Isaia 59:1-21
59 Pọ́n! Alọ Jehovah tọn ma whete gbau nado whlẹngán,+Mọ otó etọn ma tli* gbau nado sè.+
2 Lala, nuṣiwa mìtọn titi lẹ wẹ hẹn mì jẹla na Jiwheyẹwhe mìtọn.+
Ylando mìtọn lẹ wẹ zọ́n bọ ewọ do whlá nukunmẹ etọn do mì,Bo gbẹ́ nado dotoaina mì.+
3 Na alọpahomẹ mìtọn lẹ ko yin hinhẹnflu gbọn ohùn dali+
Podọ alọviyẹyẹ mìtọn lẹ gbọn nuṣiwa dali.
Mìwlẹ nọ yí nùflo mìtọn lẹ do dolalo,+ podọ odẹ́ mìtọn do dọho mawadodo tọn.
4 Mẹdepope ma nọ dawhá nado biọ dodowiwa,+Mọ mẹdepope ma nọ yì owhẹ̀ nukọn po nugbodidọ po.
Yé nọ dejido onú ovọ́*+ lẹ go bo nọ dọho ovọ́ lẹ.
Yé mọhò tukla tọn bo ji oylan.+
5 Yé flé azìn odàn adínọ tọn lẹ,Bo lọ̀n ayẹyẹ-dọ́.+
Mẹdepope he dù azìn yetọn lẹ na kú,Podọ azìn he yin gbigbà nọ flé amàpoe tọ́n.
6 Ayẹyẹ-dọ́ yetọn ma na yin yiyizan di awù,Mọjanwẹ yé ma na yí nuhe yelọsu nọ basi lẹ ṣinyọ́n na yede do niyẹn.+
Oylan wẹ azọ́n yetọn lẹ,Podọ danuwiwa wẹ gọ́ alọmẹ na yé.+
7 Afọ yetọn nọ họ̀nwezun nado yì waylan,Bọ yé nọ dowezun nado yì sọ̀n ohùn homẹvọnọ tọn dai.+
Linlẹn ylankan lẹ wẹ yé nọ lẹn;Dindọn po awubla po tin to aliho yetọn lẹ ji.+
8 Yé ma ko yọ́n aliho jijọho tọn,Podọ whẹdida dodo ma tin to ali yetọn lẹ ji.+
Yé nọ hẹn aliho yetọn lẹ gbán;Mẹdepope he to zọnlinzin gbọn finẹ ma na tindo jijọho.+
9 Enẹwutu wẹ whẹdida dodo do dẹn do mí taun,Bọ dodowiwa ma plá mí.
Mí to nukundo hinhọ́n, ṣigba pọ́n! zinvlu wẹ mí mọ;Mí to nukundo okle, ṣigba zinvlu gọ́ngọ́n mẹ wẹ mí to zọnlinzin te mapote.+
10 Mí to avìdla gbọn adó go di nukuntọ́nnọ;Mí to avìdla pé mapote di mẹhe tọ́nnukun.+
Mí nọ dahli to owhè ṣádada mẹ taidi to zinvlu whèjai tọn mẹ;To huhlọnnọ lẹ ṣẹnṣẹn, mí nọ tin di mẹkúkú de poun.
11 Mímẹpo wẹ to hùnhlún di beali lẹBosọ to avigbè do dile apoe nọ dọnú do.
Mí donukun whẹdida dodo, ṣigba mí ma mọ depope;Mí sọ donukun whlẹngán, ṣigba e dẹn do mí taun.
12 Na gufinfọn mítọn lẹ sù to nukọn towe;+Dopodopo ylando mítọn lẹ tọn wẹ to kunnude sọta mí.+
Na gufinfọn mítọn lẹ họnwun na mí;Mí yọ́n nuṣiwa mítọn lẹ ganji.+
13 Mí ko gbàsẹ́n bo mọ́n Jehovah;Mí ko dogodo Jiwheyẹwhe mítọn.
Mí ko dọho gando kọgbidinamẹ po gufinfọn po go;+Mí ko mọhò lalo tọn bo dọho oklọ tọn lẹ sọn ahun mẹ.+
14 Whẹdida dodo ko yin gigọ̀ dogodo,+Bọ dodowiwa nọte to aganu boboe;+Na nugbo* ko dahli to tòplitẹn,Bọ nuhe sọgbe ma gán mọtẹn biọ finẹ.
15 Nugbo* ko busẹ,+Podọ nutindo mẹdepope he joagọ sọn oylan kọ̀n tọn nọ yin bibẹ yì.
Jehovah mọ ehe bo gblehomẹ,*Na whẹdida dodo depope ma tin.+
16 Ewọ mọdọ mẹdepope ma tin,E sọ paṣa ẹ dọ mẹdepope ma dademẹ,Enẹwutu, ewọ yí awà etọn titi do hẹn whlẹngán wá,*Podọ dodowiwa etọn titi wẹ whàn ẹn nado yinuwa.
17 To whenẹnu, e ze dodowiwa do di gbaja deBo yí ogangbakun whlẹngán* tọn ṣinyọ́n.+
E ze awù ahọsuyiyi tọn lẹ do+Bo yí zohunhun do bu ede di awugbó* de.
18 Ewọ na suahọ yé sọgbe hẹ nuhe yé ko wà:+
Adi hlan agọjẹdomẹtọ etọn lẹ podọ ahọsumẹ hlan kẹntọ etọn lẹ.+
E nasọ suahọ he jẹ lopo lẹ.
19 Yé na nọ dibusi oyín Jehovah tọn sọn whèyihọ-wajiBo nasọ nọ dibusi gigo etọn sọn whèzẹtẹn-waji,Na ewọ na wá bo na taidi tọ̀sisa he to zingidi ji de,Ehe gbigbọ Jehovah tọn to hinhẹn nado sà.
20 “Mẹflitọ+ lọ na wá Ziọni,+Yèdọ wá omẹ Jakọbu tọn he joagọ sọn sẹ́nhẹngba kọ̀n lẹ dè,”+ wẹ Jehovah dọ.
21 “Na yẹn tọn, ehe wẹ alẹnu he yẹn basi hẹ yé,”+ wẹ Jehovah dọ. “Gbigbọ ṣie he tin to ji we po ohó ṣie he n’ko zedo onù towe mẹ lẹ po—yé ma na yin didesẹ sọn onù towe mẹ, sọn onù ovi* towe lẹ tọn mẹ, kavi sọn onù ovivi towe lẹ* tọn mẹ,” wẹ Jehovah dọ, “yèdọ sọn din kakadoi podọ doidoi.”
Nudọnamẹ Odò Tọn
^ To paa mẹ, “pẹ̀n.”
^ Kavi “tata.”
^ Kavi “nugbodidọ.”
^ Kavi “Nugbodidọ.”
^ To paa mẹ, “bọ e ylan to nukun etọn mẹ.”
^ Kavi “hẹn awhàngbigba wá na ẹn.”
^ Kavi “awù he ma tindo awà.”
^ Kavi “awhàngbigba.”
^ To paa mẹ, “okún.”
^ To paa mẹ, “okún towe sin okún.”
