• OWHE HE MẸ N’YIN JIJI: 1962

  • OTÒ HE MẸ N’WÁ SỌN: Canada

  • OTÀN ṢIE: Gbẹzan fẹnnuwiwa tọn

NUHE N’YIN DAI

N’yin jiji to Montréal, yèdọ tòdaho he klohugan to ayimatẹn Québec tọn mẹ to Canada. Yẹn po mẹdaho ṣie po gọna nọvi ṣie awe lẹ yin pinplọn whẹ́n gbọn mẹjitọ owanyinọ lẹ dali to lẹdo dagbedagbe Rosemont tọn mẹ. Gbẹzan mítọn gọ́ na ayajẹ po jijọho po to finẹ.

Whenue n’gbẹ́ pò to pẹvi, n’yiwanna Biblu taun. N’flindọ whenue n’do owhe 12, n’nọ hiawe gando gbẹzan Jesu tọn go to Alẹnu Yọyọ lọ mẹ bo nọ duvivi etọn. Owanyi po awuvẹmẹ etọn po yinuwado ji e sọmọ bọ n’jlo na taidi ewọ nkọ. Amọ́, e blawu dọ ojlo ehe busẹ dẹẹdẹ dile n’to whinwhẹ́n bo jẹ ogbẹ́ ylankan do ji.

Baba ṣie nọ kún ován saxophone, podọ gbọnvona ován etọn he e jodo na mi taidi ogú, e sọ do owanyi na nuhiho do ahun ṣie mẹ bọ ehe wá lẹzun yanwle ṣie to gbẹ̀mẹ. N’yiwanna nuhiho sọmọ bọ n’plọn ginta hihò. To nukọn mẹ, n’do nuhogbẹ́ de ai to pọmẹ hẹ họntọn ṣie delẹ bọ mí nọ hònú pé. Delẹ to omẹ nukundeji he nọ nọgodona hànsinọ lẹ nado de agbán tọ́n lẹ mẹ doayi go e bo dọnsẹpọ mi. N’kẹalọyi gbekọndopọ de hẹ azọ́nwhé nuyidokanji tọn daho de. Nuhiho ṣie wá diyin bo nọ yin hihò to ladio Québec tọn lẹ ji whẹwhẹ.

E taidi dọ nuhe n’gán donukun lẹpo wẹ n’ko do. N’nọ ovu bo diyin bọ akuẹ to tintọ́n na mi dile n’to nuhe n’yiwanna hugan wà. Eyin ai ko gbẹ́ họ́n, n’nọ yì daihun lanmẹyiya tọn, linlin-kantọ lẹ nọ wá kanhose mi, n’nọ yì kannu do owe mẹ na mẹhe nọ to kiké mi lẹ bosọ nọ tọ́n to televiziọn ji. Eyin e jẹ zánmẹ, n’nọ yì hònú bo dù agọ́. Nado gboadọ to gbẹtọ lẹ nukọn, n’ko jẹ ahàn sinsinyẹn nù ji sọn ovu whenu bọ pẹẹde pẹẹde n’jẹ amasin adinọ zan ji. N’ma nọ kiyana nude bosọ nọ zan gbẹzan fẹnnuwiwa tọn.

Ogbẹ̀ ṣie nọ jlo mẹdelẹ na yé nọ mọ mi di mẹhe do ayajẹ. Amọ́, to ahun ṣie mẹ dọ́n, numọtolanmẹ nuvọ́nọ-yinyin tọn nọ doyana mi titengbe eyin n’wá to dee ṣo. N’nọ jẹflumẹ bọ apọ̀ nọ ṣì mi. E blawu dọ, whenue n’diyin pete pẹẹ wẹ SIDA hù awe to godonọnamẹtọ ṣie lẹ mẹ. Obu jẹ ji e! N’yiwanna nuhiho nugbo, amọ́ gbẹzan he mẹ e nọ dọnmẹ biọ lọ hiọawu na mi.

LEHE BIBLU DIỌ GBẸZAN ṢIE DO

Mahopọnna kọdetọn dagbe he tindo n’te, n’yọnẹn dọ nude jẹdò sinsinyẹn to aihọn lọ mẹ. Naegbọn mawadodo do sù sọmọ? Naegbọn Jiwheyẹwhe do to gbàndọn nado yinuwa? N’nọ saba hodẹ̀ hlan Jiwheyẹwhe nado dín gblọndo. Gbèdopo he n’ko yì hònú pé kaka bo lẹkọ, n’sọ vọ́ gọjẹ Biblu hia ji. Dile etlẹ yindọ n’ma mọnukunnujẹ suhugan nuhe hia n’te lẹ tọn mẹ, n’wá tadona lọ kọ̀n dọ opodo aihọn tọn dona ko sẹpọ.

Dile n’to Biblu hia, n’doayi e go dọ to nujijọ de whenu Jesu blanù to danfafa ji na azán 40. (Matiu 4:1, 2) N’lẹn to dee mẹ dọ eyin yẹnlọsu wà nudopolọ, vlavo Jiwheyẹwhe na de ede hia mi, enẹwutu n’de azán he gbè n’na jẹ nùbla ji. Osẹ awe whẹpo nùbibla-zan ṣie nado pé, Kunnudetọ Jehovah tọn awe húhúhọ̀n na mi bọ n’plan yé biọ họmẹ taidi dọ n’ko to tepọn yé wẹ nkọ. N’pọ́n dopo to yé mẹ he nọ yin Jacques tlintlin bo kanse e dọ, “Nawẹ mí gán wagbọn do yọnẹn dọ azán godo tọn aihọn ehe tọn lẹ mẹ wẹ mí to gbẹnọ te?” E sọ hùn Biblu etọn bo hia 2 Timoti 3:1-5. N’to kanbiọ lẹ yìn do yé omẹ awe lẹ mapote bọ gblọndo pekọhẹnwanamẹ tọn he sọgbe hẹ lẹnpọn dagbe he na yé te sọn Owe-wiwe mẹ lẹ hẹn awuji mi. To dlapọn yetọn vude godo, n’wá mọdọ nuhudo ma tlẹ tin dọ ma blanù.

N’jẹ Biblu plọn ji to gbesisọ mẹ hẹ Kunnudetọ lẹ. To godo mẹ, n’pà oda ṣie yido bo jẹ opli lẹpo yì ji to Plitẹnhọ Ahọluduta tọn mẹ. Aliho he mẹ mẹlẹ nọ yawu do mi to opli enẹlẹ ji te wá hẹn mi kudeji dogọ dọ n’ko mọ nugbo lọ todin lo.

Nugbo wẹ dọ n’dona basi vọjlado tangan delẹ to gbẹzan ṣie mẹ nado yí nuhe plọn n’te to Biblu mẹ lẹ do yizan mẹ. Di apajlẹ, n’dona doalọtena amasin adinọ yiyizan bo jo gbẹzan fẹnnuwiwa tọn do. N’sọ dona jo gbigbọ ṣejannabi tọn do bo nọ hò mẹdevo lẹ tọn pọ́n. Taidi mẹjitọ godoponọ de, n’dona plọn nado nọ penukundo nuhudo ovi ṣie awe lẹ tọn go to numọtolanmẹ-liho podọ to gbigbọ-liho. Enẹwutu, n’jo nuhiho do bo kẹalọyi agbasazọ́n he ma pekuẹ sọmọ de to azọ́nwhé de.

E ma bọawuna mi nado basi diọdo enẹ lẹpo. Dile n’to vivẹnudo nado jo amasin adinọ zinzan do, e nọ wá jlo mi to whedelẹnu sọmọ bọ n’sọ vọ́ jai jẹ e mẹ whla sọha de. (Lomunu lẹ 7:19, 21-24) Gbẹzan fẹnnuwiwa tọn jijodo wẹ vẹawuna mi hugan. Humọ, agbasazọ́n ṣie yọyọ lọ nọ hẹn nuṣikọna mi bọ lehe akuẹ he n’nọ dù lọ whè sọ nọ na mi apọ̀. Osun atọ̀n wẹ n’na wazọ́n na whẹpo do dù akuẹ he n’nọ mọ to gànhiho awe gblamẹ taidi nuhotọ.

Odẹ̀ wẹ gọalọna mi nado zindonukọn bo basi diọdo he vẹawu enẹlẹ. N’sọ mọdọ Biblu hihia to gbesisọ mẹ nọ gọalọ taun. Wefọ Biblu tọn tangan delẹ nọ na mi tuli taun. Dopo wẹ 2 Kọlintinu lẹ 7:1, he na tuli Klistiani lẹ nado “klọ́ [yede] wé sọn hẹnflu agbasalan tọn podọ gbigbọ tọn lẹpo mẹ.” Wefọ devo he vọ́ jide na mi dọ n’gán jo aṣa ylankan ṣie lẹ do wẹ Filipinu lẹ 4:13, he dọ dọ: “To nulẹpo mẹ, yẹn tindo huhlọn lọ gbọn mẹlọ he nọ na mi huhlọn dali.” Jehovah Jiwheyẹwhe na gblọndo odẹ̀ ṣie lẹ bo gọalọna mi nado wá mọnukunnujẹ nugbo Biblu tọn mẹ bo yí i do yizan mẹ. Ehe whàn mi nado klan gbẹzan ṣie do wiwe hlan ẹn. (1 Pita 4:1, 2) N’yí baptẹm taidi dopo to Kunnudetọ Jehovah tọn lẹ mẹ to 1997.

ALE HE N’MỌYI LẸ

N’kudeji dọ eyin n’ko zindonukọn to gbẹzan ṣie dai tọn mẹ wẹ, n’na ko kú hoho. Kakatimọ, n’to vivi gbẹzan ayajẹnọ de tọn dù todin! Asi dagbedagbe ṣie, Elvie ko do ede hia nado yin dona de na mi. To pọmẹ, mí omẹ awe lẹ nọ plọn Biblu hẹ mẹdevo lẹ taidi lizọnyizọnwatọ whenu-gigọ́ tọn lẹ. Ehe nọ hẹn ayajẹ po pekọ po wá na mi taun. N’dopẹna Jehovah taun dọ e dọ̀n mi wá ede dè.—Johanu 6:44.