Gblọndo Biblu tọn

Biblu-kantọ Luku dọ gando kandai gbẹzan Jesu tọn he e basi go dọmọ: “Yẹn ko dindona nulẹpo po gbesisọ po sọn bẹjẹeji.”​—Luku 1:3.

Mẹdelẹ sọalọakọ́n dọ kandai he yin bibasi gando gbẹzan Jesu tọn go to owe Wẹndagbe tọn lẹ mẹ​—enẹ wẹ nuhe Matiu, Malku, Luku po Johanu po he nọgbẹ̀ to ojlẹ dopolọ mẹ hẹ ẹ lẹ wlan​—yin didiọ to ojlẹ de mẹ to owhe kanweko ẹnẹtọ mẹ.

Ṣigba, adà vúnvún owe Wẹndagbe Johanu tọn de tọn yin mimọ to Egipti to bẹjẹeji owhe kanweko 20tọ tọn. E nọ yin yiylọ todin dọ Papyrus Rylands tọn 457 (P52) bo yin sisẹdo do wesẹdotẹn John Rylands to Manchester, to Angleterre. E bẹ nuhe tin to Johanu 18:31-33, 37, 38 mẹ to Biblu egbezangbe tọn lẹ mẹ hẹn.

Kandai vúnvún ehe wẹ yin dehe dohó hugan to kandai Owe-wiwe Glẹki tọn he yin yinyọnẹn lẹ mẹ. Weyọnẹntọ susu yise dọ e yin kinkan to nudi owhe 125 W.M., yèdọ nudi owhe 25 poun sọn ojlẹ he mẹ kandai dowhenu tọn lọ yin kinkan te. Diblayin nuhe to adà vúnvún lọ mẹ lẹpo wẹ sọgbe hẹ nuhe to alọnuwe he wá yin bibasi to nukọn mẹ lẹ mẹ.