Isaia 64:1-12
64 Eyin hiẹ ko tlẹ́n olọn lẹ bo jẹte wá odò wẹ,Na osó lẹ nido sisọ to nukọn towe,
2 Taidi to whenue yè domiyọ́n zunkan,Bọ miyọ́n hẹn osin fiẹ,Whenẹnu, kẹntọ towe lẹ na yọ́n oyín towe,Bọ akọta lẹ na nọ sisọ to nukọn towe!
3 Eyin hiẹ wà nujiawu he mí ma tlẹ sọgan donukun lẹ,+Hiẹ nọ jẹte wá odò, bọ osó lẹ nọ sisọ to nukọn towe.+
4 Sọn hohowhenu gbọ́n, mẹde ma ko sè kavi tuntoai,Mọ nukun depope ma ko mọ Jiwheyẹwhe devo de gbọnvona hiẹ,He nọ yinuwado ota mẹhe nọ nọtepọn ẹn* lẹ tọn mẹ.+
5 Hiẹ ko kẹalọyi mẹhe nọ yí ayajẹ do wà nuhe sọgbe lẹ,+Yé mẹhe nọ flin we bo nọ hodo aliho towe lẹ.
Pọ́n! Hiẹ gblehomẹ to whenue míwlẹ to ylando wà mapote,+Mí sọ wàmọ na ojlẹ dindẹn.
Todin, be míwlẹ jẹ nado yin whinwhlẹngán ya?
6 Podọ mímẹpo wẹ wá taidi mẹhe yin mawé,Bọ azọ́n dodo tọn mítọn lẹpo wá taidi avọ̀ lajijẹ tọn.+
Mímẹpo wẹ na yọ́ di amà,Bọ nuṣiwa mítọn lẹ na ze mí yì di jẹhọn.
7 Mẹdepope ma to awhádo ylọ oyín towe,Mẹdepope ma wlekli nado tẹdo gowe,Na hiẹ ko whlá nukunmẹ towe do mí,+Hiẹ ko sọ hẹn mí nado yọ́ kọnyinai na nuṣiwa mítọn wutu.*
8 Ṣigba todin, Jehovah E, hiẹ wẹ Otọ́ mítọn.+
Okò wẹ míwlẹ bọ hiẹ yin Zẹ́ndotọ* mítọn;+Mímẹpo wẹ yin azọ́n alọ towe tọn lẹ.
9 A gblehomẹ gbau blo, Jehovah E,+Podọ a flin nuṣiwa mítọn kakadoi blo.
Jaale bo pọ́n mí dè, na omẹ towe lẹ wẹ mímẹpo.
10 Tòdaho wiwe towe lẹ ko lẹzun danfafa.
Ziọni ko lẹzun danfafa de,Bọ Jelusalẹm ko lẹzun aigba gbọgbé de.+
11 Ohọ̀* wiwe podọ gigonọ* mítọn,Fie tọgbo mítọn lẹ nọ pà we te,Ko yin mimẹ̀ po miyọ́n po,+Bọ nuhe mí yiwanna lẹpo ko yin gbigbakija.
12 Po ehe lẹpo po Jehovah E, be hiẹ na gbẹ́ to dewe gọ̀dogodo wẹ ya?
Be hiẹ na gbọṣi abọẹ bo na jo mí do nado yin yasana sinsinyẹn sọmọ wẹ ya?+
Nudọnamẹ Odò Tọn
^ Kavi “nọ yí homẹfa do nọtepọn ẹn.”
^ To paa mẹ, “nado yọ́ gbọn alọ nuṣiwa mítọn tọn gblamẹ.”
^ Kavi “Basitọ.”
^ Kavi “Tẹmpli.”
^ Kavi “whanpẹnọ.”
