Rose dọmọ: “N’dugu azọ̀n de tọn he zọ́n bọ n’nọ to awufiẹsa mẹ whepoponu. N’masọ nọ mọ awuvivi to gbẹ̀mẹ ba.” Dopo to nuhe nọ duahunmẹna ẹn hugan lẹ mẹ wẹ yindọ e ma nọ penugo to whedelẹnu nado ze ayiha do Biblu pinplọn po sinsẹ̀n-bibasi etọn po ji. Amọ́, hogbe Jesu tọn he to Matiu 19:26 mẹ lẹ gọalọna ẹn taun, ehe dọmọ: “Nulẹpo wẹ yọnbasi na Jiwheyẹwhe.” Rose wá mọdọ aliho voovo mẹ wẹ yè sọgan plọnnu te. Na awufiẹsa etọn nọ zọ́n bọ e ma sọgan nọ hiawe to whedelẹnu wutu, e gbọ bo jẹ todoaina hoyidokanji Biblu tọn po owe sinai do Biblu ji lẹ tọn po ji. * E dọmọ: “Eyin onú enẹlẹ ma tin, e na ko vẹawuna mi nado lodo to gbigbọ mẹ.”

Eyin e vẹna Rose dọ e ma sọgan sọ wà nuhe e ko nọ wà dai lẹ, hogbe he to 2 Kọlintinu lẹ 8:12 mẹ lẹ nọ miọnhomẹna ẹn, ehe dọmọ: “Eyin ojlo lọ tin to finẹ jẹnukọn, na taun tọn e nọ yin alọkẹyi sọgbe hẹ nuhe mẹlọ tindo, e ma yin sọgbe hẹ nuhe mẹlọ ma tindo gba.” Hogbe enẹlẹ flinnu Rose dọ homẹ Jiwheyẹwhe tọn nọ hùn do nuhe wà e te lẹ go, na nuhe go e pé lẹpo niyẹn.

Delphine, he yin nùdego wayi flin dọmọ: “To whenue viyọnnu ṣie owhe 18 mẹvi lọ kú, awufiẹsa ṣie  sinyẹn sọmọ bọ n’ma lẹndọ n’gán gbẹ́ nọgbẹ̀ ba. Gbẹzan ṣie diọ pete.” Amọ́, hogbe he to Salmu lẹ 94:19 mẹ lẹ miọnhomẹna ẹn taun, fie salmu-kantọ lọ dọna Jiwheyẹwhe te dọmọ: “Whenue magbọjẹ lẹ húagbọ́ mi, hiẹ miọnhomẹna mi bo hẹn kọgbọ wá na mi.” E dọ dọ, “N’nọ hodẹ̀ hlan Jehovah dọ ewọ ni gọalọna mi nado mọ nuhe n’gán wà bọ awufiẹsa ṣie na depò lẹ.”

E nọ hẹn alọnu etọn ján to alọgigọna mẹdevo lẹ mẹ. To nukọn mẹ, e wá mọdọ emi sọgan gbẹ́ yọ́n-na-yizan to aliho devo lẹ mẹ. Dile e tlẹ to awubla mẹ, e wá doayi e go dọ emi gán gbẹ́ gọalọna mẹdevo lẹ. E dọmọ: “N’wá mọdọ eyin n’yí nuhe Biblu dọ lẹ do miọnhomẹna mẹhe n’to Biblu plọn hẹ lẹ, n’nọ mọdọ Jehovah nọ gbọnmọ dali de awubla ṣie pò bo nọ miọnhomẹna mi.” E basi kandai mẹhe go Biblu donù he jugbọn ninọmẹ awubla sinsinyẹn tọn mọnkọtọn mẹ lẹ tọn. E doayi e go dọ, “Yemẹpo wẹ yiwanna dẹ̀hiho.” E sọ plọn dọ “gbọn Biblu hihia dali wẹ yè sọgan penugo nado doakọnnanu.”

Delphine ko sọ plọn nudevo sọn Biblu pinplọn mẹ—enẹ wẹ nado nọ ze ayiha do sọgodo ji kakati nido yin do nuhe ko wayi lẹ ji. Todido he tin to Owalọ lẹ 24:15 mẹ miọnhomẹna ẹn, ehe dọmọ: “Fọnsọnku dodonọ lẹ po mawadodonọ lẹ po tọn de na tin.” Nawẹ ewọ kudeji sọ dọ Jehovah na fọ́n viyọnnu etọn sọnku? Delphine lọsu na gblọndo dọmọ: “N’nọ mọ viyọnnu ṣie hlan sọgodo. E nọ họnwun na mi sọmọ dọ Otọ́ olọn mẹ tọn ṣie na fọ́n ẹn sọnku to ojlẹ sisọ mẹ. N’nọ mọ mí omẹ awe lẹ hlan to jipa mítọn mẹ bọ n’sọ yiwanna ẹn kẹdẹdile e te do to whenue e ṣẹṣẹ yin jiji.”