Lẹdo aihọn pé, mẹsusu he nọ dọ dọ emi yin hodotọ Jesu Klisti tọn lẹ nọ donù tonudidọ mẹ taun. Mẹdelẹ to yé mẹ nọ nọgodona tonudọtọ kavi tonudọgbẹ́ delẹ na yé nọ jlo dọ yé ni nọgodona sinsẹ̀n po aṣa yetọn lẹ po wutu. Enẹwutu, tonudọtọ lẹ nọ saba zan whẹho paa he to tòji lẹ po ninọmẹ otò lọ tọn po, na sinsẹ̀nnọ lẹ nido nọgodona yé. To paa mẹ, sinsẹ̀ngán delẹ nọ jlo dọ yè ni de emi do otẹn de mẹ to tonudidọ mẹ. Podọ to otò delẹ mẹ, yè tlẹ nọ ze sinsẹ̀n “Klistiani” tọn de do otẹn vonọtaun mẹ bo nọ pọ́n ẹn hlan di sinsẹ̀n otò lọ tọn, vlavo to otò lọ blebu mẹ kavi to apadewhe etọn mẹ.

 Etẹ a lẹn? Be e jẹ dọ hodotọ Jesu tọn lẹ ni nọ donù tonudidọ mẹ ya? A na mọ gblọndo lọ eyin a lẹnnupọndo apajlẹ Jesu tọn ji. Jesu dọ dọ: “Ohia wẹ yẹn zedai na mì, dọ kẹdẹdile yẹn basi na mì do, mọ wẹ mìlọsu dona nọ basi do ga.” (Johanu 13:15) Apajlẹ tẹwẹ Jesu zedai gando whẹho tonudidọ tọn go?

Be Jesu donù tonudidọ mẹ wẹ ya?

 Paali. Jesu ma donù tonudidọ mẹ.

 Jesu ma dín otẹn de to tonudidọ mẹ. Jesu ma yigbe nado deanana gandudu gbẹtọvi lẹ tọn whenue Satani Lẹgba ze “ahọluduta aihọn tọn lẹpo” donukọnna ẹn. (Matiu 4:8-10) a To ojlẹ devo mẹ, mẹdelẹ he yọnẹn dọ Jesu gán yin nukọntọ dagbe de jlo na dọ̀n ẹn biọ tonudidọ mẹ. Biblu dọ dọ: “Na Jesu yọnẹn dọ yé na wá bo wle e nado yí i do duahọlu wutu, e sọ vọ́ họnyi osó ji edeṣo.” (Johanu 6:15) Jesu ma joawuna nuhe gbẹtọ lẹ jlo dọ ni wà. Kakatimọ, e gbẹ́ bo ma donù tonudidọ mẹ.

 Jesu ma nọgodona whẹho tonudidọ tọn depope. Di apajlẹ, to ojlẹ Jesu tọn mẹ, e nọ vẹ́na Ju lẹ dọ yé dona sú takuẹ na gandudu Lomu tọn, podọ yé nọ pọ́n enẹ hlan di mawadodo. Whenue yé jlo dọ Jesu ni donù whẹho lọ mẹ, e ma jẹ homọdọdo whẹho tonudidọ tọn go ji eyin e sọgbe nado sú takuẹ mọnkọ kavi lala. E dọna yé dọ: “Mì yí nuhe yin Sesali tọn lẹ na Sesali, ṣigba nuhe yin Jiwheyẹwhe tọn lẹ na Jiwheyẹwhe.” (Malku 12:13-17) E ma dọhodo whẹho tonudidọ tọn ji, amọ́ e dohia yé dọ yé dona sú takuẹ he gandudu Lomu tọn he nọtena Sesali to bibiọ yé lọ. E sọ dohia yé dọ tonusisena aṣẹpipa lẹ dona do dogbó. Mẹde ma dona yí nuhe jẹna Jiwheyẹwhe kẹdẹ na gbẹtọ, enẹ wẹ sinsẹ̀n-bibasi mítọn po míde zizejo na ẹn po.—Matiu 4:10; 22:37, 38.

 Jesu nọgodona Ahọluduta Jiwheyẹwhe tọn he to olọn mẹ bo plọnnumẹ gandego. (Luku 4:43) E ma donù tonudidọ mẹ na e yọnẹn dọ Ahọluduta Jiwheyẹwhe tọn wẹ na diọ aigba do lee Jiwheyẹwhe jlo do, e ma yin gandudu gbẹtọvi lẹ tọn. (Matiu 6:10) E sọ yọnẹn dọ Ahọluduta Jiwheyẹwhe tọn ma na yí gandudu gbẹtọvi lẹ tọn zan, kakatimọ e na de yé sẹ̀ wẹ.—Daniẹli 2:44.

Be Klistiani he nọgbẹ̀ to owhe kanweko tintan whenu lẹ donù tonudidọ mẹ ya?

 Lala. Hodotọ Jesu tọn lẹ setonuna nuhe e dọ bo “ma yin apadewhe aihọn tọn.” (Johanu 15:19) Yé hodo apajlẹ etọn bo ma donù tonudidọ mẹ. (Johanu 17:16; 18:36) Kakati yé nido donù tonudidọ mẹ, yé wazọ́n he Jesu zọ́n yé lọ, enẹ wẹ nado dekunnu bo plọnnumẹ gando Ahọluduta Jiwheyẹwhe tọn go.—Matiu 28:18-20; Owalọ lẹ 10:42.

 Klistiani he nọgbẹ̀ to owhe kanweko tintan whenu lẹ setonuna aṣẹpatọ lẹ, amọ́ Jiwheyẹwhe wẹ yé setonuna hugan. (Owalọ lẹ 5:29; 1 Pita 2:13, 17) Yé setonuna osẹ́n lẹ bosọ sú takuẹ lẹ. (Lomunu lẹ 13:1, 7) Nugbo wẹ dọ yé ma donù tonudidọ mẹ, amọ́ yé mọ ale delẹ sọn osẹ́n otò tọn po tito he aṣẹpato lẹ bayi lẹ po mẹ.—Owalọ lẹ 25:10, 11; Filipinu lẹ 1:7.

Lehe Klistiani lẹ nọ nọ̀ kada do to egbé

 Biblu hẹn ẹn họnwun dọ Jesu po hodotọ etọn dowhenu tọn lẹ po ma donù tonudidọ mẹ. Enẹwutu taidi Klistiani lẹ, Kunnudetọ Jehovah tọn lẹ lẹdo aihọn pé nọ nọ̀ kada na tonudidọ. Dile Klistiani he nọgbẹ̀ to owhe kanweko tintan whenu lẹ wà do, yelọsu nọ wazọ́n he Jesu zọ́n yé bo nọ dekunnu “yẹwheho wẹndagbe Ahọluduta lọ tọn.”—Matiu 24:14.