Salmu 94:1-23
94 Jehovah, Jiwheyẹwhe ahọsuyitọ E,+Jiwheyẹwhe ahọsuyitọ E, họnwun jẹgbonu!
2 Fọ́n, hiẹ Whẹdatọ aigba tọn E.+
Yí nuhe saklanọ lẹ jẹna do suahọ yé.+
3 Nawẹ e na dẹnsọ, Jehovah E,Nawẹ e na dẹnsọ bọ mẹylankan na zindonukọn nado to aglinjẹ?+
4 Yé nọ to nuwladọ bo nọ to hodọ po goyiyi po;Ylanwatọ lẹpo wẹ nọ to nùgo yí.
5 Jehovah E, yé nọ to omẹ towe lẹ gídí,+Bo nọ to kọgbidina ogú towe.
6 Yé nọ hù asuṣiọsi po mẹhe to jonọ-gbéji po,Bosọ nọ hù tọṣiọvi lẹ ga.
7 Yé nọ dọmọ: “Jah ma to mimọ;+Jiwheyẹwhe Jakọbu tọn ma nọ doayi e go.”+
8 Amọ́, ehe ni họnwun na mì, mì gugutọ lẹ emi;Whetẹnu wẹ mì ka na wá do wuntuntun hia, mì nulunọ lẹ emi?+
9 Mẹlọ he wleawuna otó, be e ma gán sènu wẹ?
Mẹlọ he basi nukun, be e ma gán mọnú wẹ?+
10 Mẹlọ he to nugbẹna akọta lẹ, be e ma gán wọhẹmẹ wẹ?+
Ewọ wẹ Mẹlọ he nọ namẹ oyọnẹn!+
11 Jehovah yọ́n linlẹn gbẹtọ tọn lẹ,Dọ ovọ́ wẹ yé.+
12 Jah E, ayajẹnọ wẹ mẹhe hiẹ nọ wọhẹ,+Yèdọ mẹhe hiẹ nọ yí osẹ́n towe do plọn,+
13 Nado na ẹn vivò to ojlẹ nugbajẹmẹji tọn lẹ mẹ,Kakajẹ whenue odò de na yin kùnkùn dai na mẹylankan.+
14 Na Jehovah ma na jo omẹ etọn lẹ do,+Mọjanwẹ e ma na gbẹ́ ogú etọn dai do niyẹn.+
15 Na whẹdida dodo na yin hinhẹngọwa,Bọ ahunjijlọnọ lẹpo na nọ hodo e.
16 Mẹnu wẹ na fọ́n do mẹylankan lẹ ji na mi?
Mẹnu wẹ na diọnukunsọ ylanwatọ lẹ na mi?
17 Eyin Jehovah ma ko gọalọna mi wẹ,Yẹn* na ko dọ̀n* hoho.+
18 Whenue yẹn dọmọ: “Afọ ṣie to dídídídí,”
Jehovah E, owanyi nugbo towe wẹ hẹn mi dote.+
19 Whenue magbọjẹ* lẹ húagbọ́ mi,*Hiẹ miọnhomẹna mi bo hẹn kọgbọ wá na mi.*+
20 Be gandutọ* he ko gblezọn lẹ sọgan kọ̀n yede dopọ hẹ weDile yé ze osẹ́n* donukọn do to ayiha kàn nado hẹn tukla wá wẹ ya?+
21 Yé nọ yangbé dodonọ* tọn sinsinyẹn+Bo nọ dá kú-whẹ̀ na homẹvọnọ.*+
22 Ṣigba, Jehovah na lẹzun fibẹtado he tindo hihọ́* de na mi,Jiwheyẹwhe ṣie wẹ osé he mẹ yẹn nọ dín fibẹtado te.+
23 Ewọ na hẹn oylan he yé ko wà lẹ gọwá ota yetọn titi.+
E na yí oylan yetọn titi do de yé sẹ̀ sọn aimẹ.*
Jehovah Jiwheyẹwhe mítọn na de yé sẹ̀ sọn aimẹ.*+
Nudọnamẹ Odò Tọn
^ To paa mẹ, “biọ abọẹninọ mẹ.”
^ Kavi “Alindọn ṣie.”
^ Kavi “linlẹn ayimajai tọn.”
^ Kavi “lẹzun susu to ohò ṣie mẹ.”
^ Kavi “Homẹmiọnnamẹ towe lẹ hẹn kọgbọ wá na alindọn ṣie.”
^ Kavi “whẹdatọ.”
^ Kavi “gbedide.”
^ To paa mẹ, “Yé nọ do ohùn homẹvọnọ tọn hia taidi whẹhutọ (mẹylankan).”
^ Kavi “alindọn dodonọ tọn.”
^ Kavi “ofi yiaga he tindo hihọ́.”
^ To paa mẹ, “do bọnùdo na yé.”
^ To paa mẹ, “na bọnùdo na yé.”
