Yì hosọ lẹ ji

KANBIỌ HE JỌJA LẸ NỌ KANSE

Be Nude Ylan to Afinyọnnuwiwa mẹ Wẹ Ya?

Be Nude Ylan to Afinyọnnuwiwa mẹ Wẹ Ya?

 Etẹwẹ hiẹ lẹn?

  •   Be e ylan nado yì dindonanu to sunwhlẹvu-pọntọ, fákantọ kavi numọtọ lẹ dè wẹ ya?

  •   Be otàn he gando afinyọnnuwiwa go lẹ yin otàngblo lẹ poun—yèdọ avùnhiho to nudagbe po nuylankan po ṣẹnṣẹn—kavi yé sọ bẹ nudevo hẹn ya?

 Hosọ ehe na gbadopọnna nuhewutu afinyọnnuwiwa sọgan taidi nuhe dọnmẹ po nuhewutu a dona họ́ dewe po.

 Etẹwẹ zọ́n bọ e nọ dọnmẹ?

 Azọ́nwhé ayidedai tọn lẹ ko jẹ adọkun gbọn awuwiwlena sinima, tito televiziọn tọn, aihundida video tọn, po owe he sinai do afinyọnnuwiwa ji po lẹ dali. Gbọnmọ dali, jọja susu ko wá tindo ojlo to sunwhlẹvu-pinpọn, aovi, nubode, po azé po mẹ. Etẹwutu? Na whẹwhinwhẹ́n he bọdego lẹ wutu:

  •   Tlintlindo dindin: Nado yọnẹn eyin gbigbọ aovi tọn lẹ tin nugbonugbo

  •   Nuhiha: Nado tẹnpọn bo yọ́n nuhe na jọ to sọgodo

  •   Haṣinṣan: Nado tẹnpọn bo dọho hẹ mẹyiwanna mẹtọn he kú lẹ

 Whẹwhinwhẹ́n enẹlẹ sọgan nọma ylan. Di apajlẹ, jọwamọnu wẹ e yin nado hanú gando sọgodo go kavi nado jẹdò mẹyiwanna he kú de tọn. Amọ́, owù delẹ tin he a dona yọnẹn.

 Naegbọn a dona họ́ dewe?

 Biblu bẹ avase sinsinyẹn lẹ hẹn gando nudepope he tindo kanṣiṣa hẹ afinyọnnuwiwa go. Di apajlẹ, e dọmọ:

 “Mẹdepope ma dona yin mimọ to mì mẹ . . . mẹdepope he yin dọṣẹdọtọ, mẹdepope he yin bojlẹtọ, mẹdepope he yin fákantọ, owọ́ntọ de, mẹdepope he yin aṣẹtúndomẹtọ, mẹdepope he nọ kannubiọ sọn afinyọnnọ de kavi mẹhe nọ mọnú namẹ de dè, kavi mẹdepope he nọ kannubiọ sọn oṣiọ lẹ dè. Na osùnú de wẹ mẹdepope he nọ wà onú ehelẹ yin na Jehovah.”—Deutelonomi 18:10-12.

 Naegbọn Biblu do jẹagọdo afinyọnnuwiwa sinsinyẹn sọmọ?

  •   Afinyọnnuwiwa nọ zọ́n bọ yè nọ wanu dopọ hẹ aovi lẹ. Biblu plọnmẹ dọ angẹli delẹ ṣiatẹ sọta Jiwheyẹwhe bo hẹn yede zun kẹntọ etọn lẹ. (Jenẹsisi 6:2; Juda 6) Angẹli ylankan enẹlẹ, ehe nọ yin yiylọdọ aovi lẹ nọ hẹn gbẹtọ lẹ buali gbọn afinyọnnọ, numọtọ, dọṣẹdọtọ po sunwhlẹvu-pọntọ lẹ po dali. Onú mọnkọ lẹ wiwà na hẹn mí nado jihọntọn hẹ kẹntọ Jiwheyẹwhe tọn lẹ.

  •   Afinyọnnuwiwa nọ hẹn nuyise lalo gbayipe dọ gbẹtọvi lẹ sọgan dọ nuhe na jọ to sọgodo. Ṣigba, Jiwheyẹwhe kẹdẹ wẹ sọgan dọ dọ: “Yẹn ko nọ dọ kọdetọn lọ sọn bẹjẹeji, bosọ nọ dọ nuhe ma ko yin wiwà lẹ sọn whenu dindẹn jẹnukọn.”—Isaia 46:10; Jakọbu 4:13, 14.

  •   Afinyọnnuwiwa nọ hẹn nuyise lalo gbayipe dọ oṣiọ lẹ sọgan dọho hẹ mẹhe togbẹ̀ lẹ. Amọ́ Biblu dọmọ: “Oṣiọ lẹ ma yọ́n nudepope . . . na azọ́n ma tin, tito ma tin, oyọnẹn ma tin, podọ nuyọnẹn ma tin to Yọdò mẹ.”—Yẹwhehodọtọ 9:5, 10.

 Na whẹwhinwhẹ́n enẹlẹ wutu, Kunnudetọ Jehovah tọn lẹ nọ gbẹ́ nudepope he tindo kanṣiṣa hẹ afinyọnnuwiwa dai. Yé sọ nọ dapana ayidedai he nọ do nudelẹ hia taidi kuvitọ, nubode po nuwiwa gbigbọ ylankan tọn po lẹ. Yọnnu jọja de he nọ yin Maria dọmọ: “Eyin ayidedai de bẹ wunmẹ afinyọnnuwiwa tọn lẹ hẹn, to whenẹnu n’ma dona pọ́n ẹn.” *

Kẹdẹdile mẹhodutọ de nọ tẹnpọn nado doyẹklọmẹ dọ mẹdevo wẹ emi yin do, mọ wẹ aovi lẹ nọ doyẹklọmẹ dọ emi yin mẹyiwanna towe he kú do

 Nuhe a sọgan wà

  •   Magbe nado “hẹn ayihadawhẹnamẹnu wiwe de go” to Jehovah nukọn gbọn didapana nuyiwa depope kavi ayidedai he nọ bẹ afinyọnnuwiwa hẹn lẹ dali.—Owalọ lẹ 24:16.

  •   Bẹ nutindo towe depope he tindo kanṣiṣa hẹ afinyọnnuwiwa dlan. Hia Owalọ lẹ 19:19, 20, bo doayi apajlẹ dagbe he Klistiani owhe kanweko tintan whenu tọn lẹ zedai to whẹho ehe mẹ go.

 Flindọ: Eyin a gbẹ́ nuyiwa afinyọnnuwiwa po ayidedai po tọn lẹ dai, a dohia dọ a jlo nado gbọṣi adà Jehovah tọn mẹ niyẹn. Podọ enẹ nọ hẹn homẹ etọn hùn!—Howhinwhẹn lẹ 27:11.

^ Ehe ma dohia dọ otàngblo lẹpo wẹ nọ hẹn afinyọnnuwiwa gbayipe gba. Etomọṣo, Klistiani lẹ nọ yí ayihadawhẹnamẹnu sinai do Biblu ji yetọn zan nado dapana nuyiwa kavi ayidedai depope he bẹ afinyọnnuwiwa hẹn.—2 Kọlintinu lẹ 6:17; Heblu lẹ 5:14.