Howhinwhẹn lẹ 14:1-35
14 Yọnnu he yin nuyọnẹntọ nugbonugbo nọ gbá ohọ̀ etọn,+Ṣigba, nulunọ nọ yí alọ etọn titi lẹ do họ́ ẹ liai.
2 Mẹhe to zọnlinzin to dodowiwa mẹ nọ dibusi Jehovah,Ṣigba, mẹhe aliho etọn lẹ gọ́ na oklọ* nọ vlẹ Ẹ kò.
3 Opò sakla tọn tin to onù nulunọ tọn mẹ,Ṣigba, nùflo nuyọnẹntọ lẹ tọn wẹ na basi hihọ́na yé.
4 Fie oyìn ma te, otò núdùdù tọn nọ to wiwe ji,Ṣigba, huhlọn oyìnsú de tọn nọ hẹn jibẹwawhé sù.
5 Kunnudetọ nugbonọ ma na dolalo,Ṣigba, kunnudetọ lalonọ nọ to lalodo mapote.+
6 Mẹṣankotọ nọ dín nuyọnẹn bo ma nọ mọ depope,Ṣigba, po awubibọ po wẹ oyọnẹn nọ wá na mẹhe tindo nukunnumọjẹnumẹ.+
7 Nọla na nulunọ,Na hiẹ ma na mọ oyọnẹn to nùflo etọn lẹ ji.+
8 Gbọn nuyọnẹn dali, zinzintọ nọ mọnukunnujẹ aliho he ji e to gbingbọn mẹ,Ṣigba, nulunọ lẹ nọ yin kiklọ* gbọn nulú yetọn dali.+
9 Nulunọ nọ yí nukunpẹvi do pọ́n whẹhuhu,*+Ṣigba, na nuhe dù nugbonọ lẹ, yé nọ tindo ojlo nado dọwhẹgbọ.*
10 Ahun lọsu wẹ nọ yọ́n nuhe to awuvẹ hẹnwa na ẹn,*Podọ mẹdevo lao ma sọgan má ayajẹ etọn hẹ ẹ.
11 Owhé mẹylankan tọn na yin vivasudo,+Ṣigba, gòhọ nugbonọ tọn na lodo dogọ.
12 Aliho de tin he taidi nuhe jlọ to nukun gbẹtọ tọn mẹ,+Ṣigba, okú mẹ wẹ e nọ dekọtọn do to godo mẹ.+
13 Etlẹ yin to nukiko whenu, ahun sọgan to awufiẹsa mẹ,Podọ ayajijẹ sọgan wá fó do awubla mẹ.
14 Mẹhe yin tasinyẹntọ to ahun mẹ na gbẹ̀n kọdetọn aliho etọn lẹ tọn,+Ṣigba, mẹdagbe nọ gbẹ̀n ale nuyiwa etọn lẹ tọn.+
15 Wunvinọ* nọ yí ohó lẹpo sè,Ṣigba, zinzintọ nọ lẹnnupọndo afọdide dopodopo ji.+
16 Nuyọnẹntọ nọ họ́ ede bo nọ lẹ́ sọn oylan kọ̀n,Ṣigba, nulunọ ma nọ kiya* bosọ nọ dejido ede go zẹjlẹgo.
17 Mẹhe nọ yawu gblehomẹ nọ yinuwa di nulunọ,+Ṣigba, mẹhe nọ lẹnnupọn ganji* nọ yin wangbẹna.
18 Wunvinọ* na dugu nulú tọn,Ṣigba, oyọnẹn nọ yin ṣinṣinyọn na zinzintọ di jẹgbakun.+
19 Mẹylankan lẹ na to dandannu glọ nado wá dẹ́ do odò to mẹdagbe lẹ nukọn,Podọ mẹylankan na wá dẹ́ do odò to họngbo dodonọ tọn lẹ nukọn.
20 Wamọnọ nọ yin wangbẹna etlẹ yin gbọn kọmẹnu etọn lẹ dali,+Ṣigba, họntọn adọkunnọ tọn lẹ nọ sù.+
21 Mẹhe nọ vlẹ kọmẹnu etọn kò waylando,Ṣigba, ayajẹnọ wẹ mẹdepope he nọ do awuvẹmẹ hia agbátọnọ.+
22 Be mẹhe nọ blasé domẹgo lẹ ma na buali wẹ?
Ṣigba, owanyi nugbo po nugbonọ-yinyin po na nọ yin didohia mẹhe nọ lẹn nado wà dagbe lẹ.+
23 Ale tin to azọ́n sinsinyẹn wunmẹ lẹpo mẹ,Ṣigba, ohẹ́n mẹ wẹ ohó tata didọ nọ dekọtọn do.+
24 Jẹgbakun nuyọnẹntọ lẹ tọn wẹ adọkun yetọn;Ṣigba, nulú kẹdẹ mẹ wẹ nuyiwa nulunọ tọn nọ dekọtọn do.+
25 Kunnudetọ nugbo nọ whlẹn ogbẹ̀* gán,Ṣigba, kunnudetọ oklọ tọn nọ to lalodo mapote.
26 Budisi Jehovah nọ hẹnmẹ deji mlẹnmlẹn,+Podọ fibẹtado de wẹ e na yin na ovi etọn lẹ.+
27 Asisa ogbẹ̀ tọn de wẹ budisi Jehovah yin,E sọ nọ gọkọ namẹ sọn omọ̀ okú tọn lẹ kọ̀n.
28 Susugege gbẹtọ lẹ tọn mẹ wẹ gigo ahọlu de tọn te,+Ṣigba, gandutọ de he ma tindo mẹjidugando lẹ nọ sudo.
29 Mẹhe nọ whleawu nado gblehomẹ tindo wuntuntun taun,+Ṣigba, mẹhe nọ yawu gblehomẹ nọ do nulú etọn hia.+
30 Ahun he whesọ nọ nagbẹ̀* agbasa,Ṣigba, awuwhàn nọ hẹn ohú lẹ yọ̀n.+
31 Mẹhe nọ tafu agbátọnọ to Mẹdatọ etọn vlẹko,+Ṣigba, mẹdepope he nọ do awuvẹmẹ hia wamọnọ to gigopana Ẹn.+
32 Mẹylankan na yin zinzindai gbọn ylanwiwa etọn titi dali,Ṣigba, dodonọ na nọ mọ fibẹtado to tenọgligo-hinhẹn etọn mẹ.+
33 Nuyọnẹn nọ sinai whii to ahun mẹhe tindo nukunnumọjẹnumẹ tọn mẹ,+Ṣigba, e nọ hẹn ede zun yinyọnẹn to nulunọ lẹ ṣẹnṣẹn.
34 Dodowiwa nọ ze akọta de daga,+Ṣigba, ylando nọ dowinyan akọta de.
35 Homẹ ahọlu tọn nọ hùn do devi he nọ yinuwa po zinzin po go,+Ṣigba, adi etọn nọ sinyẹn do devi he nuyiwa etọn huwinyan ji.+
Nudọnamẹ Odò Tọn
^ Kavi “gbán.”
^ Kavi vlavo, “nọ klọmẹ.”
^ Kavi “vọjlado bibasi.”
^ Kavi “tindo ojlo dagbe.”
^ Kavi “alindọn etọn.”
^ Kavi “Mẹhe ma tindo numimọ.”
^ Kavi “nulunọ nọ duadi.”
^ Kavi “mẹhe tindo nugopipe nulẹnpọn tọn.”
^ Kavi “Mẹhe ma tindo numimọ.”
^ Kavi “alindọn lẹ.”
^ Kavi “nọ na agbasalilo.”
