Yì hosọ lẹ ji

“Otẹn Tin Na Yọnnu lẹ to Azọ́n Họ̀gbigbá Tọn Mẹ”

“Otẹn Tin Na Yọnnu lẹ to Azọ́n Họ̀gbigbá Tọn Mẹ”

Titobasinanu họ̀gbigbá tọn nukundeji Grande-Bretagne tọn de pà Kunnudetọ Jehovah tọn lẹ, na yé plọnazọ́n yọnnu lẹ nado nọ yí maṣinu họ̀gbigbá tọn dahodaho lẹ zan to fie yé to alahọ yọyọ yetọn gbá do sẹpọ tòdaho Chelmsford tọn to Essex. Titobasinanu lọ (Considerate Constructors Scheme kavi CCS) * na pipà daho hugan​—yèdọ 10 to 10 ji​—Kunnudetọ lẹ na aliho he mẹ mí nọ plọnazọ́n yọnnu lẹ nado tindo mahẹ to azọ́n họ̀gbigbá tọn mẹ te bo tlẹ dlẹnalọdo aliho azọ́nplọnmẹ tọn mítọn di “nuyọyọ de.” Naegbọn mí do yin pipà sọmọ?

To Grande-Bretagne, yọnnu 13 poun to kanweko ji wẹ nọ tindo mahẹ to azọ́n họ̀gbigbá tọn mẹ. Dodinnanu azọ́nwhé Grande-Bretagne tọn de tọn dohia dọ yọnnu vude poun wẹ nọ lẹnnupọndo azọ́n họ̀gbigbá tọn ji taidi agbasazọ́n de. To vogbingbọn mẹ, nudi 40 to kanweko ji mẹhe to azọ́nwa to Chelmsford lẹ tọn wẹ yin yọnnu. Podọ na nuhe dù mẹhe nọ zan maṣinu dahodaho lẹ, sọha lọ tlẹ sọ yiaga hú 60 to kanweko ji.

Yọnnu lẹ to azọ́nwa to pọmẹ hẹ sunnu lẹ to Chelmsford

Etẹwẹ nọ gọalọna yọnnu Kunnudetọ enẹlẹ nado wazọ́n mọnkọ po kọdetọn dagbe po? Azọ́nplọnmẹ po godonọnamẹ po nọ yí adà titengbe de wà. Onú awe enẹlẹ sọ yin delẹ to nubiọtomẹsi azọ́nwhé CCS lọ tọn lẹ mẹ. Nubiọtomẹsi he yé zedai lẹ nọ whàn azọ́nwhé họ̀gbigbá tọn lẹ nado dohia dọ yé yọ́n pinpẹn mẹhe to azọ́nwa na yé lẹ tọn “gbọn hinhẹn ẹn diun dali dọ azọ́nwatọ yetọn lẹpo yin nuyiwa hẹ po sisi po matin mẹnukuntahihopọn, bosọ nọ mọ tuli po godonọnamẹ po yí,” gọna “azọ́nplọnmẹ.”

Azọ́npinplọn Yọnnu lẹ Nado Yí Maṣinu Dahodaho lẹ Zan

Jade, dopo to yọnnu lọ lẹ mẹ he mọ azọ́nplọnmẹ yí nado nọ deanana maṣinu he yè do nọ kùndò po gbóbẹ-hún lẹ po dọmọ: “E jiawu taun! N’ma lẹn pọ́n gbede dọ n’gán wazọ́n mọnkọ. To whedelẹnu azọ́n lọ nọ kàn dẹpẹ biọ taun, amọ́ n’nọ mọ azọ́nplọnmẹ yí whẹwhẹ bo nọ plọn nuyọyọ devo lẹ.” Taidi Jade, Lucy lọsu ko plọn nado nọ deanana maṣinu daho lẹ todin. E flindọ: “Tlolo he n’wá, n’mọdọ azọ́n he n’gán wà de ma fi. Amọ́ bẹsọn gbenẹgbe janwẹ n’ko jẹ azọ́nplọnmẹ mọyi ji. Sọn whenẹnu gbọ́n, n’ko wazọ́n hẹ pipli voovo atọ́n, enẹwutu azọ́nplọnmẹ he n’mọyi lẹ sù taun!”

Yọnnu de to azọ́nplọnmẹ mọyi nado deanana maṣinu he nọ ze agbàn

Nugopipe yọnnu he to azọ́n lọ wà lẹ tọn ma nọte do anadidena maṣinu dahodaho lẹ kẹdẹ ji. Anadenanutọ pipli de tọn he nọ yin Eric dọ dọ: “Yọnnu lẹ nọ penukundo azọ́nwanu lẹ go hú sunnu lẹ, podọ yé sọ nọ yawu doayi e go eyin maṣinu yetọn do nuhahun de bo nọ dọ ẹ do mẹwhenu.”

Godoninọna Yọnnu lẹ to Azọ́n Họ̀gbigbá Tọn Mẹ

Carl, he nọ deanana pipli voovo he nọ zan maṣinu dahodaho lẹ dọmọ: “Aliho he mẹ yọnnu lẹ ko plọn nado nọ kùn maṣinu dahodaho lọ lẹ te yinuwado ji e taun. To whedelẹnu, n’nọ de yọnnu lẹ nado kùn maṣinu lọ lẹ kakati nado de sunnu he tindo numimọ lẹ!”

Yọnnu de to maṣinu de yizan nado tlẹ́ lọba he mẹ osin nọ gbọn lẹ dopọ

Eyin anadenanutọ pipli dopodopo tọn nọ na tuli mẹhe to azọ́nwa hẹ ẹ lẹ, enẹ nọ vọ́ jide na yé. Ninọmẹ he mẹ Therese mọ ede te niyẹn. Taidi maṣinu kùntọ numimọnọ de, e yọnẹn dọ azọngban pinpẹn de wẹ maṣinu dahodaho lẹ yiyizan yin, ehe nọ biọ dọ yè ni yí sọwhiwhe do basi nudide he gando hihọ́ go lẹ. Therese dọmọ: “Eyin n’mọdọ n’tindo godonọnamẹ mẹhe to anadena pipli mítọn tọn, n’nọ wazọ́n hú lehe e biọ do na n’nọ mọdọ yè dejido go e wutu. Nude ma yọ́n hugan nado mọdọ mẹlẹ yọ́n pinpẹn azọ́n ṣie tọn bo tindo pọndohlan dagbe gandego!”

Abigail, he ewọ lọsu nọ deanana maṣinu he yè do nọ kùndò po gbóbẹ-hún lẹ po do pinpẹn-nutọn-yinyọnẹn hia na godonọnamẹ he e nọ mọyi po gbekọndopọ he tin to azọ́nwatọ lọ lẹ ṣẹnṣẹn po dọmọ: “Sunnu he to azọ́nwa tofi lẹ ma nọ yinuwa hẹ mi di mẹhe whè hú yé. Yé nọ wleawufo nado gọalọna mi, amọ́ yé ma nọ tẹnpọn nado yí azọ́n lọ wà do otẹn ṣie mẹ. Yé nọ dike yẹnlọsu ni zindonukọn to azọ́n lọ mẹ.”

Azọ́nwatọ He Nọ Wazọ́n po Ahundopo po Matin Ayihafẹsẹnamẹ

Gbọnvona anadidena maṣinu dahodaho voovo lẹ, yọnnu he to azọ́nwa to Chelmsford lẹ ko mọ azọ́nplọnmẹ yí nado wà nudevo delẹ taidi aigba jijlẹ, azọ́nwanu lẹ yiyizan to aliho dagbe mẹ, maṣinu lẹ jijlado gọna aliyá lẹ biblá nado wazọ́n to aga. Robert, he ko wazọ́n hẹ yọnnu lẹ to adà voovo lẹ mẹ dọ dọ yé nọ wazọ́n “matin ayihafẹsẹnamẹ, bo nọ to jejeji nado jẹ azọ́n ji bosọ nọ na ayidonugo onú flinflin lẹpo.” Tom, he nọ wazọ́n hẹ mẹhe nọ jlẹ aigba lẹ, yidogọ dọ: “Yọnnu he to pipli ṣie mẹ lẹ nọ yí ahundopo do wazọ́n lọ dile e jẹ do. Yé nọ jlo dọ azọ́n lọ ni mẹ́.”

Abajọ anadenanutọ pipli de tọn he nọ yin Fergus yí ayajẹ do dọmọ: “Nado dọ hójọhó, otẹn tin na yọnnu lẹ to azọ́n họ̀gbigbá tọn mẹ!”

^ huk. 2 Azọ́nwhé lọ CCS yin titobasinanu he to edekannu de he yanwle etọn yin nado hẹn aliho he mẹ azọ́n họ̀gbigbá tọn lẹ nọ yin wiwà te to Grande-Bretagne pọnte dogọ.