Salmu 105:1-45
105 Mì nọ dopẹna Jehovah,+ bo nọ dawhá ylọ oyín etọn,Mì nọ hẹn azọ́n etọn lẹ zun yinyọnẹn to gbẹtọ lẹ ṣẹnṣẹn!+
2 Mì jihàn hlan ẹn, mì jihàn pipà tọn lẹ hlan ẹn,Mì nọ lẹnnupọndo* azọ́njiawu etọn lẹpo ji.+
3 Mì nọ doawagun to oyín wiwe etọn mẹ.+
Mì gbọ ahun mẹhe to Jehovah dín lẹ tọn ni jaya.+
4 Mì nọ dín Jehovah+ bo nọ biọ huhlọn etọn.
Mì nọ dín nado nọte to nukọn etọn to whepoponu.
5 Mì nọ flin azọ́njiawu he e ko wà lẹ,Yèdọ azọ́njiawu etọn lẹ po whẹdida etọn lẹ po,+
6 Mì kúnkan* Ablaham devizọnwatọ etọn tọn lẹ emi,+Mì visunnu Jakọbu tọn lẹ, yèdọ mẹdide etọn lẹ.+
7 Ewọ wẹ Jehovah Jiwheyẹwhe mítọn.+
Whẹdida etọn lẹ tin to filẹpo lẹdo aihọn pé.+
8 Ewọ nọ flin alẹnu etọn kakadoi,+Yèdọ opà he e do,* kakajẹ whẹndo fọtọ́ntọ ji,+
9 Alẹnu he e basi hẹ Ablaham,+Podọ whiwhle he e whlé na Isaki,+
10 Ehe e hẹn lodo taidi gbedide de na JakọbuPodọ taidi alẹnu he na dẹn-to-aimẹ de na Islaeli,
11 Dọ, “Yẹn na na we aigba Kenani tọn+Taidi mimá he na yin ogú towe.”+
12 E dọ ehe to whenue yé gbẹ́ whè to sọha mẹ,+Mọwẹ, sọha yetọn whè taun, bọ yé yin jonọ lẹ to aigba lọ ji.+
13 Yé zinzọnlin sọn akọta de mẹ jẹ devo mẹ,Podọ sọn ahọluduta de mẹ jẹ devo mẹ.+
14 Ewọ ma dike mẹdepope ni gbidikọna yé,+Ṣigba, e wọhẹ ahọlu lẹ na yewlẹ tọn wutu,+
15 Dọ, “Mì doalọ mẹyiamisisadode ṣie lẹ go blo,Mì sọ wà nuylankan de na yẹwhegán ṣie lẹ blo.”+
16 E hẹn huvẹ wá aigba lọ ji;+E sọ súali núdùdù tọn do yé.*
17 E do dawe de hlan jẹnukọnna yé,Yèdọ Josẹfu, he yin sisà nado yin kanlinmọ.+
18 Yé do afọgàn lẹ afọ na ẹn,*+Yé sọ do gẹdẹ okọ̀ na ẹn;*
19 Kakajẹ whenue ohó etọn mọ hẹndi,+Ohó Jehovah tọn wẹ klọ́ ẹ wé.
20 Ahọlu domẹhlan nado tún in dote,+Gandutọ gbẹtọ lẹ tọn sọ hẹn ẹn jẹ mẹdekannu.
21 E yí i do basi ogán do whédo etọn ji,Bosọ na ẹn aṣẹ do nutindo etọn lẹpo ji,+
22 Nado paṣẹ do* ahọvi etọn lẹ ji dile ewọ* jlo doPodọ nado plọn nuyọnẹn sunnu mẹho etọn lẹ.+
23 Enẹgodo, Islaeli wá Egipti,+Jakọbu sọ nọgbẹ̀ taidi jonọ to aigba Ham tọn ji.
24 Jiwheyẹwhe hẹn omẹ etọn lẹ zun sinsẹ́nnọ taun;+E hẹn yé zun huhlọnnọ hú kẹntọ yetọn lẹ,+
25 Yèdọ kẹntọ he e dike bọ ahun yetọn jẹ wangbẹna omẹ etọn lẹ ji,Na yé nido blasé do devizọnwatọ etọn lẹ go.+
26 E do Mose devizọnwatọ etọn hlan,+Gọna Aalọn,+ mẹhe ewọ ko de.
27 Yé basi ohia etọn lẹ to ṣẹnṣẹn yetọn,Yèdọ azọ́njiawu etọn lẹ to aigba Ham tọn ji.+
28 E do zinvlu hlan bọ aigba lọ dozinvlu;+Yé omẹ awe lẹ ma ṣiatẹ sọta ohó etọn lẹ.
29 E diọ osin yetọn lẹ zun ohùnBosọ hù whèvi yetọn lẹ.+
30 Opàn lẹ gọ́ aigba yetọn ji,+Yèdọ kakajẹ abò ahọlu tọn lẹ mẹ.
31 E degbena supọ̀ adínọ lẹ nado gbaṣinyọ́n yéPodọ jẹhli lẹ nado gbàpe gbọn aigba yetọn pete ji.+
32 E diọ jikun yetọn zun kẹ́njikunBo do abì* hlan aigba yetọn ji.+
33 Ewọ hù vẹntin po ovòtin yetọn lẹ poBo gídí atin he to aigba yetọn ji lẹ.
34 E degbe dọ owẹ̀n lẹ ni gbaṣinyọ́n yé,Yèdọ owẹ̀n flinflin madosọha lẹ.+
35 Yé dù ogbé-mú aigba lọ tọn lẹpo,Yé sọ dù sinsẹ́n aigba lọ tọn.
36 Enẹgodo, e hù plọnji aigba yetọn tọn lẹpo,+Yèdọ viplọnji yetọn lẹ.
37 E plan omẹ etọn lẹ tọ́njẹgbonu po fataka po gọna sika;+Mẹdepope masọ dahli to hẹnnu etọn lẹ mẹ.
38 Egipti jaya to whenue yé dedo,Na obu ko jẹ yé ji na Islaeli* tọn wutu.+
39 E wleawuna aslọ de nado whlá yé+Podọ miyọ́n de nado na yé hinhọ́n to zánmẹ.+
40 Yé biọ olàn bọ ewọ na yé asọkle;+Ewọ sọ nọ yí núdùdù he tọ́n sọn olọn mẹ do pekọna yé.+
41 E hùn nùvo do osé de mẹ bọ osin sà jẹgbonu;+E sà gbọn danfafa ji di tọ̀sisa.+
42 Na ewọ flin opà wiwe he e ko do na Ablaham devizọnwatọ etọn.+
43 Enẹwutu wẹ e plan omẹ etọn lẹ tọ́n po aglinjijẹ po,+Yèdọ mẹdide etọn lẹ po awhágbe ayajẹ tọn po.
44 Ewọ na yé aigba akọta lẹ tọn lẹ;+Yé dugu nuhe mẹdevo lẹ ko jẹtukla nado wleawuna tọn,+
45 Na yé nido nọ payi gbedide etọn lẹ go+Bosọ nọ yìn osẹ́n etọn lẹ.
Mì pà Jah!*
Nudọnamẹ Odò Tọn
^ Kavi vlavo, “dọho gando.”
^ To paa mẹ, “okún.”
^ To paa mẹ, “ohó he e degbe etọn.”
^ To paa mẹ, “wẹ́n opò akla tọn lẹpo.” Vlavo ehe to alọdlẹndo opò he nọ yin yiyizan nado to akla.
^ To paa mẹ, “Yé yí afọgàn lẹ do sayana afọ etọn.”
^ Kavi “Alindọn etọn biọ gẹdẹ mẹ.”
^ To paa mẹ, “Nado blá.”
^ Kavi “alindọn etọn.”
^ Kavi “miyọ́n he to jiji.”
^ To paa mẹ, “yewlẹ.”
^ Kavi “Halelujah!” “Jah” yin sándogli yinkọ lọ Jehovah tọn.
