Isaia 10:1-34
10 Dindọn wẹ na mẹhe nọ de aṣẹdai awugblenamẹ tọn lẹ tọ́n lẹ,+Mẹhe nọ to awuwlena osẹ́n kọgbidinamẹ tọn lẹ gbọzangbọzan,
2 Nado gbẹ́ owhẹ̀ wamọnọ lẹ tọn dai,Nado tẹ̀ whẹdida dodo agbátọnọ he to omẹ ṣie lẹ ṣẹnṣẹn,+Bo nọ yí nutindo asuṣiọsi lẹ tọnPodọ nutindo tọṣiọvi lẹ tọn di ogblànnu!+
3 Etẹwẹ mì na wà to azán lẹnjo* tọn gbè,+Whenue vasudo na wá mì ji sọn fidindẹn?+
Mẹnu dè wẹ mì na họnyi na alọgọ,+Podọ fie wẹ mì na bẹ adọkunnu* mìtọn lẹ do?
4 Nudepope ma na pò adavo nado nọ dẹ́ do odò to gàntọ lẹ ṣẹnṣẹnKavi nado jai to mẹhe yin hùhù lẹ ṣẹnṣẹn.
Po ehe lẹpo po, homẹgble etọn ma ko doalọte,Ṣigba, alọ etọn gbẹ́ pò to dindlẹn nado sayana yé.+
5 “Mì pọ́n! Asilianu lọ,+Yèdọ opò he n’na yí do dó homẹgble ṣie hia+
Podọ aglọpò he to alọ yetọn mẹ nado do whẹgbledomẹ ṣie hia!
6 Yẹn na do e hlan sọta akọta atẹṣitọ de,+Yèdọ sọta akọta he ko hẹn homẹgble mi lọ;Yẹn na degbena ẹn nado bẹ nutindo po ogblànnu susu poPodọ nado tùnafọ yé ji taidi ogbọ̀n to tòhomẹ-liho lẹ ji.+
7 Ṣigba, ehe ma na yin ojlo etọnPodọ ewọ ma na lẹn ehe to ahun etọn mẹ;Na nuhe tin to ahun etọn mẹ wẹ nado husudo,Yèdọ nado sán akọta susu sẹ̀, e ma yin vude.
8 Na ewọ nọ dọ dọ,‘Be e ma yin ahọvi ṣie lẹpo wẹ yin ahọlu lẹ ya?+
9 Be Kalnọ+ ma taidi Kalkemiṣi ya?+
Be Hamati+ ma taidi Alpadi+ ya?
Be Samalia+ ma taidi Damasku ya?+
10 Alọ ṣie ko hò ahọluduta yẹwhe ovọ́ lẹ tọn lẹ yí,Ehe boṣiọ pipà yetọn lẹ sù hú Jelusalẹm po Samalia po tọn lẹ!+
11 Be yẹn ma nasọ wà na Jelusalẹm po boṣiọ etọn lẹ poKẹdẹdile yẹn ko wà na Samalia po yẹwhe ovọ́ etọn lẹ po do ya?’+
12 “To whenue Jehovah na ko dotana azọ́n etọn lẹpo to Osó Ziọni ji podọ to Jelusalẹm, Ewọ* na sayana ahọlu Asilia tọn na kanyinylan he gọ́ ahun etọn mẹ wutu podọ na goyiyi po nukun sakla tọn etọn po.+
13 Na ewọ nọ dọ dọ,‘Huhlọn ṣie wẹ yẹn na yí do wà ehePodọ gbọn nuyọnẹn ṣie dali, na nuyọnẹntọ de wẹ yẹn.
N’na de dogbó akọta lẹ tọn sẹ̀+Bo na bẹ adọkunnu yetọn lẹ di ogblànnu,+Podọ taidi huhlọnnọ de, yẹn na hẹn tòmẹnu lọ lẹ zun mẹmẹglọ.+
14 Dile mẹde nọ sisẹ́ alọ etọn do adọ́ de mẹ do,Alọ ṣie na bẹ nutindo gbẹtọ lẹ tọn;Podọ dile mẹde nọ bẹ azìn he yin kọgbẹ́ e go lẹ pli do,Yẹn na bẹ aigba pete pli!
Depope to yé mẹ ma na húnhún awà etọn lẹ kavi kẹ̀ onù etọn kavi dọnú.’”
15 Be asiọvi gán ze ede daga do mẹhe nọ yí i do gbò atin ji wẹ ya?
Be whlẹzẹ̀nú gán ze ede daga do mẹhe nọ yí i do zẹ̀ atin ji wẹ ya?
Be aglọpò+ sọgan húnhún mẹhe hẹn ẹn wẹ ya?
Kavi be opò sọgan ze mẹhe hẹn ẹn lọ daga wẹ ya?
16 Enẹwutu, Oklunọ nugbo lọ, Jehovah awhànpa lẹ tọn,Na hẹn omẹ etọn he mọlanmẹ lẹ húgo,+Ewọ nasọ flọ miyọ́n sinsinyẹn do oglọ na gigo etọn.+
17 Hinhọ́n Islaeli tọn+ na lẹzun miyọ́n de,+Omẹ Wiwe etọn nasọ lẹzun miyọ́n jiji de;E na ji bo fiọ ogbé ylankan etọn lẹ po wùnkan etọn lẹ po to azán dopo gblamẹ.
18 Ewọ na de gigo zungbo etọn tọn po atin dido etọn lẹ po tọn sẹ̀ mlẹnmlẹn;*E na taidi lehe mẹhe to azọ̀njẹ de nọ to gohú do.+
19 Sọha atin he pò to zungbo etọn mẹ lẹ tọnNa whè sọmọ bọ yọpọ sunnu de sọgan hia yé.
20 To azán enẹ gbè, omẹ Islaeli tọn he pò lẹPo mẹhe luntọ́n to owhé Jakọbu tọn gbè lẹ poMa na nọ ganjẹ mẹhe sayana yé lẹ go na alọgọ ba;+Ṣigba, yé na nọ gbọn nugbonọ-yinyin dali ganjẹ Jehovah go na alọgọ,Yèdọ Omẹ Wiwe Islaeli tọn lọ.
21 Pipotọ de poun wẹ na lẹkọ,Yèdọ pipotọ Jakọbu tọn, wá Jiwheyẹwhe Huhlọnnọ lọ dè.+
22 Na Islaeli E, dile etlẹ yindọ omẹ towe lẹSù taidi tọkẹ́n ohù tọn lẹ,Vude poun wẹ na yin pipotọ he na lẹkọ.+
Nudide ko yin bibasi nado sukúndona yé,+Bọ whẹdida dodo* na yin hinhẹnṣẹ do yé ji.+
23 Mọwẹ, nudide kúnsúdo namẹ tọn lọ he Oklunọ Nupojipetọ, Jehovah awhànpa lẹ tọn ko basi,Na yin hinhẹnṣẹ to aigba lọ pete ji.+
24 Enẹwutu, nuhe Oklunọ Nupojipetọ, Jehovah awhànpa lẹ tọn dọ die: “Mì omẹ ṣie he nọ nọ̀ Ziọni lẹ emi, mì dibuna Asilianu he nọ saba yí opò do linú mì+ bo nọ ze aglọpò etọn daga sọta mì dile Egipti basi do blo.+
25 Na to ojlẹ vude poun godo, whẹgbledomẹ lọ na wá vivọnu; homẹgble ṣie na yin anadena sọta yé nado và yé sudo.+
26 Jehovah awhànpa lẹ tọn na ze obá de daga do e ji,+ kẹdẹdi to whenue e gbawhàn Midiani tọn to osé Olẹbi tọn kọ̀n.+ Aglọpò etọn nasọ yin dindlẹn do ohù ji, bọ ewọ na ze e daga dile e basi na Egipti do.+
27 To azán enẹ gbè, agbàn etọn na tọ́n sọn abọ́ ji na we,+Bọ zẹgẹ etọn na tọ́n sọn okọ̀ na we,+Zẹgẹ lọ nasọ yin winwẹ́n sẹ̀,+ na amì lọ wutu.”
28 Ewọ ko wá Aiati;+E ko jugbọn Miglọni;Mikmaṣi+ wẹ e zlọn agbàn etọn do.
29 Yé ko jugbọn fie tọ̀sisa ma siso te;Geba+ wẹ yé dọ́;Lama sisọ, Gibea+ Sauli tọn ko họnyi.+
30 Ze ogbè daga bo yí ogbè lélé do dawhá, hiẹ viyọnnu Galimi tọn E!
Tuntoai, hiẹ Laiṣa E!
Ṣo Anatọti E!+
31 Madmena ko họnyi.
Mẹhe nọ nọ̀ Gebimi lẹ ko yì dín fibẹtado.
32 Ewọ na nọte to Nobi to azán ehe gbè.+
E miọn akotokún etọn hlan osó viyọnnu Ziọni tọn,Yèdọ okọ́ta Jelusalẹm tọn.
33 Pọ́n! Oklunọ nugbo lọ, yèdọ Jehovah awhànpa lẹ tọn,To atinlà lẹ sán sẹ̀ to aliho he dobu de mẹ;+Atin he yiji hugan lẹ to yinyin sinsánliai,Bọ dehe yiaga taun lẹ to yinyin hinhẹnwa odò.
34 E yí azọ́nwanu gànyuu tọn* de do hò zunkan daho lẹ liai to zungbo lẹ mẹ,Lẹbanọni nasọ jai gbọn omẹ huhlọnnọ de dali.
Nudọnamẹ Odò Tọn
^ Kavi “yasanamẹ.”
^ Kavi “gigo.”
^ To paa mẹ, “Yẹn.”
^ Kavi “sẹ̀ sọn alindọn ji jẹ agbasalan ji.”
^ Kavi “yasanamẹ.”
^ Kavi “yí asiọvi.”
