Salmu 89:1-52
Maskili.* Ohàn Etani+ Ezlanu lọ tọn.
89 Yẹn na nọ jihàn gando lehe Jehovah nọ do owanyi nugbo etọn hia gbọn go kakadoi.
Yẹn na nọ yí onù ṣie do hẹn nugbonọ-yinyin towe zun yinyọnẹn na whẹndo lẹpo.
2 Na yẹn ko dọ dọ: “Owanyi nugbo na yin hinhẹn lodo* kakadoi,+Podọ hiẹ ko hẹn nugbonọ-yinyin towe lodo gligli to olọn mẹ.”
3 “Yẹn ko basi alẹnu de hẹ mẹdide ṣie;+Yẹn ko whlé na Davidi devizọnwatọ ṣie dọmọ:+
4 ‘Yẹn na hẹn kúnkan* towe dote kakadoi,+Bo nasọ do ofìn towe ai to whẹndo he ja lẹpo mẹ.’”+ (Sela)
5 Olọn lẹ to azọ́njiawu towe lẹ pà, Jehovah E,Mọwẹ, agun omẹ wiwe lẹ tọn to nugbonọ-yinyin towe pà.
6 Na mẹnu to mẹhe to jiwhé lẹ mẹ wẹ sọgan yin yiyijlẹdo Jehovah go?+
Mẹnu to visunnu Jiwheyẹwhe tọn lẹ mẹ+ wẹ taidi Jehovah?
7 Jiwheyẹwhe nọ yin budisi to pipli omẹ wiwe lẹ tọn mẹ;+Ewọ klo bo dobu to mẹhe lẹdo e pé lẹpo ṣẹnṣẹn.+
8 Jehovah Jiwheyẹwhe awhànpa lẹ tọn E,Mẹnu wẹ dohuhlọn taidi hiẹ, Jah E?+
Nugbonọ-yinyin towe lẹdo we pé.+
9 Hiẹ nọ dava ohù he to adán ji;+Eyin agbówhẹn etọn lẹ tlẹ to zingidi ji, hiẹ nọ hò hùwhẹ yé.+
10 Hiẹ ko gbidi Lahabi*+ taidi mẹhe yin hùhù de.+
Hiẹ ko yí awà huhlọnnọ towe do gbà kẹntọ towe lẹ do.+
11 Towe wẹ olọn po aigba po;+Aigba po nuhe tin to e ji lẹ po+—hiẹ wẹ dá yé.
12 Hiẹ wẹ dá agewaji po hùwaji po;Taboli+ po Hẹlmọni+ po nọ yí ayajẹ do pà oyín towe.
13 Awà towe tindo hlọnhlọn;+Alọ towe dohuhlọn;+Adusilọ towe yin zizedaga.+
14 Dodowiwa po whẹdida dodo po wẹ yin dodonu ofìn towe tọn;+Owanyi nugbo po nugbonọ-yinyin po tin to nukọn towe.+
15 Ayajẹnọ wẹ mẹhe nọ yí homẹhunhun do dawhá lẹ.+
Jehovah E, yé nọ zinzọnlin to hinhọ́n nukunmẹ towe tọn nù.
16 Yé nọ to ayajẹ to oyín towe mẹ to azán lọ pete ji,Bo nọ yin zizedaga to dodowiwa towe mẹ.
17 Na hiẹ wẹ gigo huhlọn yetọn tọn,+Podọ gbọn nukundagbe towe dali wẹ huhlọn* mítọn nọ yin zizedaga.+
18 Na Jehovah dè wẹ awọ̀yinu mítọn wá sọn,Omẹ Wiwe Islaeli tọn dè wẹ ahọlu mítọn wá sọn.+
19 To ojlẹ enẹ mẹ, hiẹ dọhona nugbonọ towe lẹ to numimọ mẹ dọmọ:
“Yẹn ko na huhlọn mẹhe yin hlọnhlọnnọ de;+Yẹn ko ze mẹdide de daga to gbẹtọ lẹ ṣẹnṣẹn.+
20 Yẹn ko mọ Davidi devizọnwatọ ṣie;+Yẹn ko sọ yí amì wiwe ṣie do de e.+
21 Alọ ṣie na nọ nọgodona ẹn,+Awà ṣie nasọ nọ na ẹn huhlọn.
22 Kẹntọ depope ma na nọ hẹn ẹn gánnugánnu nado sú takuẹ,Podọ mawadodonọ de ma na nọ gbidikọna ẹn.+
23 Yẹn na gbidi kẹntọ etọn lẹ sẹ̀ sọn nukọn etọn+Bo na hù mẹhe gbẹwanna ẹn lẹ.+
24 Nugbonọ-yinyin ṣie po owanyi nugbo ṣie po tin po e po,+Huhlọn* etọn nasọ yin zizedaga to oyín ṣie mẹ.
25 Yẹn na na ẹn aṣẹ do ohù jiBo nasọ na ẹn aṣẹ do tọ̀sisa lẹ ji.+
26 Ewọ na dawhá ylọ mi dọmọ: ‘Hiẹ wẹ Otọ́ ṣie,Jiwheyẹwhe ṣie podọ Osé whlẹngán ṣie tọn.’+
27 Yẹn nasọ yí i do basi viplọnji,+Yèdọ mẹhe yiaga hugan to ahọlu aigba ji tọn lẹ mẹ.+
28 Yẹn na nọ do owanyi nugbo ṣie hia ẹ kakadoi,+Podọ alẹnu he yẹn basi hẹ ẹ ma na gboawupo gbede.+
29 Yẹn na hẹn kúnkan* etọn dote kakadoiBo nasọ hẹn ofìn etọn gbọṣi aimẹ taidi olọn.+
30 Eyin visunnu etọn lẹ gbẹkọ osẹ́n ṣie goBo ma zinzọnlin sọgbe hẹ gbedide* ṣie lẹ,
31 Eyin yé tùnafọ osẹ́ndoai ṣie lẹ jiBo masọ yìn gbedide ṣie lẹ ba,
32 Whenẹnu, yẹn na yí opò do sayana yé, na tolivivẹ* yetọn wutu+Bo na yí obá do hò yé, na nuṣiwa yetọn wutu.
33 Ṣigba, yẹn ma na gbẹkọ owanyi nugbo he n’nọ dohia ẹ go gbede,+Mọjanwẹ yẹn ma na yin lalonọ gando opagbe* ṣie go do niyẹn.
34 Yẹn ma na gbà alẹnu ṣie+Kavi diọ nuhe nùflo ṣie lẹ ko dọ.+
35 Yẹn ko whlé to wiwe-yinyin ṣie mẹ whladopo podọ kakadoi;Yẹn ma na dolalo na Davidi.+
36 Kúnkan* etọn na gbọṣi aimẹ kakadoi;+Ofìn etọn na gbọṣi aimẹ taidi owhè to nukọn ṣie.+
37 E na yin hinhẹn lodo kakadoi taidi osunTaidi kunnudetọ nugbonọ de to agahomẹ.” (Sela)
38 Ṣigba, hiẹ lọsu ko tùn in dlan bo gbẹ́ ẹ dai;+Hiẹ ko gblehomẹ sinsinyẹn do mẹyiamisisadode towe go.
39 Hiẹ ko gbẹkọ alẹnu he a basi hẹ devizọnwatọ towe go;A ko hẹn jẹgbakun etọn flu gbọn zize e dlan aigba dali.
40 Hiẹ ko gbà adó* zannu tọn etọn lẹpo hányán;A ko sọ gbà figángán etọn lẹ kija.
41 Mẹhe juwajei lẹpo wẹ ko bẹ nutindo etọn lẹ;+Ewọ ko lẹzun aṣagbọ́nu na kọmẹnu etọn lẹ.
42 Hiẹ ko hẹn mẹgbeyantọ etọn lẹ nado gbawhàn;*+Hiẹ ko hẹn kẹntọ etọn lẹpo jaya.
43 Hiẹ ko sọ gọ̀ ohí etọn dogodo,Bo hẹn ẹn nado joagọyigodo to awhàngbenu.
44 Hiẹ ko hẹn whanpẹ daho etọn wá opodoBo họ́ ofìn etọn sú ai.
45 Hiẹ ko sán jọja whenu etọn dogli;A sọ yí winyan ṣinyọ́n na ẹn di avọ̀. (Sela)
46 Jehovah E, nawẹ hiẹ na whlá dewe dẹnsọ? Kakadoi wẹ ya?+
Be homẹgble towe na to jiji di miyọ́n zọnmii wẹ?
47 Flin lehe gbẹzan ṣie whègli do!+
Be hiẹ dá gbẹtọvi lẹpo matin lẹndai depope wẹ?
48 Gbẹtọ tẹwẹ sọgan nọgbẹ̀ bo ma na kú gbede?+
Be ewọ sọgan whlẹn ede* sọn huhlọn Yọdò tọn si* wẹ ya? (Sela)
49 Jehovah E, fie wẹ nuyiwa owanyi nugbo tọn towe hoho lẹ te,Ehe hiẹ ko whlé na Davidi to nugbonọ-yinyin towe mẹ?+
50 Jehovah E, flin mẹṣanko he yin hinhẹnwa devizọnwatọ towe lẹ ji;Lehe yẹn to dandannu glọ nado doakọnna mẹṣanko mẹlẹpo tọn* do;
51 Lehe kẹntọ towe lẹ nọ to zunzun mi mapote do, Jehovah E;Lehe yé ko ṣàn afọdide mẹyiamisisadode towe tọn lẹpo kò do.
52 Na Jehovah ni yin pipà kakadoi. Niṣẹ podọ Niṣẹ.+
Nudọnamẹ Odò Tọn
^ Kavi “na gbọṣi aimẹ.”
^ To paa mẹ, “okún.”
^ Vlavo ehe to alọdlẹndo Egipti kavi Falo etọn.
^ To paa mẹ, “azò.”
^ To paa mẹ, “Azò.”
^ To paa mẹ, “okún.”
^ Kavi “whẹdida.”
^ Kavi “atẹṣiṣi.”
^ To paa mẹ, “nugbonọ-yinyin.”
^ To paa mẹ, “Okún.”
^ Kavi “bẹtẹn.”
^ To paa mẹ, “ze adusilọ mẹgbeyantọ etọn lẹ tọn daga.”
^ Kavi “alindọn etọn.”
^ To paa mẹ, “nado hẹn mẹṣanko mẹlẹpo tọn do akọ́nnu.”