Salmu 21:1-13
Na anademẹtọ hànjitọ lẹ tọn. Ohàn Davidi tọn.
21 Jehovah E, huhlọn towe mẹ wẹ ahọlu lọ nọ jaya te;+Lehe e nọ jaya tlala to azọ́n whlẹngán tọn towe lẹ mẹ do sọ!+
2 Hiẹ ko na ẹn ojlo ahun etọn mẹ tọn,+Hiẹ masọ tẹ̀ ẹ nuhe e yí nùflo etọn do biọ. (Sela)
3 Na hiẹ yí dona susugege do pé e;Hiẹ sọ yí jẹgbakun sika dagbedagbe* tọn ṣinyọ́n ota na ẹn.+
4 Ewọ biọ we ogbẹ̀ bọ hiẹ na ẹn,+Yèdọ ogbẹ̀ gaa, kakadoi podọ doidoi.
5 Azọ́n whlẹngán tọn towe lẹ nọ hẹn gigo daho wá na ẹn.+
Hiẹ sọ nọ na ẹn yẹyi po whanpẹ daho po.
6 Hiẹ hẹn ẹn zun donanọ kakadoi;+Hiẹ sọ nọ hẹn ẹn zun ayajẹnọ, na hiẹ* tin po e po wutu.+
7 Na ahọlu lọ dejido Jehovah go;+Na owanyi nugbo Gigogán lọ tọn wutu, ewọ ma na yin tẹnsẹna gbede.*+
8 Alọ towe na jẹ kẹntọ towe lẹpo go;Adusilọ towe na jẹ mẹhe gbẹwanna we lẹ go.
9 Hiẹ na hẹn yé zun zòhọ miyọ́n tọn nkọ to ojlẹ dide lọ mẹ whenue hiẹ na na yé ayidonugo.
Jehovah na ze yé mì to homẹgble etọn mẹ, bọ miyọ́n na fiọ yé.+
10 Hiẹ na và kúnkan* yetọn lẹ sudo sọn aigba ji,Podọ ovi yetọn lẹ sọn gbẹtọvi lẹ mẹ.
11 Na yé ko lẹn nado wà nuylankan sọta we;+Yé ko kàn ayiha gigẹdẹ lẹ he ma na tindo kọdetọn dagbe.+
12 Na hiẹ na hẹn yé joagọ+Gbọn ogá towe dindlẹn do yé ji* dali.
13 Jehovah E, fọ́n to huhlọn towe mẹ.
Míwlẹ na jihàn pipà tọn lẹ do pà huhlọn towe.
Nudọnamẹ Odò Tọn
^ Kavi “he yin kiklọ́we.”
^ To paa mẹ, “nukunmẹ towe.”
^ Kavi “ma na mùsà (dahli) gbede.”
^ To paa mẹ, “sinsẹ́n.”
^ To paa mẹ, “do nukunmẹ na yé.”
