Salmu 24:1-10
-
Ahọlu gigonọ lọ biọ họngbo lẹ mẹ
-
“Jehovah tọn wẹ aigba” (1)
-
Ohàn Davidi tọn.
24 Jehovah tọn wẹ aigba po nuhe tin to e ji lẹpo po,+Yèdọ aigba po mẹhe nọ nọ̀ e ji lẹ po.
2 Na e ko hẹn ẹn lodo do ohù lẹ ji+Bo ko yí dodonu etọn hẹnai do tọ̀sisa lẹ ji.
3 Mẹnu wẹ sọgan hẹji yì osó Jehovah tọn ji,+Podọ mẹnu wẹ sọgan ṣite to ofi wiwe etọn?
4 Mẹdepope he yin homẹvọnọ bọ ahun etọn wé-ṣeke,+Yèdọ mẹhe ma ko gbọn lalo dali yí ogbẹ̀ Ṣie* do whlé,Kavi yí oklọ do whlé.+
5 Ewọ na mọ dona yí sọn Jehovah dè+Podọ dodowiwa* sọn Jiwheyẹwhe whlẹngántọ etọn dè.+
6 Ehe wẹ whẹndo mẹhe to dindin in lẹ tọn,Yèdọ mẹhe to nukunmẹ towe dín lẹ tọn, hiẹ Jiwheyẹwhe Jakọbu tọn E. (Sela)
7 Mì ze ota mìtọn daga, mì họngbo lẹ emi;+Mì hùndonuvo, mì ohọ̀n hohowhenu tọn lẹ emi,Na Ahọlu gigonọ lọ nido biọ họmẹ!+
8 Mẹnu wẹ Ahọlu gigonọ ehe?
Jehovah huhlọnnọ podọ hlọnhlọnnọ lọ wẹ,+Yèdọ Jehovah he yin hlọnhlọnnọ to awhànfunfun mẹ.+
9 Mì ze ota mìtọn daga, mì họngbo lẹ emi;+Mì hùndonuvo, mì ohọ̀n hohowhenu tọn lẹ emi,Na Ahọlu gigonọ lọ nido biọ họmẹ!
10 Mẹnu wẹ Ahọlu gigonọ ehe?
Jehovah awhànpa lẹ tọn wẹ—ewọ wẹ Ahọlu gigonọ lọ.+ (Sela)
Nudọnamẹ Odò Tọn
^ Kavi “alindọn Ṣie,” enẹ wẹ ogbẹ̀ Jehovah tọn he mẹde gán yí do whlé.
^ Kavi “whẹdida dodo.”
