Awujijonanu—Lehe Biblu Gán Gọalọ Do
Linlin lọ Déclaration de principes sur la tolérance he UNESCO na to 1995 dọ dọ: “Awujijona linlẹn mẹdevo lẹ tọn nọ yidogọna jijọho.”
To alọ devo mẹ, hẹngogonọ-yinyin gán dekọtọn do mẹmasi po nuvẹun po mẹ. Numọtolanmẹ mọnkọ tintindo nọ saba zọ́n bọ gbẹtọ lẹ nọ zan hogbe whánsọmẹ tọn lẹ, nọ ṣinyan akọ̀ bosọ wadanu.
Amọ́, linlẹn voovo lẹ wẹ mẹlẹ nọ tindo gando nuhe awujijonanu zẹẹmẹdo go. Mẹdelẹ lẹndọ mẹhe nọ joawunanu lẹ dona nọ kẹalọyi aṣa po walọyizan lẹpo po. Mẹdevo lẹ kọngbedopọ hẹ nuhe Biblu dọ, mẹhe nọ joawunanu lẹ nọ na sisi nuyise mẹdevo lẹ tọn, dile etlẹ yindọ yelọsu lẹ gán nọ ma yọ́n pinpẹn nuyise yetọn tọn kavi ma kudeji.
Be Biblu gán gọalọna mẹlẹ nado nọ joawunanu to egbehe ya?
Nuhe Biblu dọ gando awujijonanu go
Biblu na mí tuli nado nọ joawunanu. E dọmọ: “Mì gbọ lẹnpọn dagbenọ-yinyin mìtọn ni yin yinyọnẹn na gbẹtọ lẹpo.” (Filipinu lẹ 4:5) Biblu na mí tuli nado nọ fahomẹ hẹ mẹdevo lẹ, nọ hò dagbemẹninọ yetọn pọ́n bosọ nọ jọmẹ hẹ yé. Mẹhe jlo na hodo ayinamẹ Biblu tọn ehelẹ gán magbe nado kẹalọyi linlẹn mẹdevo lẹ tọn kavi lala, amọ́ enẹ ma dohia dọ yé na jẹagọdo mẹlọ nado wanu sọgbe hẹ jlọjẹ etọn.
Etomọṣo, Biblu dohia dọ Jiwheyẹwhe ze nujinọtedo walọ dagbe tọn dai he gbẹtọvi lẹ dona hodo. E domọ: “Gbẹtọ E, [Jiwheyẹwhe] ko dọ nuhe yin dagbe na we.” (Mika 6:8) Ehe bẹ anademẹ Jiwheyẹwhe tọn lẹ hẹn, he na gọalọna gbẹtọvi lẹ nado duvivi ogbẹ̀ nujọnu tọn hugan lọ.
Jiwheyẹwhe ma na mí jlọjẹ lọ nado nọ dawhẹ na mẹdevo lẹ. Sọgbe hẹ nuhe Biblu dọ, “Omẹ dopo gee wẹ Sẹ́nnamẹtọ podọ Whẹdatọ . . . mẹnu wẹ hiẹ nado to whẹdana kọmẹnu towe?” (Jakọbu 4:12) Jiwheyẹwhe na dopodopo mítọn lẹ mẹdekannujẹ nudide basi tọn, podọ dopodopo mítọn wẹ na doakọnna kọdetọn he e na hẹnwa lọ lẹ.—Deutelonomi 30:19.
Nuhe Biblu dọ gando sisi go
Biblu dọ dọ mí dona nọ “gbògbéna gbẹtọ wunmẹ lẹpo.” (1 Pita 2:17) Enẹwutu, mẹhe de nado nọgbẹ̀ sọgbe hẹ nujinọtedo Biblu tọn lẹ dona nọ do sisi hia gbẹtọ wunmẹ lẹpo, mahopọnna nuyise kavi aliho gbẹninọ tọn yetọn lẹ. (Luku 6:31) Amọ́ ehe ma dohia dọ mẹhe nọ hodo ayinamẹ Biblu tọn lẹ na nọ kẹalọyi nuyise kavi linlẹn mẹdevo lẹ tọn lẹpo wẹ gba, mọ e ma sọ dohia dọ yé na nọ kẹalọyi nudide he mẹdevo lẹ basi lẹpo wẹ gba. Ṣigba kakati nado nọ yinuwa hẹ yé to aliho sisi ma tindo tọn mẹ podọ to aliho he ma jọmẹ de mẹ, mí dona wà nuhe go mí pé lẹpo nado nọ yinuwa hẹ yé dile Jesu wà do.
Di apajlẹ to gbèdopo, Jesu pé nawe de he nọ yì sinsẹ̀n he ewọ ma kẹalọyi de. Nawe ehe topọ hẹ sunnu de he ma yin asu etọn, yèdọ aliho gbẹninọ tọn de he ma sọgbe to nukun Jesu tọn mẹ. Etomọṣo, e do sisi hia yọnnu lọ dile e to hodọ hẹ ẹ.—Johanu 4:9, 17-24.
Taidi Jesu, Klistiani lẹ nọ wleawufo nado basi zẹẹmẹ nuyise yetọn lẹ tọn na mẹhe jlo na sè lẹ, podọ yé sọ nọ wàmọ po “sisi sisosiso” po. (1 Pita 3:15). Biblu na anademẹ Klistiani lẹ ma nado nọ zín pọndohlan yetọn lẹ do mẹdevo lẹ ji. E dọ dọ hodotọ Klisti tọn de “ma dona nọ hoavùn, ṣigba ewọ dona nọ wà dẹẹdẹ hlan mẹlẹpo,” etlẹ yin mẹhe nuyise yetọn lẹ gbọnvo.—2 Timoti 2:24.
Nuhe Biblu dọ gando wangbẹna go
Biblu na tuli mí nado “nọ doafọna jijọho mẹ ninọ hẹ mẹlẹpo.” (Heblu lẹ 12:14) Mẹhe nọ dín jijọho ma nọ gbẹwanna mẹdevo lẹ. Dile etlẹ yindọ e ma nọ yin ṣejannabinọ, e nọ dovivẹnu lẹpo nado nọ jijọho mẹ hẹ mẹdevo lẹ. (Matiu 5:9) Na nugbo tọn, Biblu sọ na tuli Klistiani lẹ nado nọ yiwanna kẹntọ yetọn lẹ bosọ nọ jọmẹ hẹ mẹhe nọ yinuwa hẹ yé to aliho agọ̀ mẹ lẹ.—Matiu 5:44.
Biblu tlẹ sọ dohia dọ Jiwheyẹwhe “gbẹwanna” walọyizan he nọ demẹpò kavi he nọ hẹn awugble wá lẹ podọ “osùnú” de wẹ yé yin na ewọ. (Howhinwhẹn lẹ 6:16-19) Amọ́, aliho he mẹ Biblu yí hogbe lọ “gbẹwanna” zan te tofi dohia dọ ewọ gbẹwanna walọ ylankan lẹ taun. Biblu dohia dọ Jiwheyẹwhe jlo na gọalọ bosọ jlo na jona mẹhe to gbesisọ mẹ nado diọ aliho gbẹninọ tọn yetọn bo nọgbẹ̀ sọgbe hẹ nujinọtedo etọn lẹ.—Isaia 55:7.
Wefọ he nọgodona awujijonanu po sisi po lẹ
Titu 3:2: “Yin lẹnpọn dagbenọ bo nọ do walọmimiọn mlẹnmlẹn hia gbẹtọ lẹpo.”
Lẹnpọn dagbenọ de ma nọ gblehomẹ whenue mẹdevo lẹ dọ linlẹn yetọn lẹ, podọ ehe nọ zọ́n bọ yè nọ na sisi ode awetọ.
Matiu 7:12: “Enẹwutu, nudepope he mìwlẹ jlo dọ gbẹtọ lẹ ni nọ wà na mì, mọ wẹ mìlọsu dona nọ wà na yé do.”
E nọ vivi na mímẹpo whenue mẹdevo lẹ yinuwa hẹ mí po sisi po bosọ yọ́n pinpẹn pọndohlan po numọtolanmẹ mítọn lẹpo tọn. Nado mọ nudọnamẹ susu dogọ gando lehe mí gán yí osẹ́n walọ dagbe tọn he Jesu plọnmẹ lẹ do yizan mẹ do go, pọ́n hosọ lọ “Etẹwẹ Yin Osẹ́n Sika Tọn?”
Jọṣua 24:15: “Mì bo de na mìdelẹ to egbehe mẹhe mì na sẹ̀n.”
Eyin mí na sisi jlọjẹ nudide bibasi tọn mẹdevo lẹ tọn, mí nọ yidogọna jijọho.
Owalọ lẹ 10:34: “Jiwheyẹwhe ma yin mẹnukuntahopọntọ gba.”
Jiwheyẹwhe ma nọ do mẹnukuntahopọn hia mẹdepope, mahopọnna aṣa etọn, omẹ alọpa he ewọ yin, otò he mẹ e wá sọn, sinmẹ agbasa tọn etọn kavi na ninọmẹ etọn wutu gba. Mẹhe jlo na hodo apajlẹ Jiwheyẹwhe tọn lẹ nọ do sisi hia mẹdevo lẹ.
Habakuku 1:12, 13: “[Jiwheyẹwhe] ma sọgan jotẹnna kanyinylan.”
Aliho he mẹ Jiwheyẹwhe nọ joawunanu te do dogbó. Ewọ ma na jotẹnna walọ ylankan gbẹtọvi lẹ tọn nado zindonukọn kakadoi. Nado plọnnu susu dogọ, pọ́n video lọ Naegbọn Jiwheyẹwhe Do Jotẹnna Yajiji?
Lomunu lẹ 12:19: “Mì natẹn homẹgble [Jiwheyẹwhe tọn]; na e ko yin kinkandai dọmọ: ‘Ṣie wẹ ahọsuyi; yẹn na suahọ etọn,’ wẹ Jehovah dọ.” a
Jehovah ma nagbè mẹdepope nado yiahọsu. Ewọ na hẹn ẹn diun dọ emi yinuwa po whẹdida dodo po to ojlẹ sisọ etọn mẹ. Nado mọ nudọnamẹ susu dogọ, hia hosọ lọ “Be Whẹdida Dodo Na Wá Tin to Aihọn mẹ Gbede Ya?”
a Jehovah wẹ yinkọ Jiwheyẹwhe tọn.—Salmu lẹ 83:18. Pọ́n hosọ lọ, “Mẹnu Wẹ Yin Jehovah?”
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Be Kunnudetọ Jehovah tọn lẹ Yise Dọ Sinsẹ̀n Yetọn Kẹdẹ Wẹ Yin Sinsẹ̀n Nugbo lọ Ya?
Be Jesu dọ dọ aliho lẹpo wẹ nọ planmẹ jẹ whlẹngán kọ̀n wẹ ya?
KANBIỌ HE MẸSUSU NỌ KANSE LẸ
Nado Mọ Whlẹngán Wẹ Zọ́n bọ Mì Nọ Dọyẹwheho sọn Họndekọn-jẹ-Họndekọn Ya?
Pọ́n nuhe mí yise gando whlẹngán go gọna lehe mẹde sọgan mọ ẹn yí do
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
