Rosie dọ dọ: “N’nọ to nuhà gando nuhahun delẹ go sọmọ, bọ to ayiha ṣie mẹ, n’nọ mọdọ yè ma sọgan duto yé ji.” Wefọ Biblu tọn tẹlẹ wẹ gọalọna ẹn? Dopo wẹ Matiu 6:34, he dọmọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ. Tukla azán dopodopo tọn ko pé na ẹn.” Rosie wá dọ dọ hogbe Jesu tọn enẹlẹ gọalọna emi ma nado nọ hanú gando nuhe sọgan wá jọ to sọgodo lẹ go. E yidogọ dọ, “N’gbẹ́ nọ tindo nuhahun lẹ taidi dai tọn, amọ́ n’ma nọ hanú gando nuhe ma ko jọ bo tlẹ sọgan nọma wá jọ lẹ go.”

Yasmine lọsu mọdọ nuhahun etọn lẹ jẹ agbọ́ hú i ji. “Whlasusu wẹ n’nọ viavi to osẹ lọ mẹ bo ma tlẹ nọ mọ amlọndọ to ozán delẹ mẹ. N’mọdọ pọndohlan agọ̀ ko to dùdù to ji e pete.” Wefọ tẹwẹ gọalọna ẹn? E dọ dọ 1 Pita 5:7 wẹ, ehe dọmọ: “Mì to magbọjẹ mìtọn lẹpo bẹ dlan [Jiwheyẹwhe] ji, na e to mìtọn hòpọn wutu.” Yasmine dọmọ: “Dile ojlẹ to yìyì, n’nọ to dẹ̀ho hlan Jehovah bọ ewọ sọ nọ sè odẹ̀ ṣie lẹ. E taidi dọ agbàn pinpẹn de wẹ yin didesẹ sọn abọ́ ji na mi nkọ. N’gbẹ́ nọ tindo linlẹn agọ̀ to whedelẹnu, amọ́ n’ko yọ́n lehe n’na nọ duto yé ji do todin.”

Jọja yọnnu de he nọ yin Isabella dọmọ: “N’lẹndọ n’dugu nulẹ hinhẹn dọngbàn tọn wẹ, na otọ́ ṣie  lọsu tindo aṣa enẹ. N’nọ jo nuhe yin nujọnu lẹ do—bo nọ to aihunda kavi to televiziọn pọ́n. Aṣa ylankan wẹ, na e nọ zọ́n bọ yè nọ wá jẹ nuhà ji bo ma nọ wá wà nulẹ ganji.” Anademẹ he tin to 2 Timoti 2:15 wẹ gọalọna ẹn, ehe dọmọ: “Nọ wà nuhe go a pé lẹpo nado do dewe hia di mẹhe Jiwheyẹwhe kẹalọyi, yèdọ azọ́nwatọ de he ma nọ kuwinyan nudepope tọn.” Isabella dọ dọ, “N’ma jlo dọ winyan ni hù Jehovah, na n’nọ hẹn nulẹ dọngbàn wutu.” Enẹ zọ́n bọ e basi diọdo he jẹ.

Mọdopolọ, Kelsey basi zẹẹmẹ dọmọ: “N’nọ tindo azọ́n to aimẹ bo nọ jodo kaka bọ e nọ gbọwhenu. Whenẹnu, n’nọ jẹ avivi ji, bo nọ ba amlọn pò bosọ nọ jẹ nuhà ji. Ehe ma nọ wà dagbe na mi.” Kelsey mọ alọgọ to Howhinwhẹn lẹ 13:16 mẹ, ehe dọmọ: “Zinzintọ nọ yinuwa po oyọnẹn po, ṣigba, nulunọ nọ de nulú edetiti tọn gbà.” E dọ nuhe ayihamẹlinlẹnpọn do wefọ ehe ji plọn ẹn, dọmọ: “Nuyọnẹnnu wẹ e yin nado nọ basi tito bo nọ wleawu jẹnukọn. Todin, n’tindo kandai-wema de to tafo ṣie ji he mẹ n’nọ kàn azọ́n he to tepọn mi lẹ do, bọ ehe nọ gọalọna mi nado nọ basi tito dagbe bo ma nọ jo nulẹ do kaka bọ yé na wá gbọwhenu.”

“Asu ṣie họ̀n jo mi do bo jo ovi ẹnẹ do kọ̀ji na mi,” wẹ Kirsten dọ. Wefọ tẹwẹ gọalọna ẹn? Howhinwhẹn lẹ 17:17 wẹ, ehe dọmọ: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.” Kirsten dín alọgọ sọn mẹdevo lẹ he nọ sẹ̀n Jehovah hẹ ẹ dè. Nawẹ nulẹ yì do? “Họntọn ṣie lẹ gọalọna mi to aliho susu mẹ! Delẹ to yé mẹ nọ jo núdùdù po vounvoun lẹ po do ohọ̀n ji na mi. Whla atọ̀n wẹ họntọn lẹ doawhàn wá nado gọalọna yẹn po ovi ṣie lẹ po nado bẹagbàn sọn owhé de gbè yì devo gbè. Mẹdopo dín azọ́n na mi. Họntọn ṣie lẹ nọ gọalọna mi to whepoponu.”

Delphine he yin nùdego wayi lọsu pehẹ ṣokẹdẹninọ. To whenue e hẹn nulẹpo bu godo, e flin dọmọ: “E taidi dọ yè sú mi do ajà de mẹ wẹ nkọ bọ n’nọ mọ mẹdevo lẹ hlan dọ yewlẹ vò. N’nọ mọ dee to ṣokẹdẹ.” Wefọ he gọalọna ẹn wẹ Salmu lẹ 68:6, he dọmọ: “Jiwheyẹwhe nọ na ohọ̀ mẹhe to ṣokẹdẹ lẹ nado nọ nọ̀ e mẹ.” E basi zẹẹmẹ dọmọ: “N’yọnẹn dọ ohọ̀ he hodọ wefọ lọ te ma yin ohọ̀ jọnun de todin. Kakatimọ, n’wá mọnukunnujẹemẹ dọ ohọ̀ gbigbọmẹ tọn de wẹ he Jiwheyẹwhe nọ namẹ, yèdọ fie hihọ́ nujọnu tọn nọ tin te bọ kanṣiṣa dagbe nọ tin to agbasa-liho podọ to numọtolanmẹ-liho hẹ mẹdevo lẹ he yiwanna Jehovah. Amọ́, n’yọnẹn dọ nado dọnsẹpọ mẹdevo lẹ, n’dona dọnsẹpọ Jehovah whẹ́. Enẹwutu, Salmu lẹ 37:4 gọalọna mi nado wàmọ, fie dọmọ: ‘Nọ mọ awuvivi susu to Jehovah mẹ, ewọ nasọ na we ojlo ahun towe mẹ tọn lẹ.’”

E dotana dọmọ: “N’mọdọ n’dona dọnsẹpọ Jehovah dogọ. Ewọ wẹ yin họntọn dagbe hugan lọ. Enẹgodo, n’basi kandai nuhe n’sọgan nọ wà dopọ hẹ mẹdevo lẹ tọn, na haṣinṣan ṣie hẹ yé nido lodo dogọ. N’plọn nado nọ ze ayiha do jẹhẹnu dagbe mẹdevo lẹ tọn ji bo nọ wọnji nuṣiwa yetọn lẹ go.”

Nugbo wẹ dọ họntọn he nọ sẹ̀n Jiwheyẹwhe lẹ gbẹ́ yin mapenọ. Kunnudetọ Jehovah tọn lẹ lọsu nọ pehẹ nuhahun lẹ di mẹdevo lẹ. Amọ́, anademẹ Biblu tọn nọ zọ́n bọ yé nọ gọalọna mẹdevo lẹ to whedepopenu he e yọnbasi. Nuyọnẹnnu wẹ e yin nado jihọntọn mọnkọtọn lẹ. Amọ́, be anademẹ Biblu tọn lẹ sọgan sọ gọalọ nado duto nuhahun he ma sọgan mọ pọngbọ to egbehe lẹ, taidi azọ̀n jẹmagbọ po awubla po ji ya?