NA JỌJA LẸ
10: Nugbodidọ
NUHE E ZẸẸMẸDO
Mẹjitọ, họntọn po ogán lẹ po nọ dejido mẹhe nọ dọ nugbo lẹ go. Mẹhe nọ dọ nugbo nọ yìn osẹ́n, nọ depà etọn lẹ, bo ma nọ dolalo.
NUHEWUTU E YIN NUJỌNU
To ninọmẹ susu mẹ, lehe a ko nọ dọ nugbo sọ wẹ na zọ́n bọ yè na dejido gowe bo na we dotẹnmẹ nado wà nue a jlo delẹ.
“Eyin mẹjitọ towe lẹ na dejido gowe, a dona nọ dọ nugbo bo nọ wà nulẹ dile e jẹ do, e ma yin to whenue a topọ hẹ yé kẹdẹ, amọ́ to whenue yé ma tlẹ to fie a te.”—Jọja yọnnu de he nọ yin Sarahi.
AYINAMẸ BIBLU TỌN: “Mì nọ dindona mìde nado yọ́n mẹhe nkọ mìwlẹ yin.”—2 Kọlintinu lẹ 13:5.
NUHE A SỌGAN WÀ
Eyin a jlo dọ yè ni nọ dejido gowe dogọ, kavi dọ yè ni vọ́ jẹ jidedo gowe ji, nue bọdego lẹ gán gọalọ.
Nọ dọ nugbo. E na vẹawu dọ yè ni dejido gowe eyin a nọ dolalo. Amọ́, eyin a nọ dọ nugbo bo nọ yawu yigbe nuṣiwa towe lẹ tọn, mẹlẹ na nọ dejido gowe.
“E nọ bọawu nado dọ nugbo eyin nulẹpo to yìyì ganji. Amọ́ nugbodidọ to whenue a ṣinuwa na zọ́n bọ mẹlẹ na nọ dejido gowe.”—Jọja sunnu de he nọ yin Caiman.
AYINAMẸ BIBLU TỌN: “Mí jlo nado nọ yinuwa po ahundopo po to nulẹpo mẹ.”—Heblu lẹ 13:18.
Yin mẹhe go yè gán dejido. Dodinnanu Amelika tọn de dohia dọ mẹhe nọ yímẹ do azọ́nmẹ 78 to 100 ji wẹ dọ dọ jidedomẹgo yin “dopo to onú atọ̀n he azọ́nwhé lẹ nọ pọ́n whẹpo do yímẹ lẹ mẹ.” Eyin a plọn nado yin mẹhe go yè gán dejido todin, a na duale etọn to whenue a whẹ́n.
“Eyin n’yinuwa di mẹho bọ e ma biọ dọ mẹjitọ ṣie lẹ ni to ṣọ̀ṣọ̀ do na mi whẹpo mado wà whégbè-zọ́n ṣie lẹ, mẹjitọ ṣie lẹ nọ doayi e go. Eyin n’wà whégbè-zọ́n ṣie lẹ ganji, yé nọ dejido go e dogọ.”—Jọja yọnnu de he nọ yin Sarah.
AYINAMẸ BIBLU TỌN: “Yẹn deji dọ hiẹ na kọngbedopọ . . . , na yẹn yọnẹn dọ hiẹ na tlẹ wà hú nuhe yẹn dọ lẹ.”—Filemọni 21.
Nọ fahomẹ. Eyin mẹde to whinwhẹ́n, yè nọ yawu doayi e go, amọ́ e nọ saba biọ whenu nado doayi e go dọ mẹlọ jẹ awuwlena walọ dagbe ji.
“Nuyiwa dopo ma ko pé, na mẹjitọ towe lẹ kavi mẹdevo lẹ nido dejido gowe. Amọ́, yé na jẹ jidedo gowe ji vudevude eyin yé mọdọ a do aṣa nado nọ wanu di mẹho.”—Jọja sunnu de he nọ yin Brandon.
AYINAMẸ BIBLU TỌN: ‘Mì yí homẹfa dogo.’—Kolosinu lẹ 3:12.
A Gán Sọ Pọ́n Hosọ Ehelẹ
KANBIỌ HE JỌJA LẸ NỌ KANSE
Naegbọn N’Dona Nọ Dọ Nugbo?
Be e ma yin mẹhe nọ dolalo lẹ wẹ nọ mọaleyi hugan ya?
YẸDIDE ṢIṢAVI TỌN LẸ
Nawẹ N’Sọgan Nọ Dọho hẹ Mẹjitọ Ṣie lẹ Gbọn?
Nawẹ a gán dọho hẹ mẹjitọ towe lẹ gbọn eyin hodidọ ma tlẹ jlo we?
