Salmu 78:1-72
Maskili.* Ohàn Asafi tọn.+
78 Mì omẹ ṣie lẹ emi, mì dotoaina osẹ́n* ṣie;Mì tuntoai na ohó he nọ tọ́n sọn onù ṣie mẹ lẹ.
2 Yẹn na yí ohó milomilo do dọho.
Yẹn na hẹn oló whenu dindẹn die tọn lẹ zun yinyọnẹn.+
3 Nuhe mí ko sè bosọ yọnẹn,Bọ otọ́ mítọn lẹ ko pìntàn etọn na mí lẹ,+
4 Mí ma na whlá yé do kúnkan yetọn lẹ;Mí na lá yé na whẹndo he ja,+Yèdọ azọ́n Jehovah tọn he jẹna pipà lẹ po huhlọn etọn po,+Gọna nujiawu he e ko wà lẹ.+
5 E ko wleawuna nuflinmẹ de to Jakọbu mẹBo ze osẹ́n de dai to Islaeli;Ewọ degbena tọgbo mítọn lẹNado hẹn onú ehelẹ zun yinyọnẹn na ovi yetọn lẹ,+
6 Na whẹndo he ja,Yèdọ ovi he na wá yin jiji lẹ, nido sọgan yọ́n yé.+
To godo mẹ, yelọsu lẹ na pìntàn onú ehelẹ tọn na ovi yetọn lẹ.+
7 To whenẹnu, yelọsu lẹ na nọ dejido Jiwheyẹwhe go.
Yé ma na wọn azọ́n Jiwheyẹwhe tọn lẹ+Kakatimọ, yé na nọ yìn gbedide etọn lẹ.+
8 Gbọnmọ dali, yé ma na wá taidi tọgbo yetọn lẹ,He yin whẹndo tasinyẹntọ po atẹṣitọ de po,+Yèdọ whẹndo de he ahun yetọn ma lodo*+Bọ gbigbọ yetọn ma yin nugbonọ na Jiwheyẹwhe.
9 Eflaiminu lẹ hẹn ogá,Ṣogan, yé họ̀n to azán awhànfunfun tọn gbè.
10 Yé ma payi alẹnu Jiwheyẹwhe tọn go+Bosọ gbẹ́ nado nọ zinzọnlin sọgbe hẹ osẹ́n etọn.+
11 Humọ, yé wọn nuhe ewọ ko wà lẹ,+Yèdọ azọ́njiawu etọn he e ko dohia yé lẹ.+
12 Ewọ wà nujiawu lẹ to nukun tọgbo yetọn lẹ tọn mẹ,+To aigba Egipti tọn ji, to agbegbe Zoani tọn ji.+
13 E má ohù do awe, na yewlẹ nido gbọn e mẹ wayi,E sọ hẹn osin lẹ nado jlọ ṣite di adó de.+
14 E yí aslọ de do nọ deanana yé to oklePodọ hinhọ́n miyọ́n tọn de to ozán lẹpo mẹ.+
15 Ewọ zẹ̀ osé lẹ to danfafa ji,Bosọ hẹn yé nado nùsin gọ́ho taidi sọn asisa osin tọn he siso de mẹ.+
16 Ewọ hẹn osin nado sà jẹgbonu sọn osé de mẹBo hẹn osin nado sà jẹgbonu taidi tọ̀sisa lẹ.+
17 Ṣigba, yé zindonukọn nado to ylanwa sọta ẹGbọn atẹṣiṣi sọta Gigogán lọ to danfafa ji dali;+
18 Yé tẹ́n* Jiwheyẹwhe pọ́n to ahun yetọn mẹ+Gbọn núdùdù he to jijlo yé vẹkuvẹku lọ* bibiọ dali.
19 Enẹwutu, yé dọho jẹagọdo Jiwheyẹwhe,Bo dọmọ: “Be Jiwheyẹwhe sọgan tẹ́ tafo de na mí to danfafa ji ya?”+
20 Pọ́n! Ewọ wẹ linú osé deBọ osin sà jẹgbonu bosọ gọfla.+
Ṣogan, yé kanse dọ: “Be ewọ sọgan sọ na mí núdùdù,Kavi na olàn mí omẹ etọn lẹ ya?”+
21 Whenue Jehovah sè ehe, adi do e taun;+Miyọ́n+ de sọ wá Jakọbu ji,Bọ homẹgble etọn jizò sọta Islaeli,+
22 Na yé ma tindo yise to Jiwheyẹwhe mẹ wutu;+Yé ma dejido nugopipe etọn nado whlẹn yé go.
23 Enẹ wẹ zọ́n bọ ewọ degbena aslọ agahomẹ tọn lẹ,Bosọ hùn họngbo olọn tọn lẹ.
24 Ewọ sọ hẹn manna nado nọ to jijà, na yé nido dù;E na yé jinukun olọn mẹ tọn.+
25 Gbẹtọ lẹ dù núdùdù huhlọnnọ lẹ tọn;*+E wleawu etọn na yé sọmọ bọ e pekọna yé.+
26 E fọ́n jẹhọn whèzẹtẹn tọn dote to olọn mẹBosọ hẹn jẹhọn hùwaji tọn nado yìn gbọn huhlọn etọn dali.+
27 E sọ hẹn olàn nado ja do yé ji taidi kọ́gudu,Bo hẹn ohẹ̀ lẹ ja taidi tọkẹ́n huto tọn lẹ.
28 E nọ hẹn yé nado ja do osla etọn ṣẹnṣẹn,Yèdọ lẹdo gòhọ etọn lẹ pete.
29 Yé sọ dù bo gọ́ho zẹjlẹgo;E na yé nuhe jlo yé lẹ.+
30 Ṣigba, whẹpo yé nado hẹn pekọ wá na ojlo vẹkuvẹku yetọn to gigọ́ mẹ,Yèdọ dile núdùdù lọ gbẹ́ to nùmẹ na yé,
31 Homẹgble Jiwheyẹwhe tọn jizò do yé ji.+
E hù sunnu huhlọnnọ hugan yetọn lẹ;+Bo hù jọja sunnu Islaeli tọn lẹ.
32 Mahopọnna ehe, yé sọ waylando dogọ+Bo ma tindo yise to azọ́njiawu etọn lẹ mẹ.+
33 Enẹwutu, e de yé sẹ̀ sọn aimẹ taidi gbọfufu tata,+Bo hẹn owhe yetọn lẹ wá vivọnu gbọn nugbajẹmẹji ajiji lẹ dali.
34 Ṣigba, whedepopenu he e jẹ yé hù ji, yé nọ jẹ dindin in ji;+Yé nọ lẹkọwa bo nọ jẹ Jiwheyẹwhe dín ji,
35 Bosọ nọ flindọ Jiwheyẹwhe wẹ Osé yetọn+Podọ Jiwheyẹwhe Gigogán lọ wẹ Mẹfligọtọ* yetọn.+
36 Amọ́, yé nọ tẹnpọn nado yí onù yetọn do klọ ẹBosọ yí odẹ́ yetọn do dolalo na ẹn.
37 Ahun yetọn ma nọtegli to ewọ dè;+Yé masọ yin nugbonọ na alẹnu etọn.+
38 Ṣigba, lẹblanunọ wẹ ewọ;+E nọ jo* nuṣiwa yetọn na yé bo ma nọ hù yé sudo.+
E nọ saba duto homẹgble etọn ji+Kakati nado dike homẹgble etọn ni fọ́n pete.
39 Na e nọ flindọ agbasalan wẹ yé,+Yèdọ jẹhọn he nọ yìn wayi bo masọ nọ lẹkọwa.*
40 Whlasusu wẹ yé ṣiatẹ sọta ẹ to danfafa ji+Bo hẹn homẹgble e sinsinyẹn to danfafa ji!+
41 Yé nọ whlé Jiwheyẹwhe pọ́n gbọzangbọzan,+Bo nọ hẹn Omẹ Wiwe Islaeli tọn blawu.*
42 Yé ma nọ flin huhlọn* etọn,Yèdọ azán he gbè ewọ whlẹn yé* sọn alọ kẹntọ tọn mẹ,+
43 Lehe e basi ohia etọn lẹ to Egipti do+Gọna azọ́njiawu etọn lẹ to agbegbe Zoani tọn ji,
44 Podọ lehe e diọ osinwhín Nile tọn lẹ zun ohùn do+Bọ yé ma sọgan nù sọn asisa etọn lẹ mẹ.
45 E do supọ̀ adínọ susugege hlan nado dù yé sudo+Gọna opàn lẹ nado hẹn aigba yetọn gble.+
46 E jo jinukun yetọn lẹ na owẹ̀n nuhẹngbletọ lẹ,Yèdọ ale tuklajijẹ yetọn tọn lẹ na awhàn owẹ̀n lẹ tọn.+
47 E yí kẹ́njikun do hẹn ovẹn sinsẹ́n yetọn lẹ gble+Bo yí kẹ́nsu lẹ do hù atin sikomoli tọn yetọn lẹ.
48 Ewọ jo kanlin yetọn lẹ na kẹ́njikun+Podọ kanlin-yìnyìn yetọn lẹ na abì lẹ.*
49 E hẹn homẹgble sinsinyẹn etọn wá yé ji,Yèdọ adi, adánjijẹ po nukunbibia po,Gọna awhànpa angẹli lẹ tọn he hẹn yasanamẹ wá yé ji.
50 E wleawu omọ́-liho de tọn na homẹgble etọn.
E ma basi hihọ́na yé* sọn okú si;E sọ jo yé* na azọ̀nylankan.
51 To godo mẹ, e hù plọnji Egipti tọn lẹpo,+Yèdọ viplọnji he to gòhọ Ham tọn mẹ lẹ.
52 Enẹgodo, e plan omẹ etọn lẹ tọ́n taidi lẹngbọpa de+Bosọ deanana yé taidi kanlinpa de to danfafa ji.
53 E deanana yé to hihọ́ mẹ,Bọ yé ma dibuna nudepope;+Ohù sọ ṣinyọ́n kẹntọ yetọn lẹ ji.+
54 Enẹgodo, e plan yé wá aigba wiwe etọn ji,+Yèdọ lẹdo osó tọn ehe, fie ewọ ko yí adusilọ etọn do yí.+
55 E yàn akọta lẹ sẹ̀ sọn nukọnna yé;+E yí nujlẹkàn do má ogú de na yé;+E sọ hẹn hẹnnu Islaeli tọn lẹ nado nọ nọ̀ owhé yetọn titi lẹ gbè.+
56 Ṣigba, yewlẹ to Jiwheyẹwhe Gigogán lọ tẹnpọn* mapote bo to atẹṣi sọta ẹ;+Yé ma nọ payi nuflinmẹ etọn lẹ go.+
57 Yé sọ lẹhlan apadopo bo lẹzun nugbomadọtọ taidi tọgbo yetọn lẹ.+
Yé lẹhlan fidevo kẹdẹdi ogá he zẹ̀ali de.+
58 Yé nọ to homẹhẹngble e mapote po ofi wiwe yiaga yetọn lẹ po,+Yé sọ yí boṣiọ pipà yetọn lẹ do fọ́n adi* etọn dote.+
59 Whenue Jiwheyẹwhe mọ ehe, adi do e taun,+Enẹwutu, e gbẹ́ Islaeli dai mlẹnmlẹn.
60 To godo mẹ, e gbẹ́ gòhọtúntún Ṣilo tọn lọ dai,+Yèdọ gòhọ he mẹ ewọ ko nọ nọ̀ dai to gbẹtọvi lẹ ṣẹnṣẹn.+
61 E na dotẹnmẹ ohia huhlọn etọn tọn nado yin hinhẹn yì kanlinmọgbenu;E jo whanpẹ daho etọn do alọ kẹntọ tọn mẹ.+
62 E jo omẹ etọn lẹ na ohí+Bo gblehomẹ do ogú etọn go.
63 Miyọ́n sọ fiọ jọja sunnu etọn lẹ,Ohàn alọwle tọn de masọ yin jiji na awhli etọn lẹ ba.*
64 Yẹwhenọ etọn lẹ jai gbọn ohí dali,+Bọ asuṣiọsi yetọn titi lẹ ma viavi.+
65 Enẹgodo, Jehovah fọ́n taidi sọn amlọn mẹ,+Yèdọ taidi sunnu huhlọnnọ+ de he vẹnhàn họ́n na.
66 Ewọ sọ yàn kẹntọ etọn lẹ lẹkọ;+E hẹn winyan tẹgbẹ tọn wá yé ji.
67 E gbẹ́ gòhọ Josẹfu tọn dai;E masọ de hẹnnu Eflaimi tọn.
68 Ṣigba, e de hẹnnu Juda tọn,+Yèdọ Osó Ziọni he e yiwanna.+
69 E hẹn fiwiwe etọn dẹn-to-aimẹ taidi olọn,*+Yèdọ taidi aigba he e ko hẹn lodo kakadoi.+
70 E de devizọnwatọ etọn Davidi+Bo de e tọ́n sọn apó lẹngbọ lẹ tọn mẹ,+
71 Sọn nukunpipedo lẹngbọ he tindo ovi to anọ́nù lẹ go mẹ;Ewọ yí i do basi lẹngbọhọtọ de do Jakọbu, omẹ etọn lẹ ji,+Podọ do Islaeli, ogú etọn ji.+
72 Ewọ yí ahun he madoblọ do yìn yé,+Bosọ yí alọ azọ́nyinyọnẹn tọn do deanana yé.+
Nudọnamẹ Odò Tọn
^ Kavi “anademẹ.”
^ To paa mẹ, “he ma wleawuna ahun yetọn.”
^ To paa mẹ, “whlé.”
^ Kavi “núdùdù na alindọn yetọn.”
^ Kavi “núdùdù angẹli lẹ tọn.”
^ Kavi “Ahọsuyitọ.”
^ To paa mẹ, “ṣinyọnnudo.”
^ Kavi vlavo, “Dọ gbigbọ lọ to tintọ́n yì bo ma nọ lẹkọwa.”
^ Kavi “mọ awufiẹsa.”
^ To paa mẹ, “alọ.”
^ To paa mẹ, “fli yé gọ̀.”
^ Kavi vlavo, “na agbasa-hùnmiyọ́n sinsinyẹn.”
^ Kavi “alindọn yetọn.”
^ To paa mẹ, “ogbẹ̀ yetọn.”
^ To paa mẹ, “whlepọn.”
^ Kavi “awuwhàn.”
^ To paa mẹ, “Podọ yọnnu alọji etọn lẹ ma yin pipà.”
^ To paa mẹ, “E gbá fiwiwe etọn taidi ofi yiaga lẹ.”
