Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Be Jiwheyẹwhe Tin to Filẹpo Wẹ Ya?

Be Jiwheyẹwhe Tin to Filẹpo Wẹ Ya?

Gblọndo Biblu tọn

Jiwheyẹwhe penugo nado mọ nulẹpo podọ nado yinuwa to fidepope he jlo e. (Howhinwhẹn lẹ 15:3; Heblu lẹ 4:13) Etomọṣo, Biblu ma plọnmẹ dọ Jiwheyẹwhe tin to filẹpo, to onú lẹpo mẹ gba. Kakatimọ, e dohia dọ omẹ nujọnu tọn de wẹ ewọ yin bo tindo fininọ de.

  • Awusọhia he Jiwheyẹwhe tindo: Gbigbọ wẹ Jiwheyẹwhe. (Johanu 4:24) Gbẹtọvi lẹ ma sọgan mọ ẹn. (Johanu 1:18) Numimọ he go Biblu donù gando Jiwheyẹwhe go lẹ nọ saba do ewọ hia taidi mẹhe tindo fininọ tangan de. Ewọ ma yin alọdlẹndo gbede taidi mẹhe tin to filẹpo.—Isaia 6:1, 2; Osọhia 4:2, 3, 8.

  • Fininọ Jiwheyẹwhe tọn: Lẹdo gbigbọ tọn mẹ wẹ Jiwheyẹwhe nọ nọ̀, fie gbọnvona wẹkẹ yinukundomọ. To lẹdo enẹ mẹ to olọn mẹ, Jiwheyẹwhe tindo “fininọ” de. (1 Ahọlu lẹ 8:30) Biblu donù nujijọ de go he whenu nudida gbigbọnọ lẹ “yì nado sọawuhia to Jehovah * nukọn” te, ehe dohia to linlẹn de mẹ dọ Jiwheyẹwhe nọ nọ̀ ofi tangan de.—Jobu 1:6.

Eyin Jiwheyẹwhe ma nọ nọ̀ filẹpo, be ewọ sọgan hò dopodopo mítọn tọn pọ́n ya?

Mọwẹ. Jiwheyẹwhe nọ hò dopodopo mítọn tọn pọ́n taun. Dile etlẹ yindọ lẹdo gbigbọ tọn mẹ wẹ Jiwheyẹwhe nọ nọ̀, ewọ nọ doayi mẹhe nọ jlo vẹkuvẹku nado hẹn homẹ etọn hùn to aigba ji lẹ go, bo nọ yinuwado ota yetọn mẹ. (1 Ahọlu lẹ 8:39; 2 Otànnugbo lẹ 16:9) Pọ́n lehe Jehovah nọ do mẹtọnhopọn hia mẹhe nọ sẹ̀n ẹn po ahundopo po lẹ do:

  • Whenue a hodẹ̀: Jehovah sọgan sè odẹ̀ he a ṣẹṣẹ hò tlolo.—2 Otànnugbo lẹ 18:31.

  • Whenue a to apọṣimẹ sinsinyẹn mẹ: “Jehovah ma dẹn do mẹhe ahun yetọn jẹflumẹ lẹ; e nọ whlẹn ayimajainọ lẹ.”—Salmu lẹ 34:18.

  • Whenue a do hudo anademẹ tọn: Jehovah “na na we wuntuntun bo na plọn we” gbọn Ohó etọn Biblu gblamẹ.—Salmu lẹ 32:8.

Linlẹn agọ̀ lẹ gando tintin to filẹpo Jiwheyẹwhe tọn go

Linlẹn agọ̀: Jiwheyẹwhe tin to filẹpo to nudida lẹ ṣẹnṣẹn.

Nugbo lọ: Jiwheyẹwhe ma nọ nọ̀ aigba ji kavi fidevo depope to wẹkẹ yinukundomọ lọ mẹ gba. (1 Ahọlu lẹ 8:27) Nugbo wẹ dọ sunwhlẹvu lẹ po nudida devo lẹ po “to gigo Jiwheyẹwhe tọn lá.” (Salmu lẹ 19:1) Ṣigba, Jiwheyẹwhe ma nọ nọ̀ nudida etọn lẹ ṣẹnṣẹn kẹdẹdile anazọ́nwatọ de ma nọ nọ̀ alọnuzọ́n etọn lẹ ṣẹnṣẹn do. Ṣogan, alọnuzọ́n de sọgan zọ́n bọ mí na yọ́n nususu gando anazọ́nwatọ lọ go. Mọdopolọ, wẹkẹ yinukundomọ lọ nọ dọ nususu na mí gando “jẹhẹnu mayinukundomọ” Mẹdatọ lọ tọn lẹ go, taidi huhlọn, nuyọnẹn po owanyi etọn po.—Lomunu lẹ 1:20.

Linlẹn agọ̀: Jiwheyẹwhe dona tin to filẹpo nado sọgan yọ́n nulẹpo bo yin ganhunupotọ.

Nugbo lọ: Gbigbọ wiwe Jiwheyẹwhe tọn, kavi huhlọn-yido-wazọ́n etọn, wẹ e nọ yizan nado wà nulẹ dotana. Gbọn gbigbọ wiwe Jiwheyẹwhe gblamẹ, ewọ sọgan mọ bo wà nudepope, to fidepope podọ to ojlẹ depope mẹ eyin ewọ lọsu ma tlẹ tin to finẹ tlọlọ.—Salmu lẹ 139:7.

Linlẹn agọ̀: Salmu lẹ 139:8 plọnmẹ dọ Jiwheyẹwhe tin to filẹpo to whenue e dọ dọ: “Eyin yẹn tlẹ hẹji yì olọn mẹ, hiẹ na tin to finẹ, eyin yẹn tlẹ sọ tẹ́ adọzan ṣie do Yọdò mẹ, pọ́n! hiẹ nasọ tin to finẹ.”

Nugbo lọ: Wefọ ehe ma to hodọ gando fininọ Jiwheyẹwhe tọn go gba. Ohó milomilo lẹ wẹ e yizan nado dohia poun dọ fide ma dẹn gbau na Jiwheyẹwhe nado yinuwado ota mítọn mẹ.

^ huk. 5 Jehovah wẹ yinkọ Jiwheyẹwhe tọn dile Biblu dohia do.