Yì hosọ lẹ ji

ZẸẸMẸ WEFỌ BIBLU TỌN LẸ TỌN

Jenẹsisi 1:26—“Gbọ Mí Ni Basi Gbẹtọ to Apajlẹ Mítọn Mẹ”

Jenẹsisi 1:26—“Gbọ Mí Ni Basi Gbẹtọ to Apajlẹ Mítọn Mẹ”

 “Enẹgodo, Jiwheyẹwhe dọmọ: ‘Gbọ mí ni basi gbẹtọ to apajlẹ mítọn mẹ, he na taidi mí, podọ yé ni dugán do whèvi hùmẹ tọn lẹ, nudida he nọ zlọn to agahomẹ lẹ, kanlin whégbè tọn lẹ, aigba lọ blebu gọna kanlin he nọ lìn to aigba ji lẹpo ji.’”—Jenẹsisi 1:26, Lẹdogbedevomẹ Aihọn Yọyọ Tọn.

 “Jiwheyẹwhe sọ dọmọ, ‘Gbọ mí ni basi gbẹtọ to boṣiọ mítọn mẹ, to apajlẹ mítọn mẹ: bo gbọ yé ni duahọlu to whèvi ohù mẹ tọn ji, podọ to ohẹ̀ aga tọn ji, po to whékanlin ji, po to aigba lẹpo ji, po to núlìnlìn he nọ tin to aigba ji lẹ po.’”—Jenẹsisi 1:26, Biblu Wiwe lọ—Gun Alada.

Zẹẹmẹ Jenẹsisi 1:26 Tọn

 Gbẹtọvi lẹ yin didá to apajlẹ Jiwheyẹwhe tọn mẹ, enẹwutu yé gán plọn nado nọ do jẹhẹnu Jiwheyẹwhe tọn delẹ hia, taidi owanyi po awuvẹmẹ po bosọ nọ yinuwa po dodo po. Enẹ wẹ zọ́n bọ gbẹtọvi lẹ gán yinuwa di Jiwheyẹwhe nkọ.

 “Jiwheyẹwhe dọmọ: ‘Gbọ mí ni basi gbẹtọ to apajlẹ mítọn mẹ.’” Whẹpo Jehovah Jiwheyẹwhe a do dá mẹdepope kavi nudepope, e dá angẹli huhlọnnọ de, enẹ wẹ Jesu. Gbọn ewọ gblamẹ wẹ “nudevo lẹpo yin didá te to olọn mẹ podọ to aigba ji.” (Kolosinu lẹ 1:16) Jesu nọ wànu di Jehovah, na “ewọ wẹ yin apajlẹ Jiwheyẹwhe mayinukundomọ lọ tọn.” (Kolosinu lẹ 1:15) Enẹwutu, e sọgbe dọ Jiwheyẹwhe ni dọna Jesu dọ: “Gbọ ni basi gbẹtọ to apajlẹ mítọn mẹ.”

 ‘Yé ni dugán do kanlin whégbè tọn lẹ po aigba lọ blebu po ji.’ Kanlin lẹ ma yin didá to apajlẹ Jiwheyẹwhe tọn mẹ. Yè ma dá yé nado nọ yinuwa dile gbẹtọ lẹ nọ wà do. Yé ma nọ do owanyi hia mọ yé ma do ayiha he na zọ́n bọ yé na yọ́n dagbe dovo na oylan. Etomọṣo, Jiwheyẹwhe nọ hò kanlin lẹ tọn pọ́n. Enẹ wẹ zọ́n bọ e do degbe dọ gbẹtọvi lẹ “ni dugán” do yé ji. Biblu delẹ sọ lilẹ́ gbedide ehe do “paṣẹ” do (Mawuhowema Fọngbe tọn). Enẹwutu, azọ́n wẹ Jehovah to didena gbẹtọvi lẹ nado nọ penukundo kanlin lẹ go. (Salmu lẹ 8:6-8; Howhinwhẹn lẹ 12:10) Jehovah nọ donukun dọ gbẹtọvi lẹ ni nọ penukundo aigba po nutogbẹ̀ he to e ji lẹ po go ganji.

Nujijọ He Lẹdo Jenẹsisi 1:26 Lẹ

 Weta awe he jẹnukọn to owe Jenẹsisi tọn mẹ lẹ dọ lehe wẹkẹ lọ, aigba po nutogbẹ̀ he to e ji lẹ po yin didá do. Nue Jehovah dá lẹpo wẹ jiawu, amọ́ gbẹtọvi lẹ wẹ jiawu hugan to nuhe e dá do aigba ji lẹ mẹ. Whenue Jiwheyẹwhe ko dá nulẹpo godo, e mọ “nuhe e ko basi lẹpo podọ pọ́n! e yọ́n tlala.”—Jenẹsisi 1:31.

 Pọ́n video kleun ehe nado plọnnu dogọ do nuhe Jiwheyẹwhe dá bọ owe Jenẹsisi tọn dọho etọn lẹ ji.

Linlẹn agọ̀ lẹ gando Jenẹsisi 1:26 go

 Linlẹn agọ̀: Sunnu lẹ kẹdẹ wẹ gán nọ yinuwa di Jiwheyẹwhe nkọ, e ma gán pà yọnnu lẹ.

 Nugbo lọ: Gbẹtọ lẹpo, enẹ wẹ sunnu po yọnnu po wẹ hogbe Heblugbe tọn dowhenu tọn he yè lilẹdo “gbẹtọ” to alọdlẹndo. Sunnu po yọnnu po bi wẹ gán nọ yinuwa di Jiwheyẹwhe nkọ. Yemẹpo wẹ Jiwheyẹwhe gán dona, podọ yemẹpo wẹ gán mọ ogbẹ̀ madopodo.—Johanu 3:16.

 Linlẹn agọ̀: Agbasa gbẹtọ tọn nkọ wẹ Jiwheyẹwhe do.

 Nugbo lọ: “Gbigbọ wẹ Jiwheyẹwhe,” enẹwutu e ma nọ nọ̀ wẹkẹ he mí nọ mọ po nukun po ehe mẹ. (Johanu 4:24) Nugbo wẹ dọ to whedelẹnu, Biblu nọ dọhodo nukunmẹ etọn, alọ etọn, ahun etọn po nudevo lẹ po ji, amọ́ apajlẹ lẹ wẹ onú ehelẹ yin nado plọnnu mí gando Jiwheyẹwhe go to aliho he mẹ gbẹtọvi gán mọnukunnujẹ de mẹ.—Eksọdusi 15:6; 1 Pita 3:12.

 Linlẹn agọ̀: Jenẹsisi 1:26 dohia dọ Jesu wẹ yin Jiwheyẹwhe.

 Nugbo lọ: Jiwheyẹwhe po Jesu po vẹ́ taun, dile otọ́ de po ovi etọn po nọ vẹ́ do, amọ́ yé ma yin mẹdopolọ. Jesu plọnmẹ dọ Jiwheyẹwhe yiaga hugan emi. (Johanu 14:28) Eyin a jlo na yọ́n nususu dogọ, pọ́n video lọ Be Jesu Klisti Wẹ Jiwheyẹwhe Ya? A gán sọ hia hosọ lọ “Naegbọn Jesu Do Nọ Yin Yiylọdọ Visunnu Jiwheyẹwhe Tọn?

 Pọ́n video kleun ehe nado mọ nue to owe Jenẹsisi tọn mẹ delẹ.

a Jehovah wẹ yinkọ Jiwheyẹwhe tọn. (Salmu lẹ 83:18) Hia hosọ lọ “Mẹnu Wẹ Yin Jehovah?