Taidi Kunnudetọ Jehovah tọn lẹ, mí yọnẹn dọ to madẹnmẹ, Jehovah Jiwheyẹwhe na yinuwa nado whlẹn aigba mítọn sọn husudo he gbẹtọvi ko hẹnwa e ji lẹ si. (Osọhia 11:18) Amọ́, mílọsu nọ wà nuhe go mí pé nado basi hihọ́na aigba lọ. Di apajlẹ, mí ko wleawuna azọ́nwanu delẹ do ohọ̀ he mí nọ yizan na Jehovah sinsẹ̀n lẹ mẹ he nọ gọalọ ma nado hẹn ninọmẹ aimẹ tọn gble.

 Tito delẹ tin he yin awuwlena to aliho de mẹ nado de kọdetọn ylankan he nuyiwa gbẹtọvi lẹ tọn gán tindo do ninọmẹ aimẹ tọn ji lẹ pò. Tito mọnkọ tẹlẹ wẹ ko yin yiyizan? Podọ, nawẹ yé ko gọalọ nado yí nunina akuẹ tọn lẹ zan po nuyọnẹn po gbọn?

Azọ́nwanu Delẹ He Nọ Hẹn Plitẹnhọ Plidopọ Tọn lẹ mẹ Fá

 To tintan whenu, Plitẹnhọ Plidopọ Tọn Matola tọn to Mozambique yin gbigbá matin fleṣe to adà etọn lẹ mẹ bọ tolu to họta etọn. Amọ́, họta ehe nọ zọ́n bọ yozò nọ sinyẹn taun to ohọ̀ lọ mẹ. Mẹmẹsunnu lẹdo lọ tọn de dọ dọ: “Yozò lọ zọ́n bọ mí nọ jẹdẹ́n taun! To vivọnu tito-to-whinnu de tọn, mẹmẹsunnu lẹ nọ yawu họ̀n tọ́n nado yí jẹhọn fifá.” Etẹwẹ mí gán wà na mẹmẹsunnu mítọn lẹ nido tindo nọtẹn de he mẹ e na bọawuna yé dogọ nado plọnnu te?

 Mí basi dide nado didẹ nuhahun ehe to aliho de mẹ he ma na hẹn ninọmẹ aimẹ tọn gble: enẹ wẹ nado zan ventilateur kavi zomọ he nọ fú jẹhọn lẹ gọna núzinzan delẹ he nọ glọnalina yozò. Núzinzan ehe nọ de huhlọn pò na yozò he nọ biọ ohọ̀ lọ mẹ, podọ zomọ he nọ fú jẹhọn lẹ nọ zọ́n bọ jẹhọn nọ to ohọ̀ lọ mẹ biọ to gbesisọ mẹ. Zomọ enẹlẹ ma nọ zan miyọ́n lẹtliki tọn, amọ́ jẹhọn jọwamọ tọn gọna nuyizan delẹ he nọ de jẹhọn miyọ́nawu sọn ohọ̀ lọ mẹ. Zomọ ehe dopo nọ họ̀ dọla Amelika tọn 50. a

 Ayiha he mí kàn ehe ko zọ́n bọ jẹhọn he nọ yìn to Plitẹnhọ Plidopọ tọn lọ mẹ ko pọnte taun. Na jẹhọn nọ yìn ganji wutu, yozò ma nọ gbọṣi ohọ̀ lọ mẹ. Humọ, jẹhọn dagbe nọ sù taun bọ jẹhọn miyọ́nawu nọ depò. Taidi kọdetọn de, mẹplidopọ lẹ nọ vò dogọ bosọ nọ dotoai po sọwhiwhe po. Mẹmẹsunnu he go mí donù wayi de dọ dọ: “Todin, mí masọ nọ yawu họ̀n tọ́n tlolo he opli lọ fó ba. Kakatimọ, mí nọ gbọṣi ohọ̀ lọ mẹ to gbọjẹ whenu bo nọ to hodọ hẹ họntọn lẹ. Ohọ̀ lọ mẹ ninọ todin nọ taidi aisinsin to atin daho he fá de sá!”

Hinhọ́n Owhè Tọn Yiyizan

 Mí wleawuna azọ́nwanu susu do nọtẹn mítọn lẹ lẹdo aihọn pé. Azọ́nwanu ehelẹ nọ gọalọ nado diọ hinhọ́n owhè tọn zun miyọ́n lẹtliki tọn. Taidi kọdetọn de, mí masọ nọ ganjẹ miyọ́n lẹtliki tọn he yè nọ zan amì dòglọ tọn do wleawuna lẹ go ba. Miyọ́n lẹtliki tọn ehe ma nọ hẹn aimẹ gble bosọ nọ gọalọ nado yí nunina akuẹ tọn lẹ zan po nuyọnẹn po.

 To 2022, azọ́nwanu he nọ de miyọ́n lẹtliki tọn tọ́n de yin awuwlena do alahọ Slovénie tọn mẹ. Azọ́nwanu ehe nọ wleawuna nudi mado atọ̀n miyọ́n lẹtliki tọn he nọ yin zinzan to alahọ lọ mẹ tọn. Eyin e wá jọ bọ e de miyọ́n lẹtliki tọn tọ́n hú nuhe mí do hudo etọn, dehe pò lọ nọ yin didohlan okàn lẹtliki tọn lẹdo lọ tọn lẹ mẹ. Azọ́nwanu ehe họ̀ dọla Amelika tọn 360 000. Podọ todin he alahọ masọ nọ suahọ na miyọ́n lẹtliki tọn sọmọ ba, akuẹ he mí na sẹdo dile mí to azọ́nwanu lọ zan na hugan akuẹ he mí zan do azọ́nwanu lọ ji to owhe ẹnẹ gblamẹ.

 To 2024, mí wleawuna azọ́nwanu mọnkọ delẹ po batterie daho de po do alahọ Sri Lanka tọn mẹ. Azọ́nwanu lọ họ̀ nudi dọla Amelika tọn livi 3, podọ e nọ penugo nado sudo nuhudo miyọ́n lẹtliki tọn yetọn yì 70 to kanweko ji. Akuẹ he yin sisẹdo dile mí to azọ́nwanu lọ zan nasọ hugan akuẹ he mí na zan do azọ́nwanu lọ ji to owhe atọ̀n gblamẹ. To owhe enẹ dopolọ mẹ, mí sọ wleawuna azọ́nwanu mọnkọ devo do alahọ Pays-Bas tọn mẹ. Azọ́nwanu ehe họ̀ dọla Amelika tọn livi dopo linlán, podọ e nọ sudo hugan mado atọ̀n nuhudo miyọ́n lẹtliki tọn alahọ lọ tọn. Akuẹ he mí na sẹdo dile mí to azọ́nwanu lọ zan na hugan akuẹ he mí zan do azọ́nwanu lọ ji to owhe ṣinẹnẹ gblamẹ.

 Mí sọ wleawuna azọ́nwanu mọnkọ lẹ do azọ́nwatẹn lẹdogbedevomẹ tọn voovo lẹ to Mexique. Apajlẹ dopo wẹ yin azọ́nwatẹn lẹdogbedevomẹ tọn Tarahumara (Central) tọn he to lẹdo Chihuahua tọn mẹ. To avivọ whenu, aimẹ nọ fá taun, podọ to ojlẹ alunlun tọn mẹ, yozò lọsu nọ sinyẹn taun. Ṣogan na miyọ́n lẹtliki tọn nọ vẹahi taun wutu, mẹmẹsunnu lẹ ma nọ zan zomọ nuhẹnfa tọn kavi dehe nọ hẹn họmẹ hunmiyọn lẹ. Mẹmẹsunnu Jonathan he nọ wazọ́n to azọ́nwatẹn lẹdogbedevomẹ tọn lọ dọmọ: “Mí nọ zan avọ̀ po awu titli lẹ po to avivọ whenu, bo nọ wá hùn fleṣe lẹ to alunlun whenu.”

 To 2024, azọ́nwanu he nọ na miyọ́n lẹtliki tọn de yin awuwlena do azọ́nwatẹn lẹdogbedevomẹ tọn lọ. Azọ́nwanu ehe họ̀ dọla Amelika tọn 21 480, bọ akuẹ he mí na sẹdo dile mí to azọ́nwanu lọ zan na hugan akuẹ he mí zan do azọ́nwanu lọ ji to owhe atọ́n gblamẹ. Todin, mẹmẹsunnu lẹ gán nọ zan zomọ he nọ hẹn họmẹ hunmiyọn kavi dehe nọ hẹn họmẹ fá whẹwhẹ hugan dai tọn. Jonathan dọmọ: “Mí nọ duvivi azọ́ndenamẹ mítọn tọn dogọ, podọ azọ́n mítọn to yìyì ganji. To ojlẹ dopolọ mẹ, homẹ mítọn hùn nado yọnẹn dọ titobasinanu mítọn nọ yí nunina lẹ zan po nuyọnẹn po, podọ to aliho de mẹ he ma na hẹn ninọmẹ aimẹ tọn gble.”

Mí Nọ Dowéna Jikun-Sin

 To Aflika, Plitẹnhọ Ahọluduta tọn delẹ ma gán nọ mọ osin dagbe to gbesisọ mẹ. Taidi kọdetọn de, mẹmẹsunnu lẹ dona nọ hẹn osin sọn fie dẹn do taun Plitẹnhọ yetọn lẹ. To plitẹnhọ devo lẹ mẹ, mẹmẹsunnu lẹ dona nọ họ̀ osin he agbànbẹhun lẹ nọ kùn, amọ́ ehe nọ vẹahi taun bo masọ nọ wà dagbe na ninọmẹ aimẹ tọn.

 Na mẹmẹsunnu mítọn lẹ nido mọ osin, mí wleawuna gọta lẹ do họta lẹ glọ gọna osin-hẹnnu dahodaho lẹ do Plitẹnhọ susu lẹ mẹ lẹdo Aflika. Whẹpo mẹmẹsunnu lẹ nido wleawuna azọ́nwanu lọ, yé nọ gbadopọnna ninọmẹ aimẹ tọn lẹdo lọ tọn po sọwhiwhe po, nado yọ́n azọ́nwanu he na wà dagbe na plitẹnhọ lọ hugan. Awuwiwlena azọ́nwanu lọ do plitẹnhọ lọ mẹ gán họ̀ dọla Amelika tọn 600 sọyi 3 000. Amọ́, azọ́nwanu ehe nọ saba de akuẹ he nọ yin zinzan do plitẹnhọ de go lẹ pò, na e masọ biọ dọ mẹmẹsunnu ni nọ họ̀ osin ba wutu.

 Azọ́nwanu he nọ zan jikun-sin ehelẹ nọ wà dagbe na mẹmẹsunnu lẹ. Noemia, yèdọ mẹmẹyọnnu de to Mozambique dọmọ: “To dai, mí dona yì fidindẹn whẹpo do mọ osin. Whẹpo mí do nọ wá plitẹnhọ mẹ, agbọ́ ko nọ pé mí petepete. Podọ, na osin ma nọ tin sọmọ wutu, e nọ vẹawu taun nado nọ wiweji. Todin, mẹlẹpo gán nọ klọ alọ yetọn. Agbọ́ ma nọ pé mí zẹjlẹgo whenue mí jẹ plitẹnhọ mẹ, podọ ehe nọ zọ́n bọ mí gán nọ duvivi opli lẹ tọn dogọ. Mì wanu kaka!”

 Nawẹ mí nọ mọ akuẹ he mí nọ zan to tito ehelẹ mẹ gbọn? Gbọn nunina lẹdo aihọn pé lẹ gblamẹ, ehe susu yetọn nọ yin bibasi gbọn adà voovo donate.jw.org tọn lẹ ji dali. Mì wanu taun na nunina alọtútlú tọn mìtọn lẹ!