̀ madopodo gbẹtọvi nugbonọ lẹpo.—Isaia 25:8; 1 Johanu 2:25.

Pọndohlan agọ̀: Mẹhe tindo sinmẹ agbasa tọn wunmẹ delẹ kẹdẹ wẹ na nọgbẹ̀ kakadoi.

Nugbo lọ: Jiwheyẹwhe ma nọ homẹnukuntapọn. Kakatimọ, “to akọta lẹpo mẹ, mẹhe nọ dibusi i bo nọ wà dodo wẹ e nọ kẹalọyi.” (Owalọ lẹ 10:34, 35) Mẹhe wá sọn akọ̀ lẹpo po ninọmẹ voovo po mẹ bo nọ setonuna Jiwheyẹwhe lẹ wẹ na nọgbẹ̀ kakadoi.

Pọndohlan agọ̀: Ogbẹ̀ madopodo na ṣiapọmẹ.

Nugbo lọ: Jiwheyẹwhe dè wẹ nunina ogbẹ̀ madopodo tọn wá sọn, yèdọ mẹhe yiwanna mí bo jlo dọ mí ni tindo ayajẹ. (Jakọbu 1:17; 1 Johanu 4:8) E yọnẹn dọ eyin mí na tindo ayajẹ, mí do hudo azọ́n jọ azọ́n de tọn. (Yẹwhehodọtọ 3:12) Jiwheyẹwhe dopà dọ mẹhe na nọgbẹ̀ kakadoi to aigba ji lẹ na tindo azọ́n pekọhẹnwanamẹ tọn de he na hẹn ale wá na yewlẹ po mẹyiwanna yetọn lẹ po.—Isaia 65:22, 23.

Humọ, mẹhe na nọgbẹ̀ kakadoi lẹ na zindonukọn nado to onú yọyọ lẹ plọn gando Mẹdatọ yetọn po azọ́n nudida tọn etọn he gbloada taun lẹ po go. E dá gbẹtọvi lẹ po ojlo lọ po nado nọgbẹ̀ kakadoi podọ nado plọnnu gando ewọ go, dile etlẹ yindọ yé “ma sọgan mọnukunnujẹ azọ́n he Jiwheyẹwhe nugbo lọ ko basi lẹ mẹ sọn bẹjẹeji jẹ vivọnu.” (Yẹwhehodọtọ 3:10, 11) Enẹwutu, mẹhe na nọgbẹ̀ kakadoi lẹ na wazọ́n he fọnjlodotenamẹ susu bo nasọ plọn nususu.

^ huk. 4 Kunnudetọ Jehovah tọn lẹ nọ basi tito nado plọn Biblu hẹ mẹ vọnu. Na nudọnamẹ dogọ, pọ́n video lọ Nawẹ Mí Nọ Plọn Biblu hẹ Mẹ Gbọn?