Jobu 32:1-22
32 Enẹwutu, sunnu atọ̀n helẹ nabọẹ bo masọ gblọnhona Jobu ba, na yé mọdọ e ko kudeji dọ emi yin dodonọ* wutu.+
2 Ṣigba, Elihu visunnu Balakẹli Buzinu+ lọ tọn sọn whẹndo Lami tọn mẹ ko gblehomẹ taun. Homẹgble etọn sinyẹn sọta Jobu, na e to tintẹnpọn nado suwhẹna ede* kakati nido yin Jiwheyẹwhe.+
3 E sọ gblehomẹ sinsinyẹn do họntọn Jobu tọn atọ̀n lẹ go, na yé ma mọ gblọndo dagbe de, kakatimọ Jiwheyẹwhe wẹ yé gblewhẹdo di mẹylankan.+
4 Elihu ko to tenọ nado gblọnhona Jobu, na yé yin mẹho na ẹn wutu.+
5 To whenue Elihu mọdọ sunnu atọ̀n lọ lẹ ma tindo nude nado gblọn, adi do e taun.
6 Enẹwutu, Elihu visunnu Balakẹli Buzinu lọ tọn jẹ hodọ ji dọmọ:
“Yọpọvu de wẹ yẹn*Bọ mìwlẹ yin mẹho.+
Enẹwutu wẹ yẹn do gbọn sisi dali nabọẹ,+Bo ma do dọ nuhe yẹn yọnẹn na mì.
7 Yẹn ko dọna dee dọ, ‘Gbọ mẹhomẹ* lẹ ni dọho,Podọ gbọ mẹhe tindo owhe susu to ota lẹ ni dọho nuyọnẹn tọn.’
8 Ṣigba, gbigbọ he to gbẹtọ lẹ mẹ,Yèdọ gbigbọ Ganhunupotọ lọ tọn wẹ nọ na yé nukunnumọjẹnumẹ.+
9 Mẹhowhe* kẹdẹ ma nọ hẹnmẹ yọnnuin,Mọjanwẹ e ma yin mẹhomẹ lẹ kẹdẹ wẹ nọ mọnukunnujẹ nuhe sọgbe mẹ do niyẹn.+
10 Enẹwutu, yẹn dọ dọ, ‘Dotoaina mi,Na yẹnlọsu ni dọ nuhe yẹn yọnẹn na we ga.’
11 Mì pọ́n! Yẹn ko nọtepọn ohó mìtọn lẹ;Yẹn ko dotoaina linlẹn mìtọn+Dile mì to nuhe mì na dọ lẹ dín.+
12 Yẹn ko yí sọwhiwhe do dotoaina mì,Ṣigba, depope to mì mẹ ma sọgan do Jobu hia di whẹhutọ*Kavi na gblọndo na hoyijlẹdohogo etọn lẹ.
13 Enẹwutu, mì haji dọ blo dọ, ‘Míwlẹ tindo nuyọnẹn;Jiwheyẹwhe lọsu wẹ wọhẹ ẹ, e ma yin gbẹtọ.’
14 Ewọ ma desọ́ mi to ohó etọn lẹ mẹ,Enẹwutu, yẹn ma na yí hoyijlẹdohogo mìtọn lẹ do gblọnhona ẹn.
15 Obu ko jẹ yé ji, yé masọ tindo nudepope nado gblọn ba;Ohó ko vọ̀ do yé.
16 Yẹn ko nọtepọn yé, ṣigba yé masọ dọho ba;Yé ṣite to finẹ poun, bo masọ kẹnù ba.
17 Enẹwutu, yẹnlọsu na dọho;Yẹnlọsu na dọ nuhe yẹn yọnẹn ga,
18 Na n’tindo nususu nado dọ;Gbigbọ he to ohò ṣie mẹ to sisẹsisẹ mi.
19 Ohò ṣie mẹ taidi ovẹn he ma tindo nùvo he mẹ e na de agbọ́ tọ́n gbọn,Yèdọ taidi ayúgò ovẹn tọn yọyọ he jlo na là.+
20 Mì gbọ ma dọho, na yẹn nido vò!
Yẹn na hùn nùflo ṣie bo na gblọnho.
21 Yẹn ma na do mẹnukuntahopọn hia mẹdepope;+Mọjanwẹ yẹn ma na na pipà oklọ tọn* gbẹtọvi de do niyẹn,
22 Na yẹn ma yọ́n lehe yè nọ namẹ pipà oklọ tọn gbọn;Eyin yẹn wàmọ, Mẹdatọ ṣie na de mi sẹ̀ sọn aimẹ plaun.
Nudọnamẹ Odò Tọn
^ Kavi “na ewọ yin dodonọ to nukun edetiti tọn mẹ.”
^ Kavi “alindọn ede tọn.”
^ To paa mẹ, “Yẹn whè to azán mẹ.”
^ To paa mẹ, “azán.”
^ Kavi “Azán susu.”
^ Kavi “ma sọgan wọhẹ Jobu.”
^ Kavi “ma na na tẹnmẹ-yinkọ gigonọ de.”
