Isaia 50:1-11
50 Nuhe Jehovah dọ die:
“Fie wẹ owe gbẹdai tọn+ he yin nina onọ̀ mìtọn to whenue n’yàn ẹn lọ te?
Kavi mẹnu to mẹhe n’duahọ do lẹ mẹ wẹ n’sà mì na?
Pọ́n! Na nuṣiwa mìtọn titi lẹ wutu+ wẹ mì do yin sisà,Podọ na sẹ́nhẹngba mìtọn titi lẹ wutu wẹ onọ̀ mìtọn do yin yinyan.+
2 To whelọnu lo, naegbọn mẹdepope ma tin tofi to whenue n’wá?
Naegbọn mẹdepope ma siọ to whenue n’ylọ?+
Be alọ ṣie whete gbau nado fligọ wẹ,Kavi be yẹn ma tindo huhlọn depope nado whlẹngán wẹ ya?+
Pọ́n! Nugbẹnamẹ ṣie wẹ n’yí do hẹn ohù hú pete;+Yẹn hẹn tọ̀sisa lẹ zun danfafa de.+
Whèvi he to yé mẹ lẹ gble na osin ma tin wutu,Yé sọ kú na nugbla wutu.
3 N’yí zinvlu gọ́ngọ́n ṣinyọ́n na olọn lẹ,+Bo yí odẹ́vọ̀ do basi avọ̀ ṣinṣinyọn yetọn.”
4 Oklunọ Nupojipetọ Jehovah ko na mi odẹ́ mẹhe yin pinplọn lẹ tọn,*+Na yẹn nido yọ́n lehe n’sọgan yí ohó he sọgbe* do gblọnhona* mẹhe agbọ́pe lẹ do.+
E nọ fọ́n mi to afọnnu afọnnu;E nọ fọ́n otó ṣie nado nọ dotoai taidi mẹhe yin pinplọn lẹ.+
5 Oklunọ Nupojipetọ Jehovah ko hùn otó ṣie,Podọ yẹn ma yin atẹṣitọ.+
Yẹn ma lẹhlan fidevo.+
6 Yẹn lilẹ́ nẹgbé ṣie na mẹhe to nuli mi lẹPodọ alaka ṣie na mẹhe ṣùn ofún sọn e go pete lẹ.*
N’ma whlá nukunmẹ ṣie do nuyiwa winyandomẹ tọn lẹ po tántún domẹgo po.+
7 Ṣigba, Oklunọ Nupojipetọ Jehovah na gọalọna mi.+
Enẹwutu wẹ winyan ma na hù mi.
Enẹwutu wẹ n’ko hẹn nukunmẹ ṣie nado taidi osé didá,+Podọ n’yọnẹn dọ n’ma na duwinyan.
8 Mẹhe nọ lá mi di dodonọ ko sẹpọ.
Mẹnu wẹ sọgan sawhẹdokọna* mi?+
Mẹlọ ni gbọ mí ni fọnṣite dopọ.*
Mẹnu wẹ tindo owhẹ̀ de sọta mi?
Mẹlọ ni dọnsẹpọ mi.
9 Pọ́n! Oklunọ Nupojipetọ Jehovah na gọalọna mi.
Mẹnu wẹ sọgan gblewhẹdo mi?
Pọ́n! Yemẹpo wẹ na dohó di awù.
Okọ́ wẹ na dù yé.
10 Mẹnu to mì mẹ wẹ nọ dibusi JehovahBo nọ dotoaina ogbè devizọnwatọ etọn tọn?+
Mẹnu wẹ ko zinzọnlin to zinvlu gọ́ngọ́n mẹ pọ́n, matin hinhọ́n depope?
Gbọ ewọ ni dejido oyín Jehovah tọn go bo ganjẹ Jiwheyẹwhe etọn go.
11 “Pọ́n! Mìmẹpo he to miyọ́n flọ,Bosọ to miyọ́n gbòdlán,Mì zinzọnlin to hinhọ́n miyọ́n mìtọn tọn nù,To gbigbòdlán miyọ́n he mì ko flọ tọn mẹ.
Nuhe mì na mọyi sọn alọ ṣie mẹ die:
Mì na mlọnai to awufiẹsa sinsinyẹn mẹ.
Nudọnamẹ Odò Tọn
^ Kavi “odẹ́ he yin pinplọn ganji.”
^ Kavi vlavo, “na huhlọn.”
^ To paa mẹ, “yí ohó de.”
^ Kavi “mẹhe nọ ṣùn ogbì lẹ.”
^ Kavi “dọnnu hẹ.”
^ Kavi “ni pannukọn ode awetọ.”
