Diblayin whẹndo lẹpo wẹ nọ do osẹ́n yetọn, vlavo gando ogàn he mẹ yè dona nọ gọwá whégbè go, lehe yè dona nọ zan alokan po onú mọnkọ lẹ po do, lehe yè dona nọ yinuwa hẹ mẹdevo lẹ do, po mọmọ po sọyi.

 Bọ eyin a gbàsẹ́n whẹndo lọ tọn de lo? A ma gán diọ nue ko jọ lọ, amọ́ a gán yí nude wà bọ nulẹ ma na vantan. Hosọ ehe na do lehe a gán wàmọ do hia we.

•  Nue a ma dona wà

•  Aliho de he pọnte hugan

•  Nuhe ogbẹ́ towe lẹ nọ dọ

•   Eyin mẹjitọ towe lẹ ma yọnẹn dọ a gbàsẹ́n de, a gán jlo na ṣinyọnnudo nue a wà lọ.

•   Eyin yé yọnẹn dọ a gbàsẹ́n de, a gán jlo na dín whẹjijọ kavi dowhẹ mẹdevo.

 Depope to linlẹn enẹlẹ mẹ ma sọgbe. Etẹwutu? Na eyin a ṣinyọnnudo nue a wà kavi dín whẹjijọ he ma to owhé lẹ, enẹ na dohia dọ a ma whèwhín. Mẹjitọ towe lẹ na mọdọ zinzin gbẹ́ pò na we.

 “Lalodido ma nọ yin pọngbọ lọ. Nugbo lọ na wá tọ́n janwẹ bọ yè na dọ̀n otó na we hú lehe e dona yin do eyin a ko dọ nugbo do mẹwhenu.”—Diana.

•   Nọ yigbe nue a wà tọn. Biblu dọmọ: “Mẹhe to nuṣinyọndo nuṣiwa etọn lẹ ma na tindo kọdetọn dagbe.” (Howhinwhẹn lẹ 28:13) Mẹjitọ towe lẹ yọnẹn dọ a na ṣinuwa janwẹ. Din, kanbiọ lọ wẹ yindọ, Be a na nọ dọ nugbo ya?

   “Mẹjitọ towe lẹ na wà dẹẹdẹ hẹ we eyin a dọ nugbo. Eyin a nọ dọ lehe nulẹ yì do, yé na nọ yí ohó towe lẹ sè.”—Olivia.

•   Nọ vẹvẹ. Biblu dọmọ: “Nọ yí whiwhẹ dogo.” (1 Pita 5:5) E nọ biọ whiwhẹ ma nado dín whẹjijọ bo dọ “mì ma gblehomẹ blo.”

   “Nuṣiwa mẹhe nọ to whẹjijọ dín mapote lẹ tọn gán nọma wá di nude na yé ba. To nukọn mẹ, nue ma sọgbe wiwà ma nasọ nọ dotukla yé ba.”—Heather.

•   Nọ kẹalọyi nue nuṣiwa towe ji lẹ. Biblu dọmọ: “Nọ dotoaina mẹplọnlọ.” (Howhinwhẹn lẹ 8:33) Ma nọ mọhodọdonugo blo. Nọ kẹalọyi osẹ́n depope he mẹjitọ towe lẹ do na we.

   “Eyin yè dọ̀n otó na we bọ a nọ to homọdọ, a na hẹn ninọmẹ towe vantan poun wẹ. Tẹnpọn bo nọ hodo osẹ́n he yè do na we lọ lẹ, bo ma nọ ze ayiha do nue a ma gán sọ wà lẹ ji blo.”—Jason.

•   Nọ dovivẹnu na yè nido gọjẹ jidedo gowe ji. Biblu dọmọ: ‘Klọ́n gbẹtọ-yinyin hoho lọ dai, ehe to kọndopọ mẹ hẹ aliho gbẹzan dai tọn towe.’ (Efesunu lẹ 4:22) Jẹ dagbe wà ji na mẹjitọ towe lẹ nido gọjẹ jidedo gowe ji.

   “Eyin a nọ de dide dagbe lẹ whẹwhẹ bo nọ dohia mẹjitọ towe lẹ dọ a ma na vọ́ nudopolọ ṣiwà, yé na gọjẹ jidedo gowe ji.”—Karen.

 AYINAMẸ: Nọ wà hugan nue yè biọ to asi we nado dohia dọ yè gán dejido gowe. Di apajlẹ, whedevonu he a na yì fide bo lẹkọja whégbè, ylọ mẹjitọ towe lẹ bo dike yé ni yọnẹn dọ a ko ja, eyin a ma tlẹ na gbọwhenu do gọ̀. Yé na mọdọ a jlo dọ yé ni gọjẹ jidedo gowe ji.