Isaia 23:1-18
-
Whẹdida sọta Tile (1-18)
23 Whẹdida de sọta Tile:+
Mì doavihàn, mì tọjihun Talṣiṣi tọn lẹ emi!+
Na tọjihun-glintẹn lọ ko yin gbigbakija; mẹde ma sọgan biọ e mẹ ba.
Aigba Kitimi+ tọn ji wẹ enẹ ko yin didehia yé sọn.
2 Mì nabọẹ, mì mẹhe nọ nọ̀ awà huto tọn ji lẹ emi.
Ajọwatọ he tọ́n sọn Sidoni+ bo dasá ohù lọ lẹ ko hẹn mì gọfla.
3 Osin susu ji wẹ okún Ṣiholi* tọn lẹ yin bibẹ gbọn,+Gọna jibẹwawhé Nile tọn, yèdọ nutindo towe,Ehe nọ hẹn ale wá na akọta lẹ.+
4 Hiẹ Sidoni E, winyan ni hù we, yèdọ figángán ohù tọn,Na ohù lọ ko dọmọ:
“N’ma ko mọ awufiẹsa ajipanu tọn kavi jivi pọ́n,Mọ n’ma ko pọ́n jọja sunnu lẹ kavi jọja yọnnu* lẹ go whẹ́n pọ́n.”+
5 Kẹdẹdi to whenue gbẹtọ lẹ sè linlin gando Egipti go,+Mọ wẹ yé nasọ tin to awufiẹsa mẹ, na linlin he gando Tile go wutu do niyẹn.+
6 Mì dasá jẹ Talṣiṣi!
Mì doavihàn, mì mẹhe nọ nọ̀ awà huto tọn ji lẹ emi!
7 Be tòdaho mìtọn he nọ gọ́ na aglinjijẹ sọn ojlẹ dindẹn die, yèdọ sọn bẹjẹeji etọn lọ die ya?
Afọ etọn lẹ nọ plan ẹn yì aigba he dẹn lẹ ji dai nado nọ nọ̀ finẹ.
8 Mẹnu wẹ ko basi nudide ehe sọta Tile,Yèdọ tòdaho he nọ namẹ jẹgbakun lẹ,Ehe ajọwatọ etọn lẹ yin ahọvi lẹ,Bọ gbégbò nọ yin nina ajọwatọ etọn lẹ to aigba lẹpo ji?+
9 Jehovah awhànpa lẹ tọn lọsu wẹ basi nudide ehe,Nado hẹn awagundido po whanpẹ etọn lẹpo po zun ovọ́,Nado dowinyan mẹhe gbégbò nọ yin nina to aigba pete ji lẹpo.+
10 Dasá otò towe wayi taidi Tọ̀sisa Nile tọn, hiẹ viyọnnu Talṣiṣi tọn E.
Húnglintẹn de masọ tin to finẹ ba.+
11 Jiwheyẹwhe ko dlẹnalọ etọn hlan ohù ji;E ko húnhún ahọluduta lẹ.
Jehovah ko degbe dọ figángán Fenike tọn lẹ ni yin kúnsúdona.+
12 E sọ dọmọ: “Hiẹ ma nasọ jẹaglin ba,+Hiẹ viyọnnu Sidoni tọn he to alọji bo yin kọgbidina E.
Fọnṣite, dasá yì Kitimi.+
Etlẹ yin to finẹ, hiẹ ma na mọ gbọjẹ.”
13 Pọ́n! Aigba Kaldeanu lẹ tọn.+
Omẹ ehelẹ wẹ—e ma yin Asilia+ gba—Yewlẹ wẹ ko hẹn ẹn zun nọtẹn de na nudida he nọ nọ̀ danfafa ji lẹ.
Yé ko wleawuna atọ̀họ̀ he yé nọ yí do dosla lẹ;Yé ko hẹn atọ̀họ̀ gángán etọn lẹ jẹvọ́,+Bo gbà ẹ kija mlẹnmlẹn.
14 Mì doavihàn, mì tọjihun Talṣiṣi tọn lẹ emi,Na figángán mìtọn ko yin gbigbakija.+
15 To azán enẹ gbè, Tile na yin winwọn na owhe 70,+ yèdọ kẹdẹdi owhe gbẹzan* ahọlu de tọn. To owhe 70 godo, Tile na taidi galọtọ he go ohàn yin jiji do dọmọ:
16 “Ze ajalẹn bo lẹdo tòdaho lọ pé, hiẹ galọtọ he yin winwọn E.
Hò ajalẹn towe po azọ́nyinyọnẹn po;Jihàn susu,Na yé nido flin we.”
17 To owhe 70 godo, Jehovah na lẹ́ ayidonugo etọn hlan Tile, bọ e na lẹkọ do ajọ́ etọn kọ̀n bo na nọ lọga hẹ ahọluduta aihọn tọn he to aigba nukunmẹ lẹpo.
18 Ṣigba, ale etọn po ajọ́ etọn po na yin onú wiwe de na Jehovah. E ma na yin sisẹdo kavi yin bibẹdo fidevo, na ajọ́ etọn na tin na mẹhe nọ nọ̀ Jehovah nukọn lẹ, na yé nido nọ dùnú gọ́ho bo nọ do avọ̀ dagbedagbe lẹ.+
Nudọnamẹ Odò Tọn
^ Enẹ wẹ, zẹklan Tọ̀sisa Nile tọn de.
^ To paa mẹ, “awhli.”
^ To paa mẹ, “kẹdẹdi azán.”
