Linlẹn lọ nado tlọ́n whégbè gán yin awuvivinu bosọ dobunamẹ to ojlẹ dopolọ mẹ. Nawẹ a na wagbọn do yọnẹn dọ a ko penugo nado jẹ dewe si?

 Gbadopọnna whẹwhinwhẹ́n he wutu a jlo na wàmọ lẹ

Whẹwhinwhẹ́n susu wẹ gán zọ́n bọ a na jlo nado tọ́n sọn whégbè​—delẹ to yé mẹ sọgan nọma yin nuyọnẹnnu. Di apajlẹ, jọja sunnu de he nọ yin Mario dọmọ: “N’jlo na tlọ́n whégbè nado gán sọn azọ́ndenamẹ whégbè tọn lẹ si.”

Nugbo lọ wẹ yindọ e yọnbasi dọ mẹdekannujẹ vude ján a na tindo to whenue a tlọ́n whégbè. Onya, yèdọ owhe 18 mẹvi de dọmọ: “Eyin a tlọ́n whégbè, hiẹ lọsu wẹ dona penukundo fihe a na nọ go, dà núdùdù na dewe, penukundo akuẹzinzan lẹ go​—podọ mẹjitọ lẹ ma na to finẹ nado gọalọna we!”

Nuagokun lọ die: A dona yọ́n nuhewutu a jlo na tlọ́n whégbè, gbọnmọ dali a na yọnẹn eyin a ko wleawufo nado wàmọ.

 Lẹn akuẹ etọn

Jesu dọmọ: “Mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́ nado pọ́n eyin e tindo nuhe pé nado dotana ẹn?” (Luku 14:28) Nawẹ a gán “lẹn akuẹ” whégbè tintlọ́n tọn gbọn? Gbeje dewe pọ́n to adà he bọdego ehelẹ mẹ.

BE A YỌ́N AKUẸ ZAN YA?

Biblu dọmọ: “Akuẹ yin hihọ́ de.”​—Yẹwhehodọtọ 7:12.

  • Be e nọ vẹawuna we nado sẹ̀ akuẹ do ya?

  • Be a nọ ṣì akuẹ zan wẹ ya?

  • Be a nọ to akuẹ yàn mapote wẹ ya?

Eyin gblọndo towe yin mọwẹ na depope to kanbiọ ehelẹ mẹ, linlẹn lọ nado jẹ dewe si gán wá hẹn nuhahun lẹ plá we!

“Mẹdaho ṣie tlọ́n whégbè to whenue e tindo owhe 19. To owhe dopo gblamẹ, akuẹ he e sẹdo lẹpo vọ̀, mọto etọn yin yíyí sọn e si, e ma gán sọ yàn akuẹ ba, bọ e jẹ vẹvẹ ji nado lẹkọwa whégbè.”​—Danielle.

Nuhe a gán wà todin: Kanse mẹjitọ towe lẹ dọ akuẹ nẹmu nkọ wẹ yé nọ zan to osun dopo mẹ. Akuẹ nẹmu wẹ yé nọ sú to sunmẹ, podọ nawẹ yé nọ zan sunfó-kuẹ yetọn gbọn nado suahọ sunmẹsunmẹ tọn lẹ? Nawẹ yé nọ wagbọn do sẹ̀ akuẹ do?

Nuagokun lọ die: Pinplọn nado yọ́n lehe yè nọ zan akuẹ do todin he a pò to whégbè na zọ́n bọ a na wleawufo nado duto nuhahun akuẹzinzan tọn lẹ ji to whenue a na wá jẹ dewe si.

BE A NỌ DOMẸPLỌNLỌ DEWE GO YA?

Biblu dọmọ: “Mẹdopodopo wẹ na hẹn agbàn edetiti tọn.”​—Galatianu lẹ 6:5.

  • Be a nọ hẹn nulẹ dọngbàn wẹ ya?

  • Be mẹjitọ towe lẹ wẹ nọ flinnu we whẹpo a nọ wà whégbè-zọ́n lẹ ya?

  • Be a nọ saba wá whégbè to gàngodo, yèdọ zẹ̀ dogbó gànmẹ he mẹjitọ towe lẹ zedai tọn go ya?

Eyin gblọndo towe yin mọwẹ na depope to kanbiọ ehelẹ mẹ, e gán wá vẹawuna we taun nado pé dewe ji to whenue a jẹ vò.

“To whenue yè jẹ mẹdetiti si, nudelẹ tin he a gán nọma yiwanna sọmọ ganṣo a dona wà. Mẹde ma na dọna we dọ a ni wà onú enẹlẹ, enẹwutu a dona domẹplọnlọ dewe go bo penugo nado nọ wà yé to gbesisọ mẹ.”​—Jessica.

Nuhe a gán wà todin: Na osun dopo blebu, tẹnpọn nado nọ wà nudelẹ he ma yin bibiọ to asi we dandan to whégbè. Di apajlẹ, hẹn owhé lọ do wiweji na dewe, yàn avọ̀ towe lẹ, yì whleahi, dà núdùdù to ozán dopodopo mẹ bo klọ́ panu lẹ to enẹgodo. Mọwiwà na zọ́n bọ a na yọ́n nuhe a dona pehẹ to whenue a jẹ dewe si lẹ.

Nuagokun lọ die: Mẹplọnlọ dido mẹdetiti go yin dandannu eyin a wá jẹ dewe kannu.

Whégbè tintlọ́n matin awuwiwle jẹnukọn nọ taidi nado lọ́n sọn agahun mẹ bo ma plọn lehe yè nọ yí nuyizan he yè do nọ gbọn jẹhọn mẹ de zan do

BE A NỌ DUTO NUMỌTOLANMẸ TOWE LẸ JI YA?

Biblu dọmọ: “Mì dona gbẹ́ onú ehe lẹpo dai mlẹnmlẹn: homẹgble, adi, ylanwiwa gọna mẹzunzun.”​—Kolosinu lẹ 3:8.

  • Be e nọ vẹawuna we nado jẹ pọ́ hẹ mẹdevo lẹ wẹ ya?

  • Be e nọ vẹawuna we nado duto homẹgble ji wẹ ya?

  • Be a nọ saba jlo dọ nulẹ ni yin wiwà dile hiẹ jlo do wẹ ya?

Eyin gblọndo towe yin mọwẹ na depope to kanbiọ ehelẹ mẹ, a gán mọdọ e na vẹawuna we nado nọ họmẹ hẹ mẹdevo​—kavi, to nukọn mẹ, hẹ alọwlemẹ towe.

“Pọninọ hẹ mẹdevo lẹ ko zọ́n bọ n’yọ́n awugbopo ṣie lẹ. N’wá plọn dọ n’ma gán nọ donukun dọ mẹhe pò lẹ ni nọ kẹalọyi dọ ma nọ gblehomẹ na numadinu lẹ to whenue n’to kọgbidinamẹ glọ. N’dona dín aliho dagbe de nado nọ duto dee ji to whenue n’to kọgbidinamẹ glọ.”​—Helena.

Nuhe a gán wà todin: Plọn nado nọ jẹ pọ́ hẹ mẹjitọ towe lẹ, mẹdaho towe lẹ po nọvi towe lẹ po. To popolẹpo mẹ, lehe a nọ duto awugbopo mẹhe po hiẹ po topọ todin lẹ tọn ji do wẹ na do lehe a na wàmọ hẹ mẹhe po hiẹ po na wá nọpọ́ to nukọn mẹ lẹ do hia.

Nuagokun lọ die: Nado Jẹ dewe si ma yin aliho de nado gán sọn nuhe a dona wà lẹ mẹ​—azọ́nyinyọnẹn he nọ biọ awuwiwle de wẹ. Naegbọn a ma na kanhose mẹhe ko tindo kọdetọn dagbe to e mẹ lẹ? Kanse yé dọ eyin yé lẹnnupọn yigodo, etẹwẹ yé dona ko wà whẹpo do tlọ́n whégbè kavi etẹwẹ yé na ko jlo na yọnẹn to whenẹnu ehe yé ko wá yọnẹn todin. Nudagbe de niyẹn he a sọgan wà gando nudide titengbe depope he a na jlo na basi go!