Yì hosọ lẹ ji

Be Kunnudetọ Jehovah Tọn lẹ Nọ Gbẹ́ Nado Yí Vaccin Wẹ Ya?

Be Kunnudetọ Jehovah Tọn lẹ Nọ Gbẹ́ Nado Yí Vaccin Wẹ Ya?

 Paali. Kunnudetọ Jehovah tọn lẹ ma nọ jẹagọdo lọmba gbigbò (vaccination). Mí nọ pọ́n lọmba gbigbò di nudide he Klistiani dopodopo dona bayi na ede. Mẹsusu to Kunnudetọ Jehovah tọn lẹ mẹ wẹ ko de nado gbò lọmba.

 Nukunpedomẹgo dotowhé tọn he yọ́n taun lẹ wẹ mí nọ dín, podọ mí sọ nọ yọ́n pinpẹn nukọnyiyi dotozọ́nwiwa tọn nado de owù azọ̀n sinsinyẹn bibẹ tọn pò. Homẹ mítọn sọ nọ hùn taun do azọ́n sinsinyẹn he doto lẹ to wiwà go, titengbe to whenue ninọmẹ he kàn dẹpẹ biọ lẹ fọ́n.

 Kunnudetọ Jehovah tọn lẹ nọ kọngbedopọ hẹ ahọluzọnwatọ he nọ penukundo agbasalilo go lẹ. Di apajlẹ, sọn whenue gbọ́n COVID-19 ko jẹ núgbà ji, Kunnudetọ Jehovah tọn lẹ ko de nuflinmẹ lẹ tọ́n to ogbè kanweko susu mẹ to nọtẹn Intẹnẹt tọn ehe ji, bo nọ na tuli mẹlẹ nado nọ setonuna ayinamẹ hihọ́ tọn he yin nina to lẹdo yetọn mẹ lẹ. Ayinamẹ ehelẹ bẹ olá ninọ na ode awetọ hẹn, gọna tonusisena osẹ́n he yin nina gando pipli dopọ lẹ go, mẹginglọn do họmẹ, alọkiklọ́, nuṣinyọndo awọntin po onú devo he aṣẹpatọ lẹ biọ dọ yè ni wà lẹ po.—Lomunu lẹ 13:1, 2.

 Na owhe susu lẹ, zinjẹgbonu Kunnudetọ Jehovah tọn lẹ tọn ko zinnudo ayinamẹ he to odò ehelẹ ji:

  •   Nudide mẹdetiti tọn wẹ nukunpedomẹgo dotowhé tọn yin.—Galatianu lẹ 6:5.

     “[Linlinwe ehe] ma nọ na ayinamẹ amasin de tọn, mọ e masọ nọ dohia dọ nukunpedomẹgo de pọnte hú devo, podọ e masọ nọ na ayinamẹ do amasinzọnwiwa ji. Yanwle etọn wẹ nado dọhodo nugbo he gando ninọmẹ de go lẹ ji bo na dotẹnmẹ wehiatọ lọsu nado bayi nudide na ede.”—Fọ́n! 8 février 1987 to Flansegbe mẹ.

     “Hiẹ lọsu wẹ na de eyin hiẹ po ovi towe lẹ po na gbò lọmba.”—Fọ́n! 22 août 1965 to Flansegbe mẹ.

  •   Mí nọ dín nukunpedomẹgo dotowhé tọn lẹ na ogbẹ̀ họakuẹ na mí taun wutu.—Owalọ lẹ 17:28.

     “Eyin Kunnudetọ lẹ to azọ̀njẹ yé nọ yì doto lẹ dè nado mọ nukunpedomẹgo yí. Yé yiwanna ogbẹ̀ bosọ nọ wà nudepope he sọgbe hẹ Owe-wiwe lẹ nado nọgbẹ̀ dẹn.”—Atọ̀họ̀-Nuhihọ́ lọ Tọn, 1er juillet 1975 to Glẹnsigbe mẹ.

     “Kunnudetọ Jehovah tọn lẹ nọ hùnhomẹ nado kẹalọyi amasin po nukunpedomẹgo dotowhé tọn lẹ po. Ojlo yetọn wẹ nado tindo agbasalilo dagbe bo nọgbẹ̀ dẹn. Na nugbo tọn, taidi Luku he yin Klistiani owhe kanweko tintan tọn de, Kunnudetọ Jehovah tọn delẹ yin doto. . . . Kunnudetọ Jehovah tọn lẹ nọ yọ́n pinpẹn azọ́n sinsinyẹn po mẹdezejo mẹhe nọ wleawu nukunpedomẹgo dotowhé tọn lẹ po tọn. Yé sọ nọ yọ́n pinpẹn kọgbọ he omẹ enẹlẹ nọ gọalọna yé nado mọ sọn azọ̀n si tọn.”—Atọ̀họ̀-Nuhihọ́ lọ Tọn, 1er avril 2011.