Mẹmẹyọnnu jọja de he nọ yin Nicole bo nọ nọ̀ Colombie dọ dọ: “N’yiwanna Plitẹnhọ Ahọluduta tọn mítọn taun!” E yidogọ dọ: “N’gán nọ zan whenu dopọ hẹ mẹmẹsunnu po mẹmẹyọnnu ṣie lẹ po to finẹ.” Be mọ wẹ e nọ ṣí na hiẹ lọsu ya?

 Lẹdo aihọn pé, Kunnudetọ Jehovah tọn lẹ nọ bayi pli to nudi plitẹnhọ 63 000 mẹ. Ohọ̀ ehelẹ nọ zọ́n bọ mí nọ vò bo nọ sẹ̀n Jiwheyẹwhe. E ma yin enẹ kẹdẹ. Gbehosọnalitọ whepoponu tọn de he nọ yin David bo nọ nọ̀ Colombie dọ dọ: “Plitẹnhọ Ahọluduta tọn mítọn nọ zọ́n bọ owẹ̀n mítọn nọ dọ̀n mẹlẹ dogọ. E nọ paṣa jonọ susu eyin yé mọ lehe mí nọ penukundo ohọ̀ lọ go dọ.” Ehe ma yin kosọ de poun. Mí nọ wazọ́n sinsinyẹn nado hẹn plitẹnhọ mítọn lẹ do wiweji bosọ penukundo yé go. Amọ́, nawẹ azọ́n lọ nọ yì do?

Lehe Mí Nọ Wazọ́n lọ Do

 Agun he nọ zan Plitẹnhọ Ahọluduta tọn de wẹ nọ penukundego. Mẹmẹsunnu po mẹmẹyọnnu lọ lẹ po nọ hẹn plitẹnhọ lọ do wiweji to gbesisọ mẹ. Yé nọ to azọ́nwa do e go na nulẹ nikaa gble bo nọ jla nufinflin he gble lẹ do.

 Na azọ́nwatẹn LDC tọn jlo na gọalọna agun lẹ nado penukundo Plitẹnhọ Ahọluduta tọn yetọn go ganji wutu, yé nọ deazọ́nna mẹmẹsunnu delẹ nado sẹ̀n di azọ́nplọnmẹtọ lẹ. Azọ́nplọnmẹtọ dopodopo nọ penukundo nudi plitẹnhọ ṣidopo yì ao go. E nọ dla agun lọ lẹ pọ́n bo nọ plọnazọ́n wẹnlatọ lọ lẹ, na yé nido yọ́n lee yé na nọ penukundo plitẹnhọ yetọn go do. To owhe atọ̀n-atọ̀n lẹpo mẹ, e nọ gbeje plitẹnhọ dopodopo pọ́n nado yọnẹn eyin owùnu de tin podọ eyin e biọ dọ yè ni jla nude do.

 Mẹmẹsunnu po mẹmẹyọnnu mítọn lẹ po yọ́n pinpẹn nue azọ́nplọnmẹtọ lọ lẹ nọ plọn yé tọn taun. Mẹmẹyọnnu Indhumathi he nọ nọ̀ Inde dọmọ: “Azọ́nplọnmẹ lọ yọ́n taun. Homẹ mítọn hùn nado plọn lee mí na nọ hẹn plitẹnhọ mítọn do wiweji do.” Mẹmẹsunnu Evans he nọ nọ̀ Kenya dọmọ: “Mí ko yọ́n lee mí na dapana akuẹ susu zinzan do, na mí ko plọn nado nọ didẹ nuhahun flinflin lẹ domẹwhenu bo ma nọ dike yé ni lẹzun nuhahun daho lẹ wutu.”

Nukunpipedo Akuẹzinzan lẹ Go

 Akuẹ he e nọ biọ to whemẹwhemẹ nado penukundo Plitẹnhọ Ahọluduta tọn de go gán yì dọla kanweko kavi fọtọ́n susu. a Fie plitẹnhọ lọ te, owhe he e ko nọ aimẹ na po agun sọha he nọ zan ẹn po wẹ nọ magbe akuẹ he e na dù tọn. Amọ́, fitẹ mí nọ hẹn akuẹ sọn nado penukundo plitẹnhọ lọ lẹ go?

 Nunina lẹ wẹ nọ gọalọ nado penukundo Plitẹnhọ Ahọluduta tọn lẹ go. Mẹmẹsunnu Alexander, he nọ nọ̀ Kazakhstan dọ dọ: “Yè nọ yí delẹ to akuẹ lọ lẹ mẹ do họ̀ Intẹnẹt bosọ nọ sú osin po miyọ́n lẹtliki tọn po kuẹ. Akuẹ lọ wẹ mí sọ nọ yí do họ̀ wema adàdo ji tọn, laglán he yè nọ do dó alọ nado wazọ́n, núzinzan wiwejininọ tọn lẹ po osẹ̀n po.” Nunina he pò lẹ nọ yin nina do azọ́n lẹdo aihọn pé tọn tamẹ, bọ yè nọ zan akuẹ lọ na azọ́n nukunpedonugo tọn daho he nọ biọ kuẹzinzan susu lẹ lẹdo aihọn pé.

Azọ́n Nukunpedonugo Tọn Dahodaho Lẹ

 Eyin akuẹ he nukunpipedo Plitẹnhọ Ahọluduta tọn de go na dù zẹ̀ akuẹ he agun lọ nọ zan do plitẹnhọ lọ go na osun awe kavi atọ̀n go, mẹho agun tọn lẹ nọ dọho hẹ azọ́nplọnmẹtọ LDC tọn. Eyin LDC kọngbedopọ, nunina lẹdo aihọn pé tọn wẹ yè nọ saba zan nado penukundo kuẹzinzan lọ go. To owhe sinsẹ̀nzọn tọn 2023 tọn mẹ, azọ́n mọnkọ 8 793 wẹ mí wà bo zan dọla livi 76 e lán 600 000 (nudi 43 333 900 000F CFA). Mí ni pọ́n apajlẹ awe.

 To Angola, plitẹnhọ de he ko to aimẹ na owhe 15 biọ vọjlado susu. Lẹtliki-kàn lọ lẹpo wẹ yè dona diọ, adó lọ lẹ zẹ̀ bọ mẹhe to plitẹnhọ lọ pá lẹ dọ dọ osin nọ sá biọ owhé yetọn lẹ gbè. LDC bayi tito nado jla nulẹ do. Azọ́n lọ dù dọla 9 285 (nudi 5 253 000F CFA). Lehe azọ́n lọ yì do vivi na mẹhe to okọ́ lọ mẹ lẹ taun.

 To Pologne, họta plitẹnhọ de tọn to kùnkùn bọ avọ̀ titli he yè tẹ́ do kọmẹ lọ ko gble pete. LDC yigbe dọ yè ni vọ́ họta lọ jlado na e ni masọ kùn-sin ba blo. Yé sọ dọ dọ yè ni diọ avọ̀ kọmẹ tọn lọ. Dọla 9 757 (nudi 5 518 000F CFA) wẹ azọ́n lọ dù. Po ehe po, plitẹnhọ lọ ma na biọ vọjlado daho de na owhe susu.

Azọ́n Nukunpedonugo Tọn Nọ Pagigona Jehovah

 Gbọnvona dọ azọ́n nukunpedonugo tọn nọ zọ́n bọ mí nọ dowéna nunina họakuẹ lẹ, e sọ nọ hẹn pipá wá na Jehovah. Mẹmẹsunnu Shaun, he nọ nọ̀ Tonga dọmọ: “Po azọ́n nukunpedonugo tọn he mí nọ wà po, mí gán sẹ̀n Jehovah to Plitẹnhọ Ahọluduta tọn he to wiweji, he to titoji bo to ninọmẹ dagbe mẹ de mẹ. Ehe zọ́n bọ mẹlẹ nọ dọho Jehovah tọn dagbe to lẹdo lọ mẹ. Winyan ma nọ hù mí nado ylọ mẹlẹ wá Plitẹnhọ Ahọluduta tọn mítọn mẹ.”

Nawẹ A Gán Gọalọ Gbọn?

 Mímẹpo wẹ gán gọalọ nado hẹn nọtẹn sinsẹ̀n-bibasi tọn mítọn do wiweji bosọ penukundego. Mẹmẹsunnu Marino he yin azọ́nplọnmẹtọ LDC tọn to Australie dọmọ: “Mímẹpo wẹ gán do mahẹ to lẹblanulọkẹyi jiawu lọ nado penukundo Plitẹnhọ Ahọluduta tọn mítọn lẹ go mẹ. Eyin mí nọ wàmọ, be nususu wà wẹ mí te nado dowéna nunina họakuẹ lẹ, na nunina enẹlẹ nido yin zinzan to fie hudo te nugbonugbo.”

 Mẹmẹsunnu Joel he nọ nọ̀ Inde, nọ yiwanna nukunpipedo Plitẹnhọ Ahọluduta tọn etọn go. E dọmọ: “Azọ́nwiwa hẹ mẹmẹsunnu ṣie lẹ nọ gọalọna mi nado yí nukun homẹ tọn do pọ́n lehe aihọn yọyọ lọ na ṣí.” Nicole, he mí ko dọho etọn wayi dọ dọ: “To agọe, n’gọalọ nado súnsún kọmẹ to whenue mẹmẹsunnu lẹ to osin he to kùnkùn to adàdo-pámẹ jlado. E ma yin yẹn wẹ jla nuhe gble lọ do, amọ́ n’gọalọ bọ asidan de ma jọ.”

 Eyin a jlo na ze dewe jo nado nọ penukundo Plitẹnhọ Ahọluduta tọn mìtọn go, dọho hẹ mẹho agun towe tọn lẹ. Nunina towe lẹ nọ gọalọ nado penukundo Plitẹnhọ Ahọluduta tọn mìtọn go bosọ nọ gọalọ nado penukundo Plitẹnhọ Ahọluduta tọn devo lẹ go lẹdo aihọn pé. A gán bayi nunina do apotin nunina tọn lẹ mẹ to plitẹnhọ mìtọn mẹ kavi gbọn donate.jw.org ji. Mí yọ́n pinpẹn gbigbọ alọtútlú tọn towe taun.