Yì hosọ lẹ ji

Yì hosọ flinflin lẹ ji

Kunnudetọ Jehovah Tọn Lẹ

Gungbe

Nawẹ Avọ́sinsan Jesu Tọn Yin “Ofligọ de Do Ota Mẹsusu Tọn mẹ” Gbọn?

Gblọndo Biblu tọn

Avọ́sinsan Jesu tọn gblamẹ wẹ Jiwheyẹwhe na whlẹn gbẹtọvi lẹ kavi tún yé dote sọn ylando po okú po si te. Biblu dlẹnalọdo ohùn Jesu tọn he yin sinsọndai taidi fligọ-kuẹ de. (Efesunu lẹ 1:7; 1 Pita 1:18, 19) Abajọ Jesu do dọ dọ emi wá nado “ze ogbẹ̀ [emitọn] jo taidi ofligọ de do ota mẹsusu tọn mẹ.”​—Matiu 20:28.

Naegbọn “ofligọ de do ota mẹsusu tọn mẹ” do yin dandan?

Sunnu tintan lọ, Adam, yin didá taidi gbẹtọvi pipé, kavi mẹhe ma tindo ylando. E tindo todido lọ nado nọgbẹ̀ kakadoi, ṣigba e hẹn ẹn bu na e de nado vẹtolina Jiwheyẹwhe wutu. (Jenẹsisi 3:17-19) Whenue e wá ji ovi lẹ, e jo ogú ylando tọn do na yé. (Lomunu lẹ 5:12) Enẹwutu wẹ Biblu do dọ dọ Adam ‘sà’ ede po ovi etọn lẹ po do kanlinmọgbenu ylando po okú po tọn. (Lomunu lẹ 7:14) Na yé lẹzun mapenọ wutu, depope yetọn ma sọgan gọ̀ nuhe Adam ko hẹnbu lọ họ̀.​—Salmu lẹ 49:7, 8.

Jiwheyẹwhe do awuvẹmẹ hia kúnkan Adam tọn to ninọmẹ todido matindo tọn yetọn mẹ. (Johanu 3:16) Etomọṣo, nujinọtedo dodo tọn Jiwheyẹwhe tọn zọ́n bọ, ewọ ma sọgan miọnnukundo kavi yí nukunpẹvi do pọ́n ylando yetọn lẹ matin whẹwhinwhẹ́n dolido de. (Salmu lẹ 89:14; Lomunu lẹ 3:23-26) Na Jiwheyẹwhe yiwanna gbẹtọvi lẹ wutu, ewọ wleawuna dodonu sọgbe hẹ osẹ́n de nado de ylando yetọn lẹ sẹ̀ mlẹnmlẹn, e ma yin nado jona yé kẹdẹ gba. (Lomunu lẹ 5:6-8) Ofligọ lọ wẹ yin dodonu sọgbe hẹ osẹ́n enẹ.

Etẹwẹ ofligọ lọ nọ wadotana?

To ojlẹ Biblu tọn mẹ, hogbe lọ “ofligọ” nọ bẹ onú atọ̀n delẹ hẹn:

  1. E nọ yin ahọsumẹ de.​—Sọha lẹ 3:46, 47.

  2. E nọ zọ́n bọ yè nọ tún mẹde dote kavi fli nude gọ̀.​—Eksọdusi 21:30.

  3. E nọ sọzẹn hẹ akuẹ nuhe yè to ahọsuna lọ tọn kavi ṣinyọnnudo e. *

Pọ́n lehe onú ehelẹ gando avọ́sinsan ofligọ Jesu Klisti tọn go do.

  1. Ahọsumẹ. Biblu dọ dọ “ahọ́ daho de ko yin súsú nado họ̀” Klistiani lẹ. (1 Kọlintinu lẹ 6:20; 7:23) Ahọ́ enẹ wẹ ohùn Jesu tọn he ewọ “yí do họ̀ gbẹtọ lẹ na Jiwheyẹwhe sọn hẹnnu lẹ, ogbè lẹ, gbẹtọ lẹ, podọ sọn akọta lẹpo mẹ.”​—Osọhia 5:8, 9.

  2. Tundote. Avọ́sinsan Jesu tọn wleawuna “tundote gbọn ofligọ dali” sọn ylando si.​—1 Kọlintinu lẹ 1:30; Kolosinu lẹ 1:14; Heblu lẹ 9:15.

  3. Zẹ́nsisọ. Avọ́sinsan Jesu tọn sọzẹn pẹpẹ hẹ nuhe Adam hẹnbu lọ​—yèdọ ogbẹ̀ pipé gbẹtọvi tọn. (1 Kọlintinu lẹ 15:21, 22, 45, 46) Biblu dọmọ: “Kẹdẹdile mẹsusu lẹzun ylandonọ gbọn tolivivẹ mẹdopo [Adam] tọn gblamẹ do, mọdopolọ ga wẹ mẹsusu na lẹzun dodonọ gbọn tonusise mẹdopo [Jesu Klisti] tọn gblamẹ do.” (Lomunu lẹ 5:19) Ehe do lehe okú mẹdopo tọn sọgan suahọ ofligọ tọn ylandonọ susu tọn do hia. Na nugbo tọn, avọ́sinsan Jesu tọn yin “ofligọ he sọzẹn de na mẹlẹpo,” yèdọ mẹdepope he ze afọdide he jẹ nado mọaleyi sọn e mẹ.​—1 Timoti 2:5, 6.

^ huk. 11 To Biblu mẹ, hogbe dowhenu tọn he yin lilẹdo “ofligọ” nọ bẹ linlẹn akuẹ, kavi nutindo akuẹgegenu he yè yí do sú ahọ́ de tọn hẹn. Di apajlẹ, hogbe Heblu tọn lọ ka·pharʹ nọ saba zẹẹmẹdo ṣinyọnnudo. E nọ saba dlẹnalọdo nuṣinyọndo ylando kavi jona ylando tọn. (Salmu lẹ 65:3) Hogbe he sẹpọ ẹ lọ koʹpher, nọ dlẹnalọdo ahọ́ he yin súsú nado jẹ yanwle nuṣinyọndo kavi mẹfligọ tọn ehe kọ̀n. (Eksọdusi 21:30) Mọdopolọ, hogbe Glẹki tọn lọ lyʹtron, he nọ saba yin lilẹdo “ofligọ,” sọgan sọ yin lilẹdo “mẹfligọ-kuẹ.” (Matiu 20:28; The New Testament in Modern Speech, gbọn R. F. Weymouth dali) Wekantọ Glẹki tọn lẹ yí hogbe lọ zan nado dlẹnalọdo ahọ́ he nọ yin súsú nado fli gàntọ de sọn awhàngbenu kavi tún afanumẹ de dote.

Plọnnu Dogọ