Dọnsẹpọ Jiwheyẹwhe

Mẹhe Yiwanna Whẹdida Dodo

Heblu lẹ 10:26-31

BE HIẸ ko jiya whẹdida mawadodo kavi nuyiwahẹmẹ kanyinylan tọn, vlavo to alọ mẹhe ma kiya bọ e taidi dọ e ko dù dọ̀n de tọn mẹ pọ́n ya? Whẹdida mawadodo yin dopo to nuhe vẹawu nado doakọnna lẹ mẹ, titengbe eyin mẹhe dona yiwanna we kavi hò towe pọ́n de wẹ yinuwa hẹ we to aliho mọnkọtọn mẹ. Hiẹ sọgan kanse dewe dọmọ, ‘Naegbọn Jiwheyẹwhe do jotẹnna onú mọnkọtọn lẹ?’ a Nugbo lọ wẹ yindọ Jehovah Jiwheyẹwhe gbẹwanna whẹdida mawadodo wunmẹ lẹpo. Ohó etọn Biblu, na mí jide dọ Jiwheyẹwhe na sayana mẹhe yí tasinsinyẹn do to nuylankan wà lẹ. Mì gbọ mí ni gbadopọnna nuhe apọsteli Paulu dọ to Heblu lẹ 10:26-31 mẹ.

Paulu wlan dọmọ: “Eyin míwlẹ yọnẹn gan an bo wà oylan whenuena míwlẹ ko mọ oyọnẹn nugbo tọn yí godo, avọ́ na ylando ma tin ba gba.” (Wefọ 26) Mẹhe nọ waylando sọn ojlo mẹ lẹ wẹ Jiwheyẹwhe nọ gblewhẹdo hugan. Etẹwutu? Tintan, yé ma nọ waylando to mayọnẹnmẹ to ninọmẹ madogán tọn de mẹ—yèdọ nuṣiwa he mímẹpo nọ basi to whedelẹnu na mí yin mapenọ wutu. Yé ko yí ylanwiwa do do aṣa. Awetọ, yé nọ waylando sọn ojlo mẹ wá. Ylando ko doadọ̀do to ahun yetọn mẹ. Atọ̀ntọ, yé ma nọ waylando to wunvi mẹ. Yé tindo “oyọnẹn nugbo tọn” gando nubiọtomẹsi Jiwheyẹwhe tọn lẹ go.

Nukun tẹwẹ Jiwheyẹwhe nọ yí do pọ́n ylanwatọ kanylantọ he ma lẹnvọjọ lẹ? Paulu dọmọ: “Avọ́ na ylando ma tin ba gba.” Avọ́sinsan Klisti tọn—yèdọ nunina Jiwheyẹwhe tọn na gbẹtọvi lẹ—nọ ṣinyọnnudo ylando he mí nọ wà na mapenọ-yinyin mítọn wutu lẹ. (1 Johanu 2:1, 2) Ṣigba, ylanwatọ he ma lẹnvọjọ lẹ nọ dohia dọ yé ma tindo sisi na nunina họakuẹ ehe. To nukun Jiwheyẹwhe tọn mẹ, yé “yí afọ do zín Ovi Jiwheyẹwhe tọn dai, bosọ hia ohùn [Jesu tọn] di onú mawé [kavi onú tata] de.” (Wefọ 29) Gbọn nuyiwa yetọn lẹ dali, yé nọ dohia dọ yé gbẹwanna Jesu bo nọ pọ́n ohùn etọn hlan taidi onú tata, he ma yí nudepope do hugan ohùn gbẹtọvi mapenọ de tọn. Mayọndagbenọ mọnkọtọn lẹ ma sọgan mọaleyi sọn avọ́sinsan Klisti tọn mẹ gba.

Etẹwẹ to tepọn mẹylankan lẹ? Jiwheyẹwhe he nọ dawhẹ dodo dopagbe dọmọ: “Ahọsuyi wẹ ṣie, yẹn na suahọ.” (Wefọ 30) Na mẹhe peve to ylanwiwa mẹ bo to awugblena mẹdevo lẹ ni yọnẹn dọ mẹdepope ma sọgan gbà osẹ́n Jiwheyẹwhe tọn sọn ojlo mẹ bo dù dọ̀n gba. Yé nọ saba wá duale ylanwiwa yetọn tọn. (Galatianu lẹ 6:7) Eyin e ma tlẹ yinmọ todin, yé na dogbè na Jiwheyẹwhe to madẹnmẹ to whenuena e na de mawadodo lẹpo sẹ̀ sọn aigba ji. (Howhinwhẹn lẹ 2:21, 22) Paulu na avase dọmọ: “Onú dobu wẹ nado jai jẹ alọ Jiwheyẹwhe ogbẹ̀nọ tọn mẹ.”—Wefọ 31.

Nugbo lọ dọ Jehovah Jiwheyẹwhe ma nọ miyọnnukundo ylando he mẹde desọn ojlo mẹ bo wà, nọ miọnhomẹnamẹ bosọ nọ vọ́ jidenamẹ, titengbe na mẹhe ko yin awugblena gbọn ylanwatọ he ma tindo lẹblanu de dali. Mí sọgan dejido Jiwheyẹwhe go, mẹhe gbẹwanna whẹdida mawadodo lẹpo, bo jo ahọsuyíyí do alọ etọn mẹ mlẹnmlẹn.

[Nudọnamẹ odò tọn]