Howhinwhẹn lẹ 6:1-35
6 Visunnu ṣie, eyin hiẹ ko yí dewe do basi alọyitọ na kọmẹnu towe,+Eyin hiẹ ko na alọ jonọ de nado yin alọyitọ etọn,+
2 Eyin hiẹ ko yin wiwle do omọ̀ mẹ gbọn opà he a do de dali,Kavi yin wiwle gbọn ohó he tọ́n sọn onù towe mẹ lẹ dali,+
3 Visunnu ṣie, nuhe hiẹ na wà nado tún dewe dote die,Na a ko jẹ alọ kọmẹnu towe tọn mẹ:
Yì whiwhẹ dewe bo yawu vẹvẹna kọmẹnu towe.+
4 A dike nukun towe lẹ damlọn blo,A sọ dike nukundama towe lẹ samlọngọ blo.
5 Tún dewe dote kẹdẹdi otẹgbọẹ de sọn alọ gbéyantọ tọn mẹ,Podọ taidi ohẹ̀ de sọn alọ hẹ̀hùtọ tọn mẹ.
6 Yì adidẹ́ dè, hiẹ adidọnọ;+Doayi nuyiwa etọn lẹ go bo lẹzun nuyọnẹntọ.
7 Dile etlẹ yindọ e ma tindo awhàngán daho, anademẹtọ kavi ogán depope,
8 E nọ wleawuna núdùdù etọn to alunlun mẹ,+E sọ nọ bẹ núdùdù etọn pli to jibẹwawhé whenu.
9 Hiẹ adidọnọ E, nawẹ e na dẹnsọ bọ a na to aimimlọn to finẹ?
Whetẹnu wẹ hiẹ na fọ́n sọn amlọn mẹ?
10 Amlọn vude, amlọngọ sisà vude dogọ,Alọ biblá dogo na ojlẹ vude nado gbọjẹ,+
11 Ohẹ́n na wá ji we di ajotọ,Podọ hẹ́njijẹ na wá ji we di awhànfuntọ de.+
12 Mẹhe yin nuvọ́nọ bosọ yin mẹylankan nọ to zọnlinzin pé bo nọ to ohó oklọ tọn dọ;+
13 E nọ to nukun whè,+ bo nọ yí afọ etọn do to ohia basi bosọ nọ yí alọvi etọn lẹ do to dohia basi.
14 Po ahun he gblezọn de po,E nọ to ayiha gigẹdẹ kàn mapote+ bo nọ to wiwọ́ hẹnwa to filẹpo.+
15 Enẹwutu, nugbajẹmẹji etọn na wá to ajiji mẹ;To ojlẹ kleun de mẹ, yè na gídí i matin pọngbọ.+
16 Onú ṣidopo delẹ tin he Jehovah gbẹwanna;Mọwẹ, onú ṣinawe delẹ yin osùnú na ẹn:*
17 Nukun sakla tọn,+ odẹ́ he nọ dolalo,+ alọ he nọ sọ̀n ohùn homẹvọnọ tọn dai,+
18 Ahun he nọ kàn ayiha ylankan lẹ,+ afọ he nọ bikan to ylanwiwa mẹ,
19 Kunnudetọ lalonọ he nọ to lalodo mapote,+Gọna mẹdepope he nọ hẹn wiwọ́ wá mẹmẹsunnu lẹ ṣẹnṣẹn.+
20 Visunnu ṣie, nọ payi gbedide otọ́ towe tọn go,A sọ gbẹ́ anademẹ* onọ̀ towe tọn dai blo.+
21 Nọ hẹn yé do ahun towe mẹ to whepoponu;Sìn yé do okọ̀ towe.
22 E na nọ deanana we to whenue a to zọnlinzin pé;E na nọ basi hihọ́na we to whenue a mlọnai;E nasọ nọ dọhona we* to whenue a fọ́n.
23 Na miyọ́ngbán de wẹ gbedide yin,+Bọ osẹ́n yin hinhọ́n de,+Podọ wọhẹ he yin mimọyi taidi mẹplọnlọ yin aliho ogbẹ̀ tọn.+
24 Yé na nọ basi hihọ́na we sọta yọnnu ylankan,+Yèdọ sọta odẹ́ oklọ tọn yọnnu fẹnnuwatọ* tọn.+
25 A tindo ojlo na whanpẹ etọn to ahun towe mẹ blo+Kavi a dike ewọ yí nukun mẹkiklọ tọn etọn lẹ do dọ̀n we blo,
26 Na yọnnu galọtọ de tọn wutu, sunnu de ma nọ wá tindo hú akla nùdo dopo ba,+Ṣigba, asi sunnu devo tọn nọ ze ogbẹ̀* họakuẹ mẹdevo tọn do owù mẹ.
27 Be mẹde sọgan bẹ miyọ́nkán he to jiji pli do akọ́nnu bọ avọ̀ etọn lẹ ma na fiọ ya?+
28 Kavi, be mẹde sọgan zinzọnlin gbọn miyọ́nkán miyọ́nawu ji bọ e ma na mẹ̀ afọ na ẹn ya?
29 Nudopolọ wẹ gando mẹdepope he zanhẹ asi kọmẹnu etọn tọn go;Mẹdepope he doalọ yọnnu mọnkọtọn go ma na nọma yin yasana.+
30 Gbẹtọ lẹ ma nọ vlẹ ajotọ de kòEyin ewọ fìnnú nado hẹn pekọ wá na ede* to whenue huvẹ to hùhù i.
31 Ṣogan, eyin ewọ yin wiwle, e na suahọ etọn do donu ṣinawe ji;Nuhọakuẹ he to owhé etọn gbè lẹpo wẹ e na bẹ jo.+
32 Eyin mẹdepope deayọ hẹ yọnnu de, be zinzin* wẹ whèdo e;Mẹhe wàmọ hẹn vasudo wá edetiti* ji.+
33 Awugble po mẹdèpo po kẹdẹ wẹ e na gbẹ̀n,+Winyan etọn ma nasọ yin súnsúnsún sẹ̀.+
34 Na awuwhàn nọ hẹn asu de nado duadi;Ewọ ma na do awuvẹmẹ hia to whenue e to ahọsuyi.+
35 E ma na kẹalọyi ahọsumẹ* depope;Ewọ ma na sè ovẹ̀, mahopọnna lehe nunina towe klo sọ.
Nudọnamẹ Odò Tọn
^ Kavi “alindọn etọn.”
^ Kavi “osẹ́n.”
^ Kavi “nọ na we anademẹ.”
^ Kavi “alindọn.”
^ Kavi “hẹn alindọn etọn gọ́.”
^ To paa mẹ, “ahun.”
^ Kavi “alindọn etọn.”
^ Kavi “ofligọ.”
