Isaia 17:1-14
17 Whẹdida de sọta Damasku:+
“Pọ́n! Damasku ma nasọ yin tòdaho de ba,Podọ e na lẹzun okiti gbakija tọn.+
2 Tòdaho Aloeli+ tọn lẹ na yin kọgbẹ́ e go;Yé na lẹzun fie lẹngbọpa lẹ na nọ mlọnai doBọ mẹde ma na nọ dobuna yé.
3 Tòdaho gángán lẹ na busẹ sọn Eflaimi,+Podọ ahọluduta lọ sọn Damasku;+Gigo omẹ Silia tọn he pò lẹ tọnNa wá taidi gigo Islaelivi* lẹ tọn nkọ,” wẹ Jehovah awhànpa lẹ tọn dọ.
4 “To azán enẹ gbè, gigo Jakọbu tọn na depò,Bọ ewọ he to jogún-jogún dai* na húgo pete.
5 E na taidi to whenue jibẹwawhétọ to jinukun he to ote lẹ bẹpli,Bọ alọ etọn to ohín jinukun tọn lẹ gbẹ̀n,Yèdọ taidi whenue mẹde to wélu-wé to Agbàdo Lefaimi tọn mẹ.+
6 Dehe pò na wélu-wiwe lẹ kẹdẹ wẹ na yin jijodai,Taidi to whenue mẹde ko gbẹ̀n sinsẹ́n sọn atin olivie tọn de ji:
Olivie bibia awe kavi atọ̀n de poun wẹ nọ pò to alà he yiaga hugan lọ ji,Podọ ẹnẹ kavi atọ́n de poun to alà he de sinsẹ́n tọ́n lẹ ji,”+ wẹ Jehovah Jiwheyẹwhe Islaeli tọn dọ.
7 To azán enẹ gbè, gbẹtọ na nọ pọ́n aga hlan Didatọ etọn dè, bo na nọ zín nukun etọn do Omẹ Wiwe Islaeli tọn ji.
8 E ma na nọ pọ́n agbà lẹ,+ yèdọ azọ́n alọ edetiti tọn lẹ;+ podọ e ma na nọ zín nukun do nuhe ewọ lọsu ko yí alọvi etọn titi do basi lẹ ji, vlavo dòtin wiwe* lẹ kavi agbà nuyọnwan tọn lẹ.
9 To azán enẹ gbè, tòdaho gángán etọn lẹ na taidi lẹdo he ko yin kọgbẹ́ e go de to zungbo mẹ,+Yèdọ taidi atinlà de he ko yin kọgbẹ́ e go to Islaelivi lẹ nukọn;E na lẹzun aigba gbọgbé.
10 Na hiẹ ko wọnji Jiwheyẹwhe+ whlẹngán towe tọn go;Bo ko sọ gboawupo nado flin Osé+ gángán towe.
Enẹwutu wẹ hiẹ do nọ do atin dagbedagbe* lẹBo nọ do atinvu jonọ* tọn do yé mẹ.
11 To okle, hiẹ nọ yí sọwhiwhe do dopá lẹdo atinkan towe,To afọnnu, a nọ hẹn okún towe tọ́nkun,Ṣigba, jibẹwawhé lọ na busẹ to azán azọ̀n po awufiẹsa he ma tindo pọngbọ po tọn gbè.+
12 Mì dotoai! Awhá mẹsusu tọn yin sisè,Bọ yé to adán ji taidi ohù lẹ!
Akọta lẹ to zingidi ji,Bọ awhágbe yetọn taidi nudidọ osin he to zingidi ji lẹ tọn!
13 Akọta lẹ na dawhá taidi zingidi osin susu tọn.
Ewọ na gbẹnuna yé, bọ yé na họnyi fidindẹn,Bo na yin yinyan sẹ̀ dile jẹhọn nọ fú ofló tata sẹ̀ to osó ji do,Yèdọ taidi ogbé húhú he to bibli to yujẹhọn nù.
14 To whèjai, obu na jẹ yé ji.
Whẹpo ai nado họ́n, yé ma nasọ tin ba.
Nuhe na jọ do mẹhe to nutindo mítọn bẹ yì lẹ go niyẹnPodọ nuhe to tepọn mẹhe to nutindo mítọn lẹ bẹ yì di ogblànnu lẹ niyẹn.
Nudọnamẹ Odò Tọn
^ To paa mẹ, “visunnu Islaeli tọn.”
^ To paa mẹ, “Bọ ojó agbasalan etọn tọn.”
^ Kavi “whanpẹnọ.”
^ Kavi “yẹwhe jonọ de.”
