Isaia 16:1-14
-
Owẹ̀n sọta Moabi zindonukọn (1-14)
16 Mì do agbò de hlan gandutọ aigba lọ tọn,Yèdọ sọn Sela yì danfafa lọ jiKakajẹ osó viyọnnu Ziọni tọn lọ tọn kọ̀n.
2 Kẹdẹdi ohẹ̀ he yin yinyan sọn adọ́ etọn mẹ,+Mọ wẹ viyọnnu Moabi tọn lẹ na te to fie tọ̀sisa Alnọni ma siso te lẹ.+
3 “Mì na ayinamẹ bo yinuwa sọgbe hẹ nudide lọ.
Hẹn yẹtẹn towe dózin to owhè ṣádada mẹ kẹdẹdi zinvlu zánmẹ tọn.
Whlá mẹhe gbàdo lẹ, a sọ de mẹhe to hinhọ̀n lẹ hia blo.
4 Moabi E, gbọ omẹ ṣie he gbàdo lẹ ni nọ nọ̀ hiẹ mẹ.
Lẹzun fie yé sọgan họ̀n whlá do, na mẹvasudotọ lọ wutu.+
Kọgbidinamẹtọ lọ na yin didesẹ sọn aimẹ,Vasudo lọ na wá opodo,Podọ mẹhe nọ tùnafọ mẹdevo ji lẹ na dọ̀n sọn aigba ji.
5 Enẹgodo, ofìn de na yin didoai gligli to owanyi nugbo mẹ.
Mẹlọ he na sinai do e ji to gòhọ Davidi tọn mẹ na yin nugbonọ;+E na nọ dawhẹ jijlọ bo na nọ hẹn dodowiwa ṣẹ to niyaniya mẹ.”+
6 Mí ko sè gando goyiyi Moabi tọn go—e nọ yigo gbau+—Gọna sakla etọn, goyiyi etọn po homẹgble etọn po;+Ṣigba, ohó ovọ́ etọn ma na wà nudepope.
7 Enẹwutu, Moabi na doavihàn do Moabi ji;Yemẹpo wẹ na doavihàn.+
Mẹhe ko yin hihò lẹ na nọ aluẹmẹ na akla hìhì ovẹn sinsẹ́n Kili-halesẹti tọn lẹ.+
8 Na vẹngle Hẹṣbọni tọn lẹ+ ko hú,Yèdọ vẹntin Sibma tọn,+Gandutọ akọta lẹ tọn ko tùnafọ alà etọn he gọ́ na ovẹn sinsẹ́n lẹ ji;Yé ko yì kaka Jazẹli;+Bo ko dlẹnkan yì danfafa lọ ji.
Alà-vú etọn lẹ ko vùn pé bo ko dlẹnkan kakajẹ ohù lọ kọ̀n.
9 Enẹwutu wẹ yẹn na viavi do vẹntin Sibma tọn ji dile n’viavi na Jazẹli do.
Hẹṣbọni po Eleale po E, yẹn na yí dasin ṣie lẹ do yọ̀n mì pete,+Na awhágbe he nọ yin dido do sinsẹ́n alunlun mẹ tọn po jibẹwawhé mìtọn po tamẹ ko doalọte.*
10 Homẹhunhun po ayajẹ po ko yin didesẹ sọn atin dido lẹ ṣẹnṣẹn,Ohàn ayajẹ tọn kavi awhágbe depope ma na nọ yin sisè to vẹngle lẹ mẹ ba.+
Nutùntọ lẹ ma nasọ nọ tùn ovẹn sinsẹ́n to ovẹn-finyọ́ndo lẹ mẹ ba,Na yẹn ko hẹn awhágbe lọ doalọte.+
11 Enẹwutu wẹ yẹn do to sisọsisọ to dee mẹ na Moabi wutu,+Di okàn ajalẹn he to núdọ tọn,Bosọ to sisọsisọ to ohò ṣie mẹ dọ́n na Kili-halesẹti wutu.+
12 Eyin Moabi tlẹ nọ do magbọjẹ na ede to ofi yiaga lọ bo nọ yì hodẹ̀ to fiwiwe etọn, e ma na diọ nudepope.+
13 Ohó he Jehovah dọ wayi gando Moabi go niyẹn.
14 Podọ todin, Jehovah dọmọ: “To owhe atọ̀n gblamẹ, kẹdẹdi owhe pakanọ de tọn lẹ,* hunyanhunyan wunmẹ lẹpo wẹ na hẹn gigo Moabi tọn zun ovọ́, podọ omẹ vude poun he ma sọtẹ́n wẹ na pò.”+
Nudọnamẹ Odò Tọn
^ Kavi vlavo, “Na awhágbe awhàn tọn ko jẹte wá sinsẹ́n alunlun mẹ tọn po jibẹwawhé mìtọn po ji.”
^ Kavi “he yin hihia po sọwhiwhe po dile pakanọ de nọ wà do”; enẹ wẹ, to owhe atọ̀n pẹpẹ godo.
