Yì hosọ lẹ ji

KANBIỌ HE JỌJA LẸ NỌ KANSE

Naegbọn N’Dona Nọ Vẹvẹ?

Naegbọn N’Dona Nọ Vẹvẹ?

 Etẹwẹ a na wà to ninọmẹ he bọdego lẹ mẹ?

  1.   Mẹplọntọ towe gbẹnuna we na nue a wà to klasi de wutu.

     Be a dona vẹvẹna mẹplọntọ towe wẹ ya—eyin a tlẹ lẹndọ e ylanhu do gowe zẹjlẹgo?

  2.   Họntọn towe de sè dọ a dọho ylankan gando emi go.

     Be a dona vẹvẹna họntọn towe wẹ ya—eyin a tlẹ mọdọ nue a dọ gando e go lọ sọgbe?

  3.   A gblehomẹ do baba towe go bo dọhona ẹn po mẹmasi po.

     Be a dona vẹvẹna baba towe wẹ ya—eyin a tlẹ lẹndọ ewọ wẹ hẹn homẹgble we?

 Gblọndo kanbiọ atọ̀n lọ lẹpo tọn wẹ mọwẹ. Ṣigba, naegbọn a dona nọ dọ “jaale,” eyin a tlẹ mọdọ nue emi wà ma ylan paali?

 Naegbọn n’na vẹvẹ?

  •   Ovẹvivẹ nọ dohia dọ yè whèwhín. Eyin a kẹalọyi nuhe a dọ kavi wà de, be a to didohia dọ a to awuwlena jijọ delẹ he a na wá do hudo yetọn whenue a whẹ́n mẹho.

     “Whiwhẹ po homẹfa po gán gọalọna mí nado nọ vẹvẹ bo gbọnmọ dali dotoaina nuhe mẹdevo jlo na dọ.”—Rachel.

  •   Ovẹvivẹ nọ zọ́n bọ yè nọ dín jijọho. Mẹhe nọ saba dọ “jaale” lẹ nọ dohia dọ jijọho dindin wẹ nọ duahunmẹna yé kakati nado yíwhẹ̀ do yede ji bo do omẹ diẹ hia di mẹhe hùwhẹ.

     “Eyin a tlẹ mọdọ emi ma hùwhẹ, jijọho dindin wẹ dona to otẹn tintan mẹ. E ma nọ biọ onú kaka de to mẹsi nado dọ ‘jaale,’ amọ́ mọwiwà gán zọ́n bọ họntọn lẹ na gọ̀ họntọnjiji yetọn bẹ.”—Miriam.

  •   Ovẹvivẹ nọ zọ́n bọ yè nọ vò to mẹde mẹ. Eyin a tindo numọtolanmẹ lọ dọ emi dọ kavi wà nude he gbleawuna mẹde, e nọ taidi agbàn pinpẹn de hinhẹn nkọ. Amọ́, eyin a vẹvẹ, a na mọdọ emi de agbàn enẹ sọn kọ̀ji. *

     “To whedelẹnu, n’nọ ylangbè na iya ṣie po baba ṣie po. N’nọ mọdọ nue n’wà ma yọ́n, amọ́ e ma nọ bọawuna mi nado vẹvẹ. Eyin n’ka tẹnpọn bo vẹvẹ n’nọ vò to dee mẹ janwẹ, na jijọho he to whẹndo lọ mẹ nọ gọwá.”—Nia.

    Eyin a do numọtolanmẹ lọ dọ emi gbleawuna mẹde, e nọ taidi agbàn pinpẹn de; tlolo he a vẹvẹ, a na de agbàn enẹ sọn kọ̀ji

 Be vẹvivẹ nọ biọ vivẹnudido wẹ ya? Gbau! Dena, yèdọ yọnnu de he ko vẹvẹ whlasusu, na e ko ṣihodọ na onọ̀ etọn wutu, yigbe dọ: “E ma nọ bọawu nado dọ ‘jaale.’ E nọ taidi dọ nude wẹ ján do vẹ́go mẹ na mi, bọ n’ma gán dọho!”

 Lehe a gán dọ “jaale” do

  •   Eyin e yọnbasi, yì mọ mẹlọ tlọlọ nado vẹvẹ. Eyin a vẹvẹna mẹlọ nukun-sọ-nukun, e na mọ obá he mẹ nulọ vẹna we jẹ. Mẹlọ gán nọma mọdọ vẹvẹ wẹ a te nugbonugbo eyin a kanwe gbọn alokan kavi Intẹnẹt ji. Eyin yẹdide awubla tọn lẹ tlẹ zọnpọ hẹ wekanhlanmẹ towe, vẹvivẹ towe sọgan nọma do ahundopo towe hia.

     Ayinamẹ: Eyin a ma gán yì mọ mẹlọ tlọlọ nado vẹvẹ, vlavo a gán ylọ ẹ to alokan ji kavi do kalti he bẹ vẹvivẹ towe hẹn de hlan ẹn. Mahopọnna aliho vẹvivẹ tọn depope he a de, yí sọwhiwhe do ṣinyan hogbe he a na zan lẹ.

     Nunọwhinnusẹ́n Biblu tọn: “Ahun dodonọ tọn nọ lẹnayihamẹpọn whẹpo do gblọnho.”—Howhinwhẹn lẹ 15:28.

  •   Nọ yawu vẹvẹ. Dile whẹho de gbọṣi aimẹ bo ma yin dididẹ dẹnsọ, mọ wẹ nuhe jọ lọ na taidi onú sinsinyẹn de do niyẹn, podọ mọ wẹ a ma na voawu hẹ mẹhe a gbleawuna lọ do niyẹn.

     Ayinamẹ: Basi tito de—di apajlẹ, a sọgan dọ ‘N’na vẹvẹ to egbé.’ Magbe gànmẹ he na yọ́n hugan tọn; bo yinuwa sọgbe hẹ gbemima towe.

     Nunọwhinnusẹ́n Biblu tọn: “Yawu gbọwhẹ.”—Matiu 5:25.

  •   Nọ vẹvẹ sọn ahun mẹ. Nado dọ “Jaale, e vẹna mi dọ a do numọtolanmẹ enẹ” ma yin vẹvivẹ! “To paa mẹ, mẹhe a ṣinuwa do lọ na na we sisi, eyin e mọdọ a kẹalọyi nuhe a ṣiwà lọ to gigọ́ mẹ,” wẹ yọnnu de he nọ yin Janelle dọ.

     Ayinamẹ: Ma nọ ze vẹvivẹ towe plá okọ̀ na nude blo. Ma nọ dọ dọ, a mọ, “Eyin a ma vẹvẹna nuṣiwa towe, yẹnlọsu ma na vẹvẹ.”

     Nunọwhinnusẹ́n Biblu tọn: “Mì gbọ mí ni doafọna nuhe nọ hẹn jijọho wá lẹ.”—Lomunu lẹ 14:19.

^ Eyin a hẹn nutindo mẹde tọn bu kavi hẹn ẹn gble, e na yọ́n dọ a ni vẹvẹ bo yí nude wà nado jla nulọ do kavi suahọ de do otẹn etọn mẹ.