To whedelẹnu, hogbe lọ sọgan yin yiyizan na sunnu he yè sá. To ojlẹ Biblu tọn lẹ mẹ, yè nọ sá sunnu delẹ nado sayana yé, kavi na yé yin wiwle taidi kanlinmọ wutu. Sunnu he go yè dejido bọ yè ko sá lẹ nọ penukundo owhé yọnnu he nọ nọ̀ họ̀nmẹ ahọlu tọn lẹ tọn go. Di apajlẹ, azọ́n he Hegai po Ṣaaṣigazi po he yin ojọ̀ nọ wà wẹ nado yin hihọ́tọ asi podọ asi mọwhlá Ahọlu Ahasuelusi Pẹlsia tọn. Vlavo ahọlu ehe wẹ Xerxès I.—Ẹsteli 2:3, 14.

Ṣigba, e ma yin mẹhe Biblu ylọdọ ojọ̀ lẹpo wẹ yè sá. Weyọnẹntọ delẹ dọ dọ hogbe lọ sọ nọ yin yiyizan to aliho he gbloada mẹ bo nọ dlẹnalọdo ahọluzọnwatọ họ̀nmẹ ahọlu tọn lẹ. E taidi dọ linlẹn ehe mẹ wẹ hogbe lọ yin yiyizan na Ebẹdi-melẹki te, yèdọ gbẹdohẹmẹtọ Jelemia tọn, podọ na Etiopianu he yinkọ etọn ma yin nùdego bọ wẹndagbe-jlatọ Filippi dọyẹwheho na. Ebẹdi-melẹki na ko yin ahọluzọnwatọ nukundeji de, na e nọ yì Ahọlu Zedekia dè tlọlọ. (Jelemia 38:7, 8) Na nuhe dù Etiopianu lọ, Biblu dọ dọ e nọ penukundo adọkun ahọlu tọn lẹ go, bosọ dohia dọ e “yì Jelusalẹm nado basi sinsẹ̀n.”—Owalọ lẹ 8:27.

To whenue Jesu to hodọ gando ojlẹ whẹdida sọgodo tọn de go, e dọmọ: “To whenuena Visunnu gbẹtọ tọn na wá to gigo etọn mẹ, . . . e na klan gbẹtọ lẹ dovo, yèdọ ode sọn awetọ go, kẹdẹdile lẹngbọhọtọ de nọ klan lẹngbọ lẹ sọn gbọgbọẹ lẹ go do.” (Matiu 25:31, 32) To paa mẹ, naegbọn lẹngbọhọtọ lẹ nọ klan kanlin enẹlẹ dovo?

To okle, lẹngbọhọtọ lẹ nọ deanana lẹngbọ lẹ po gbọgbọẹ lẹ po bo nọ jo yé do bọ yé nọ dù amà dopọ. To zánmẹ, yé nọ bẹ yé do apó mẹ nado basi hihọ́na yé sọn gbekanlin ylankan lẹ, ajotọ lẹ po jẹhọn po si. (Gẹnẹsisi 30:32, 33; 31:38-40) Ṣigba, lẹngbọ po gbọgbọẹ lẹ po ma nọ yin bibẹdo apó dopolọ mẹ. Ehe nọ zọ́n bọ gbọgbọẹ he ylanhùn lẹ ma nọ gbleawuna lẹngbọ abọẹ-abọẹ lẹ, titengbe lẹngbọ asi lẹ po lẹngbọvu lẹ po. Owe de dohia dọ lẹngbọhọtọ lẹ ma nọ kọ̀n lẹngbọ lẹ dopọ hẹ gbọgbọẹ lẹ “na vijiji, [kavi] to whenue yé jlo na finyọ́n anọ́sin na yé, podọ to whenue yé jlo na pà ofún yetọn.” (Owe lọ All Things in the Bible) Na taun tọn, apajlẹ he Jesu na tindo kanṣiṣa hẹ nuhe gbẹtọ lẹ nọ mọ kavi nọ wà to Islaeli hohowhenu tọn, na yé nọ saba mọ lẹngbọhọtọ lẹ po lẹngbọ lẹ po.