Yì hosọ lẹ ji

Naegbọn Jesu Do Nọ Yin Yiylọdọ Visunnu Jiwheyẹwhe Tọn?

Naegbọn Jesu Do Nọ Yin Yiylọdọ Visunnu Jiwheyẹwhe Tọn?

Gblọndo Biblu tọn

Biblu nọ saba ylọ Jesu dọ “Visunnu Jiwheyẹwhe tọn.” (Johanu 1:49) Hodidọ lọ “Visunnu Jiwheyẹwhe tọn” dohia dọ Jiwheyẹwhe wẹ yin Mẹdatọ, kavi Asisa ogbẹ̀ lẹpo tọn, kakajẹ Jesu tọn lọsu ji. (Salmu lẹ 36:9; Osọhia 4:11) Biblu ma plọnmẹ dọ Jiwheyẹwhe jivi, dile gbẹtọ lẹ nọ jivi to paa mẹ do.

Biblu sọ ylọ angẹli lẹ dọ “visunnu Jiwheyẹwhe nugbo lọ tọn lẹ.” (Jobu 1:6) Podọ Biblu dọ dọ gbẹtọvi tintan lọ, Adam, yin “visunnu Jiwheyẹwhe tọn” de. (Luku 3:38) Ṣigba, na Jesu wẹ yin nudida tintan Jiwheyẹwhe tọn, podọ ewọ kẹdẹ wẹ e dá tlọlọ wutu, Biblu nọ dlẹnalọdo Jesu taidi Visunnu Jiwheyẹwhe tọn tintan.

 Be Jesu ko nọgbẹ̀ to olọn mẹ whẹpo do wá yin jiji do aigba ji wẹ ya?

Mọwẹ. Nudida gbigbọnọ de wẹ Jesu yin to olọn mẹ, whẹpo e do wá yin jiji taidi gbẹtọvi de do aigba ji. Jesu lọsu dọ gando ede go dọmọ: “Yẹn ko jẹte sọn olọn mẹ wá.”—Johanu 6:38; 8:23.

Jiwheyẹwhe dá Jesu whẹpo do dá nudevo depope. Pọ́n delẹ to nue Biblu dọ gando Jesu go lẹ mẹ:

  • “Ewọ wẹ . . . plọnji nudida lẹpo tọn.”—Kolosinu lẹ 1:15.

  • Ewọ wẹ yin “bẹjẹeji nudida Jiwheyẹwhe tọn lẹ tọn.”—Osọhia 3:14.

Jesu wẹ hẹn dọdai he yin didọ gando mẹhe “ko tin sọn hohowhenu, yèdọ sọn ojlẹ dindẹn die” lọ go di.—Mika 5:2; Matiu 2:4-6.

 Etẹwẹ Jesu wà whẹpo do wá aigba ji?

Ewọ nọ otẹn vonọtaun de mẹ to olọn mẹ. Jesu dlẹnalọdo otẹn ehe to whenue e hodẹ̀ dọmọ: “Otọ́ E, yí gigo he n’ko tindo to apá towe whẹpo aihọn do wá tintin mẹ lọ do pagigona mi.”—Johanu 17:5.

E gọalọna Otọ́ etọn nado dá nudevo lẹpo. Jesu wazọ́n to apá Jiwheyẹwhe tọn “taidi azọ́nwatọgan de.” (Howhinwhẹn lẹ 8:30) Biblu dọ gando Jesu go dọmọ: “Gbọn ewọ gblamẹ wẹ nudevo lẹpo yin didá te to olọn mẹ podọ to aigba ji.”—Kolosinu lẹ 1:16.

Jiwheyẹwhe yí Jesu zan nado hẹn nudida he pò lẹpo wá tintin mẹ. Nudida ehelẹ bẹ nudida gbigbọnọ he pò lẹ hẹn, gọna wẹkẹ yinukundomọ lọ lọsu. (Osọhia 5:11) To linlẹn de mẹ, azọ́nwadopọ ehe to Jiwheyẹwhe po Jesu po ṣẹnṣẹn sọgan yin yiyijlẹdo azọ́nwadopọ yẹdenanutọ de po họ̀gbátọ de po tọn go. Yẹdenanutọ lọ nọ de yẹdide ohọ̀ lọ tọn; bọ họ̀gbátọ lọ uwọ nọ wá gbá ohọ̀ lọ.

Ewọ sọ yin Ohó lọ. Eyin Biblu to hodọ gando gbẹzan Jesu tọn jẹnukọnna aigba ji wiwá etọn go, e nọ ylọ Jesu dọ “Ohó lọ.” (Johanu 1:1) Ehe dohia dọ Jiwheyẹwhe yí Visunnu etọn zan nado na nudọnamẹ po anademẹ lẹ po nudida gbigbọnọ he pò lẹ.

E sọ taidi dọ Jesu yinuwa taidi Hoyidọtọ Jiwheyẹwhe tọn na gbẹtọvi lẹ to aigba ji. Jiwheyẹwhe na ko yí Ohó lọ, Jesu zan nado na anademẹ lẹ Adam po Evi po to jipa Edẹni tọn mẹ. (Jenẹsisi 2:16, 17) Jesu sọgan ko yin angẹli he deanana Islaelivi hohowhenu tọn lẹ to danfafa ji podọ ogbè etọn wẹ Islaelivi lẹ dona ko setonuna.—Eksọdusi 23:20-23. *

^ huk. 18 E ma yin Ohó lọ kẹdẹ wẹ yin angẹli he gblamẹ Jiwheyẹwhe dọho gbọn. Di apajlẹ, visunnu etọn angẹli lẹ wẹ e yizan nado na Osẹ́n etọn Islaelivi hohowhenu tọn lẹ, e ma yin Viplọnji etọn.—Owalọ lẹ 7:53; Galatianu lẹ 3:19; Heblu lẹ 2:2, 3.