KANBIỌ HE JỌJA LẸ NỌ KANSE

Whla awe to sẹmẹsẹmẹ, Kunnudetọ Jehovah tọn lẹ nọ pli to nọtẹn sinsẹ̀n-bibasi tọn yetọn he nọ yin yiylọdọ Plitẹnhọ Ahọluduta tọn lẹ mẹ. Nawẹ nulẹ nọ yì do to finẹ, podọ nawẹ opli enẹlẹ yìyì sọgan hẹn ale wá na we gbọn?

 Etẹwẹ nọ jọ to Plitẹnhọ Ahọluduta tọn de mẹ?

Plitẹnhọ Ahọluduta tọn yin nuplọntẹn de he nọ na ayidonugo nuplọnmẹ yọ́n-na-yizan he wá sọn Biblu mẹ. Opli he nọ yin bibasi to finẹ lẹ sọgan gọalọna we nado:

  • plọn nugbo lọ gando Jiwheyẹwhe go.

  • mọnukunnujẹ nuhe to godona nujijọ egbezangbe tọn lẹ mẹ.

  • hẹn gbẹtọ-yinyin towe pọnte.

  •  mọ họntọn dagbe lẹ.

A yọnẹn ya? Sinsẹ̀nhọ Kunnudetọ Jehovah tọn lẹ tọn nọ yin yiylọdọ Plitẹnhọ Ahọluduta tọn, na Ahọluduta Jiwheyẹwhe tọn ji wẹ yè nọ dọhodo hugan to finẹ wutu.​—Matiu 6:9, 10; 24:14; Luku 4:43.

 Naegbọn a dona nọ yì?

Nudọnamẹ lọ lẹ na gọalọna we. Nunọwhinnusẹ́n Biblu tọn he nọ yin hodọdeji to opli Kunnudetọ Jehovah tọn lẹ tọn ji lẹ na gọalọna we nado “tindo nuyọnẹn.” (Howhinwhẹn lẹ 4:5) Enẹ zẹẹmẹdo dọ Biblu gán gọalọna we nado basi nudide dagbe lẹ to gbẹ̀mẹ. E sọ sọgan gọalọna we nado mọ gblọndo na kanbiọ titengbe hugan gbẹ̀mẹ tọn lẹ, taidi:

Hodidọ he nọ yin nina to opli sẹfifo tọn mítọn ji delẹ sin hosọ die:

  • Naegbọn Mí Dona Dike Biblu Ni Deanana Mí?

  • Fie Wẹ Hiẹ Sọgan Mọ Alọgọ te to Ojlẹ Ayimajai Tọn lẹ Mẹ?

  • Nuhe Ahọluduta Jiwheyẹwhe Tọn to Wiwà Na Mí Todin.

“Klasigbẹ́ ṣie de wá dopo to opli mítọn lẹ mẹ. E sinai dopọ hẹ whẹndo mítọn bo pọ́n owe mítọn lẹ mẹ hẹ mí. Enẹgodo, e dọna mi dọ gblọndo he mẹlẹ na to adà he bẹ hodọdopọ hẹn lẹ mẹ yinuwado emi ji taun. E sọ dọ dọ to ṣọṣi etọn mẹ yé ma do owe nupinplọn tọn lẹ di mílẹ.”​—Brenda.

A yọnẹn ya? Vọnu wẹ opli mítọn lẹ, podọ akuẹjọ depope ma nọ yin bibiọ.

Gbẹdido hẹ mẹhe to finẹ lẹ na na we tuli. Biblu dọ dọ dopo to nuhewutu Klistiani lẹ dona nọ pli lẹ mẹ wẹ nado “na tuli ode awetọ.” (Heblu lẹ 10:24, 25) Gbẹdido ayajẹ tọn hẹ mẹhe nọ ze Jiwheyẹwhe po mẹdevo lẹ po do otẹn tintan mẹ lẹ nọ fakọnamẹ to aihọn ṣejannabi tọn ehe mẹ.

“To azán he gọ́ na nuwiwa susu de godo, agbọ́ gán pé mi bọ n’na pò vẹjẹvẹjẹ, amọ́ mẹhe n’nọ mọ to Plitẹnhọ Ahọluduta tọn mẹ lẹ nọ vọ́ huhlọn na mi. Eyin opli fó bọ n’lẹkọ jei whé, n’nọ gọ́ na ayajẹ bo nọ to gbesisọ mẹ nado bẹ azán devo jẹeji.”​—Elisa.

A yọnẹn ya? Agun Kunnudetọ Jehovah tọn lẹ tọn hugan 120 000 wẹ tin lẹdo aihọn pé bo nọ pli to nọtẹn 60 000 linlán mẹ. To madozẹnzẹn mẹ, nudi Plitẹnhọ Ahọluduta tọn 1 500 wẹ nọ yin gbigbá to whemẹwhemẹ na sọha pliwatọ lẹ tọn he to jijideji wutu. *

^ huk. 27 Nado mọ nọtẹn opli tọn de, yì adà lọ “Opli Agun Tọn Kunnudetọ Jehovah Tọn lẹ Tọn De” ji bo zín “Dín Nọtẹn Opli Tọn He Sẹpọ We De.”