Accessibility setting

De ogbè dopo

Yì hosọ flinflin lẹ ji

Yì hosọ lẹ ji

Kunnudetọ Jehovah Tọn Lẹ

Gungbe

Be Jiwheyẹwhe Na Jona Mi Ya?

Be Jiwheyẹwhe Na Jona Mi Ya?

Gblọndo Biblu tọn

Mọwẹ, Jiwheyẹwhe na jo ylando towe lẹ na we eyin a ze afọdide he jẹ lẹ. Biblu dọ dọ Jiwheyẹwhe ‘wleawu nado jonamẹ’ podọ e ‘na jonamẹ susugege.’ (Nẹhemia 9:17; Psalm 86:5; Isaia 55:7) To whenue Jiwheyẹwhe jona mí, e nọ wàmọ to gigọ́ mẹ. E nọ zẹhù gbọn ylando mítọn lẹ ji kavi nọ “súnsún” yé sẹ̀. (Owalọ lẹ 3:19) Jiwheyẹwhe sọ nọ jonamẹ kakadoi, na ewọ dọmọ: “Ylando yetọn wẹ yẹn masọ to na flin ba gba.” (Jelemia 31:34) Eyin e jo ylando de na mí, e ma nọ sayana mí kavi domẹplọnlọ mí go sọn ojlẹ de mẹ jẹ devo mẹ na ylando dopolọ wutu.

Amọ́, e ma yin madogán kavi numọtolanmẹ poun wẹ nọ hẹn Jiwheyẹwhe nado jonamẹ gba. E ma nọ diọ nujinọtedo dodo etọn lẹ gbede. Enẹwutu, ylando delẹ tin bọ e ma nọ jonamẹ.Jọṣua 24:19, 20.

Afọdide delẹ nado mọ jonamẹ Jiwheyẹwhe tọn

  1. Yigbe dọ ylando he a wà dohia dọ a tùnafọ nujinọtedo Jiwheyẹwhe tọn lẹ ji. Dile etlẹ yindọ nuhe a ṣiwà lọ sọgan hẹn awugblena mẹdevo lẹ, a dona mọnukunnujẹemẹ dọ Jiwheyẹwhe whẹ́whẹ́ wẹ a waylando do.Psalm 51:1, 4; Owalọ lẹ 24:16.

  2. Yigbe ylando towe tọn na Jiwheyẹwhe to odẹ̀ mẹ.Psalm 32:5; 1 Johanu 1:9.

  3. Dohia sọn ahun mẹ wá dọ ylando towe vẹna we. “Awubla to aliho Jiwheyẹwhe tọn mẹ” na zọ́n bọ a na lẹnvọjọ, kavi diọ ninọmẹ ahun mẹ tọn towe. (2 Kọlintinu lẹ 7:10) Ehe biọ dọ a ni gbẹwanna nuyiwa ylankan he hẹn we biọ ylando mẹ lọ lẹ.Matiu 5:27, 28.

  4. “Diọ” walọyizan towe lẹ. (Owalọ lẹ 3:19) Ehe sọgan zẹẹmẹdo dọ a ni payi ma nado nọ jai jẹ nuṣiwa dopolọ mẹ kavi dọ a ni diọ aliho he mẹ a nọ lẹnnupọn kavi yinuwa te pete.Efesunu lẹ 4:23, 24.

  5. Ze afọdide lẹ nado vọ́ nuhe nuṣiwa towe hẹngble lẹ jlado. (Matiu 5:23, 24; 2 Kọlintinu lẹ 7:11) Vẹvẹna mẹhe nuhe a wà kavi gboawupo nado wà lọ ko hẹn awugblena lẹ, bo wà nuhe go a pé lẹpo nado vọ́ ninọmẹ lọ jlado.Luku 19:7-10.

  6. Hodẹ̀ na Jiwheyẹwhe dọ ni jona we to dodonu avọ́sinsan ofligọ Jesu tọn ji. (Efesunu lẹ 1:7) Eyin Jiwheyẹwhe na sè odẹ̀ towe, hiẹ lọsu dona nọ jona mẹhe ko ṣinuwa do we lẹ.Matiu 6:14, 15.

  7. Eyin ylando sinsinyẹn de wẹ a wà, dọhodeji hẹ mẹde he pegan nado na we alọgọ gbigbọmẹ tọn he sin nuhudo a tindo bo sọgan sọ hodẹ̀ do ota towe mẹ.Jakọbu 5:14-16.

Pọndohlan agọ̀ delẹ gando jonamẹ Jiwheyẹwhe tọn go

“Ylando he n’wà lẹ ko sù gbau, Jiwheyẹwhe ma gán jona mi.”

Jiwheyẹwhe jo ylando ayọdide po hlọnhuhu po tọn he Davidi wà lẹ na ẹn

Eyin mí gbẹ́ to afọdide he Jiwheyẹwhe zedai to Biblu mẹ lẹ hodo zọnmii, mí na mọ jona yí, na nugopipe Jiwheyẹwhe tọn nado jonamẹ sinyẹn taun hugan ylando mítọn lẹ. Ewọ penugo nado jo ylando sinsinyẹn he mí wà lẹ na mí kakajẹ dehe mí ko wà whlasusu lẹ ji.Howhinwhẹn lẹ 24:16; Isaia 1:18.

Di apajlẹ, Ahọlu Davidi Islaeli tọn mọ jona yí na ylando ayọdide po hlọnhuhu po tọn he e wà lẹ. (2 Samuẹli 12:7-13) Apọsteli Paulu he ko nọ mọ ede dai taidi ylandonọ daho hugan to gbẹ̀mẹ, wá yin jijona. (1 Timoti 1:15, 16) Etlẹ yin Ju owhe kanweko tintan whenu tọn lẹ he Jiwheyẹwhe gblewhẹdo na Jesu, yèdọ Mẹsia lọ he yé hù wutu, mọ jona yí to whenue yé diọ walọyizan yetọn lẹ.Owalọ lẹ 3:15, 19.

“Eyin n’gbẹ́ yigbe ylando ṣie lẹ tọn na yẹwhenọ kavi sinsẹ̀ngán de, n’na mọ jona yí.”

Aṣẹ ma yin nina gbẹtọvi depope to egbehe nado jo ylando he hatọ etọn de wà sọta Jiwheyẹwhe na ẹn. Nugbo wẹ dọ eyin mẹde waylando bo dọ ẹ tọ́n na hatọ etọn de, enẹ sọgan gọalọna mẹlọ nado vò sọn ahun mẹ, amọ́ Jiwheyẹwhe kẹdẹ wẹ sọgan jo ylando namẹ.Efesunu lẹ 4:32; 1 Johanu 1:7, 9.

Eyin mọ wẹ, etẹ dọ wẹ Jesu te to whenue e dọna apọsteli lẹ dọmọ: “Eyin mì jo ylando mẹdepope tọn na ẹn, e na yin jijona ẹn; eyin mì ma jo mẹdepope tọn na ẹn, e ma na yin jijona ẹn”? (Johanu 20:23) Zẹẹmẹ basina apọsteli lẹ wẹ e te gando aṣẹpipa vonọtaun he ewọ na na yé go to whenue yé na ko mọ gbigbọ wiwe yí godo.Johanu 20:22.

Apọsteli lẹ mọ nunina he e dopagbe etọn na yé ehe yí, to whenue gbigbọ wiwe yin kinkọnjẹgbonu do yé ji to owhe 33 W.M. (Owalọ lẹ 2:1-4) Apọsteli Pita yí aṣẹpipa ehe zan to whenue e dawhẹna Ananias po Safila po, yèdọ Klistiani owhe kanweko tintan tọn delẹ. To azọ́njiawu-liho, Pita mọnukunnujẹ ayiha oklọ tọn he kàn yé te mẹ, bo dawhẹna yé dọ ylando yetọn ma na yin jijona.Owalọ lẹ 5:1-11.

Nunina jiawu gbigbọ wiwe tọn enẹ, gọna nunina devo lẹ taidi azọ̀nhẹngbọ tọn po ogbè wunmẹwunmẹ dido tọn po wá doalọte to okú apọsteli lẹ tọn godo. (1 Kọlintinu lẹ 13:8-10) Enẹwutu to egbehe, gbẹtọvi depope ma sọgan jo ylando he hatọ etọn de wà sọta Jiwheyẹwhe na ẹn.

Plọnnu Dogọ

Nawẹ Hiẹ Sọgan Dọnsẹpọ Jiwheyẹwhe Gbọn?

Dindona eyin Jiwheyẹwhe nọ sè odẹ̀ lẹpo, lehe mí dona nọ hodẹ̀ gbọn, podọ nuhe mí sọgan sọ wà nado dọnsẹpọ Jiwheyẹwhe.