Salmu 102:1-28
Odẹ̀ mẹhe yè to kọgbidina tọn, to whenue e jẹflumẹ* bo dọ ahunmẹdunamẹnu etọn lẹ tọ́n na Jehovah.+
102 Jehovah E, sè odẹ̀ ṣie;+Dike awhágbe ṣie na alọgọ ni jẹ dè we.+
2 A whlá nukunmẹ towe do mi to ojlẹ ayimajai tọn mẹ blo.+
Lẹ́ otó towe* hlan mi;Yawu siọ mi to whenue n’ylọ we.+
3 Na gbẹzan ṣie to jujuyi di azọ̀,Bọ ohú ṣie lẹ to zoji di akán he to jiji.+
4 Ahun ṣie taidi ogbé he yin sinsánliai bọ e ko hú,+Na yẹn nọ wọn nado dùnú.
5 Na yẹn nọ wẹnhun gángán wutu,+N’húgo kaka bo pò ohú kẹdẹ.+
6 N’wá taidi tọ̀pápá-bẹ́gaa danfafa ji tọn;N’wá taidi ajankusu pẹvi de to gbakija lẹ ṣẹnṣẹn.
7 N’nọ mlọnai bo ma nọ mọ amlọndọ;*N’wá taidi ohẹ̀ he to ṣokẹdẹ to họta.+
8 Kẹntọ ṣie lẹ nọ to ṣinṣàn mi kò to azán lọ pete ji.+
Mẹhe nọ vlẹ mi kò* lẹ nọ yí oyín ṣie zan nado hodẹ̀domẹ.
9 Na yẹn nọ dù afín di núdùdù,+Podọ osin he yẹn nọ nù ko flusọ́ po dasin po,+
10 Na homẹgble po adi sinsinyẹn towe po wutu,Na kiki nado tùn mi dlan wutu wẹ hiẹ do ze mi daga.
11 Gbẹzan ṣie taidi oyẹ̀ he to bubusẹ vudevude,+Yẹn sọ taidi ogbé he to húhú.+
12 Ṣigba, Jehovah E, hiẹ tin kakadoi,+Podọ yindidi* towe na gbọṣi aimẹ sọn whẹndo de mẹ jẹ devo mẹ.+
13 Ayihaawe ma tin dọ hiẹ na fọ́n bo wàlẹblanuna Ziọni,+Na ojlẹ lọ ko sọ̀ nado do nukundagbe towe hia ẹ;+Ojlẹ dide lọ ko wá.+
14 Na devizọnwatọ towe lẹ nọ tindo homẹhunhun to gbakija etọn lẹ mẹ+Bo tlẹ sọ yiwanna kọ́gudu etọn.+
15 Akọta lẹ na nọ dibusi oyín Jehovah tọn,Ahọlu aigba tọn lẹpo wẹ na nọ dibuna gigo towe.+
16 Na Jehovah na vọ́ Ziọni gbá;+Ewọ na sọawuhia to gigo etọn mẹ.+
17 Ewọ na na ayidonugo odẹ̀ agbátọnọ tọn;+E ma na gbẹkọ odẹ̀ yetọn go.+
18 Ehe ko yin kinkandai na whẹndo he ja,+Na mẹhe na wá yin jiji* lẹ nido nọ pà Jah.
19 Na ewọ nọ pọ́n odò hlan sọn ofi wiwe etọn he to aga,+Jehovah nọ pọ́n aigba ji hlan sọn olọn mẹ,
20 Nado sè azọ̀nwinwẹn gàntọ tọn,+Podọ nado tún mẹhe owhẹ̀ okú tọn ko yin didá na lẹ dote,+
21 Na oyín Jehovah tọn nido yin lilá to Ziọni+Podọ pipà etọn to Jelusalẹm,
22 To whenue gbẹtọ lẹ po ahọluduta lẹ po+Na pli dopọ nado nọ sẹ̀n Jehovah.
23 Ewọ hò huhlọn ṣie yí to daglamẹ gbẹzan ṣie tọn;E sán azán ṣie lẹ dogli.
24 Yẹn dọmọ: “Jiwheyẹwhe ṣie E,A de mi sẹ̀ sọn aimẹ to daglamẹ gbẹzan ṣie tọn blo,Hiẹ mẹhe tin kakadoi.+
25 Whenu dindẹn die gbọ́n wẹ hiẹ ko do dodonu aigba tọn lẹ ai,Podọ olọn yin azọ́n alọ towe tọn.+
26 Yé na dọ̀n, ṣigba hiẹ na gbọṣi aimẹ;Yemẹpo wẹ na dohó taidi awù de.
Hiẹ na diọ yé di avọ̀, bọ yé na juwayi.
27 Ṣigba, hiẹ na yin dopolọ bọ owhe towe ma na vọ̀ gbede.+
28 Ovi devizọnwatọ towe lẹ tọn lẹ na nọ tin to hihọ́ mẹ,Podọ kúnkan yetọn na yin hinhẹn lodo to nukọn towe.”+
Nudọnamẹ Odò Tọn
^ Kavi “lẹzun madogánnọ.”
^ Kavi “Dẹ́ hlan odò bo dotoai.”
^ Kavi vlavo, “N’húgo.”
^ Kavi “nọ yí mi do davlẹ.”
^ Kavi “oyín.” To paa mẹ, “oflin.”
^ To paa mẹ, “didá.”
