Jobu 40:1-24
40 Jehovah zindonukọn nado gblọnhona Jobu dọmọ:
2 “Be homọdọdomẹgotọ de na dọnnu hẹ Ganhunupotọ lọ wẹ?+
Gbọ mẹhe jlo na wọhẹ Jiwheyẹwhe ni na gblọndo.”+
3 Jobu sọ gblọnna Jehovah dọmọ:
4 “Pọ́n! Yẹn ma jẹ.+
Etẹwẹ yẹn sọgan gblọnna we?
Yẹn yí alọ ṣie do sú onù.+
5 Yẹn dọho whladopo, ṣigba n’ma nasọ gblọnho ba;Whla awe wẹ yẹn ko dọho, ṣigba n’ma nasọ dọho ba.”
6 Whenẹnu wẹ Jehovah gblọnna Jobu sọn yujẹhọn lọ mẹ+ dọmọ:
7 “Jaale, blagbajana dewe di sunnu;Yẹn nasọ kanhose we bọ hiẹ na dọna mi.+
8 Be hiẹ na fọ́n ayihaawe dote gando whẹdida dodo ṣie go* wẹ?
Be hiẹ na gblewhẹdo mi, na owhẹ̀ towe nido whẹ́n wẹ ya?+
9 Be awà towe tindo huhlọn sọ Jiwheyẹwhe nugbo lọ tọn wẹ,+Kavi ogbè towe sọgan dọnú di hẹviosò kẹdẹdile ewọ tọn nọ wà do wẹ ya?+
10 Jaale, yí gigo po kiklo-yinyin po do doaṣọ́na dewe;Yí yẹyi po whanpẹ daho po ṣinyọ́n na dewe.
11 Túntún homẹgble sinsinyẹn towe jẹgbonu;Na ayidonugo mẹdepope he yin saklanọ bo dọ̀n ẹn wá odò.
12 Na ayidonugo mẹdepope he yin saklanọ bo ze e whè,Bosọ tùnafọ mẹylankan lẹ ji to fie yé ṣite do.
13 Bẹ yemẹpo whlá do kọ́gudu mẹ;Blá yé* do fiwhiwhlá lọ,
14 To whenẹnu, yẹnlọsu na yigbe etọn na we*Dọ adusilọ towe sọgan whlẹn we gán.
15 Pọ́n, Bẹhemọti* die, ehe yẹn dá dile yẹn dá hiẹ lọsu do.
E nọ dù ogbé taidi oyìnsú de.
16 Pọ́n huhlọn he tin to alinmẹ na ẹnGọna hlọnhlọn he tin to okàn adọ̀go etọn tọn lẹ mẹ!
17 E nọ hẹn osi etọn sinyẹn di kedali;Okàn asapada etọn tọn lẹ yin linlọ̀n dopọ.
18 Ohú etọn lẹ taidi opò gànvẹẹ tọn lẹ;Afọ etọn lẹ taidi gànyuu he yè tùn lẹ.
19 Ewọ wẹ jẹnukọn* to azọ́n Jiwheyẹwhe tọn lẹ mẹ;Didatọ etọn kẹdẹ wẹ sọgan dọnsẹpọ ẹ po ohí po.
20 Na osó lẹ wẹ nọ wleawu núdùdù tọn na ẹn,Yèdọ fie gbekanlin lẹpo nọ daihun te.
21 E nọ mlọn atin lotusi tọn lẹ sá,To oyẹ̀ ofán gbàmẹ tọn lẹ tọn glọ.
22 Atin lotusi tọn lẹ nọ ṣinyọnyẹ e ji,Bọ atin pọpila agbàdo* mẹ tọn lẹ nọ lẹdo e pé.
23 Eyin otọ̀ tlẹ to zingidi ji, ewọ ma nọ dibu.
Adọ̀ nọ gbó e, eyin Jọdani+ tlẹ to hihò do onù etọn go po huhlọn po.
24 Be mẹde sọgan wle e to whenue nukun etọn to ote,Kavi yí omlẹn* do tọ́n awọntin etọn ya?
Nudọnamẹ Odò Tọn
^ Kavi “na hẹn whẹdida dodo ṣie zun ovọ́.”
^ To paa mẹ, “nukunmẹ yetọn.”
^ Kavi “na na we pipà.”
^ Vlavo dẹgbó.
^ To paa mẹ, “Ewọ wẹ yin bẹjẹeji.”
^ To paa mẹ, “omọ̀.”
